¹ Watuma'e injoo'e, so-soungaange seiman sanu a'daange li Yudea no'olongo onjo too-too labai nu Yahudi teule nonarimame Gombo'u Allah. ² Lantarane injoo'a, watui Petrus nala'e li Yerusalem, too-too sanu sinuna metantaniane pendapate kangkai liio, ³ kangkai negombo'e, "Li'oe na'o kangkai too-too labai sinuna injopa po'inange kangkai jimo." ⁴ Tapi, oi Petrus nompamula nonjalaasa'e papaila'e kangkai jimo, pineilunye, ⁵ "Lia'e pepeese mesusuyang li kota Yope, ma lilalongu ke'ada'ane labai masadara, lia'e ne'e i'to sounge pe i'to, a'daanga aime salae kaing mebilaye, sanu unalendaa'e kangkai apate pasunye la'e golunge, injopa benda injoo'e mongense'omae kangkaia'e. ⁶ la'emae inito'e, pinatasango'e ma ne'e i'to binaatan-binaatang apate bibisonye li petu, binaatang-binaatang meila, binaatang-binaatang mendoyole, ma ma-manu'e li tanganuang. ⁷ Lia'e teule no'olongo a'daange suara neghombo'e kangkaiya'e, 'Pembaung, Petrus, olotoma injopa inangome!' ⁸ Boi, lia'e negombo'e, lauje, Siopu. Pa, labai a'daanga sanu maharaame atau melehu nensio'e li lalongu nganga'e.' ⁹ Tapi, suara injoo'e nengimbate o'doinsana'onye la'e golunge, 'nuga sanu pino'osucime nu Allah, inyaa se-seinsanga no peilume maharaame!' ¹⁰ So'ale injeine toluinsangome nebali, injopa jojooma'e injoo'e giniule babalii golungoma'e. ¹¹ Siligoma'a, watu injoo'e teule, a'[daange tolo too sanu pinejai kangkaia'e nudua'e li labonge pomoiyango'e, la'e Kaisarea. ¹² No'uma'e, Roh negombo'e kangkaia'e untuke melampa kangkai jimo kangkai labai mara-ragu. ononge soungange seiman injeine teule melampa kangkaia'e ma li'ame mensio'e li labongu too injoo'e. ¹³ Injopa, io nomeilua'e kangkai li'ame io ne'e i'to malaikat o'olo li labongonye ma negombo'e, 'Pejaima too Yope ma'e injopa pomongiai Simon sanu notopei Petrus modua'e liine, ¹⁴ injopa io momeilua'e paatu kangkai'oe la'e paatu injoo'e li'oe nosalamata'e, li'oe ma jojoo too sanu momoiya li labongoome.' ¹⁵ Diapa mompamula megombo'a lia'e, Roh Kudus nenyau antage jimo, seli-lio aime watu pamulanye nebali kangkai li'ite. ¹⁶ Injoma, lia'e telambote kangkai Gombo'u Siopu, watu Liio negombo'e, 'Yohanes nombaptis kangkai ogo, tapi li'oe nobaptise kangkai Roh Kudus.' ¹⁷ Jadi, onjo Allah mombeea'e karunia sanu seli-lio kangkai jimo aime sanu bineea'o-Nye teule kangkai li'ite nopuse momaracaya li lalongu Siopu Yesus Kristus, o'iga lia'e ma'u ambopti nu Allah?" ¹⁸ Watu ilongoma'e nu jimo so'ale injoo'e, jimo nebali noodoye ma nomuji Allah kangkai negombo'e, "Onjo a'aiyo'a, Allah teule nombeeme karunia kangkai too-too labai nu Yahudi matoba'e sanu monungga kangkai tutuhuang." Injil dudua'e li Antiokia ¹⁹ Injopa, too-too sanu nenge a'antaane lantarane ponganiaya sanu nebali antagei Stefanus, nadadage dudua'e li Fenisia, Siprus, ma Antiokia, kangkai labai mobambala'e Gombo'u Siopu bai kangkai sigaungopa sangadi kangkai too-too nu Yahudi. ²⁰ Boi, a'daange bai sogau too la'e jimo, injoo'e too-too nu Siprus ma Kirene, sanu nodua'e li Antiokia ma negombo'e teule kangkai too-too nu Helenis kangkai nobambala'e tentange Siopu Yesus. ²¹ Tentaange Siopu menyertai jimo, goote tutuua too sanu nebali nomaracaya neteule kangkai Siopu. ²² Bambale tentaange jimo nodua'e li tuli'u jemaat li Yerusalem, ma jimo nejai oi Barnabas Antiokia ma'e. ²³ Watui Barnabas nodua'e ma ne'e i'to asasayange binea'u Allah, io neege ma nonasehati jimo jojoo ba tetape mesetia kangkai Siopu kangkai nyaa mo'uige. ²⁴ Lantaranei Barnabas nu too paila'e, kangkai kuasanu Roh Kudus ma nu iman, goote tutuu too inoni kangkai Siopu. ²⁵ No'uma'e, Barnabas nelampa Tarsus soma'e untuke mongintugei Saulus. ²⁶ Injopa, la'e dinua'onyai Saulus inoninye Antiokia ma'e. e'eendenye sotounge, jimo tepodua'e kangkai jemaat ma nongajare too goote. ma, li Antiokia, murit-murite untuke pamulanangonye notope "too nu Kristen". ²⁷ Ele-eleoma'e injoo'e, bai sogaungonya nabi nesau la'e Yerusalem nodua'e li Antiokia. ²⁸ Sala sotoo la'e jimo totopei Agabus, nopo'olo ma noramal kangkai pondulunu Roh asanu mebali molulumbuonge sanu mehebat sojuniaange. Ma, lulumbuonge injoo'e me'ebali antage pomarintani Klaudius. ²⁹ Injoma, nu murite nomutusa'e untuke mo ma'atu sumbangane, la'emae sanu mampunu jimo sotoo-sotoo, kangkai so-soungaange seiman sanu momoiya li Yudea. ³⁰ Injopa, sanu pinogutunu jimo teule, noma'atu sumbangane injoo'e kangkai penatua-penatua la'ema'e umbungi Barnabas mai Saulus.