¹ Watuma'e injoo'e, Raja Herodes nongengkate umbungonye antage bai sogau too la'e jemaat untuke monganiaya jimo. ² Io momatei Yakobus, soungaangi Yohanes, kangkai piginge. ³ Watui Herodes ne'e i'to onjo tindakanonye injoo'e ma'asanange nyaa too-too nu Yahudi, io nonarusa'e kangkai mela'opei Petrus teule. So'ale injoo'e nebali e'endenu Eleo Porameanu Roti Labai Aragi. ⁴ Nopuse nela'opei Petrus, io nonsio'a'e li lalongu panjara ma nonyarakaneio kangkai apate pasukan nu prajurit untuke monyi-nyiligeio, kangkai amaksute, malapase Paskah, mongkoniio li tolonu too goote. ⁵ Injomai, Petrus tinaanange li lalongu panjara, tapi susuyange antagei Petrus nopene'a'u taruse kangkai Allah la'emae jemaat. Malaikatu Siopu Nolapasa'ei Petrus La'e Panjara ⁶ Libengima'e injoo'e, watui Herodes mongkonimei Petrus meluange, Petrus o'otulu li tanganu do'too prajurite, binatoange doluo rante, ma topo njaga li tolo nu pintu monyi-nyiligi panjara. ⁷ Injopa, siliga, sotoo malaikat tu Siopu o'olo meense'ei Petrus ma mensilaage nelalate li sel lu panjara injoo'e nondapa'e labani Petrus ma nonguguleio, kangkai negombo'e, "Peingkasa membaunge!" Injopa, rante-rante injoo'e na'alapase ma nanahu la'e dobia umbungonye. ⁸ Injopa, malaikate injoo'e negombo'e kangkaiio, "Bato'ima solipiime ma pakema sandaloome." Injopa, io nogutu a'aiyo'e. la'emaeo'e, io negombo'e kangkaiio, "Pakema jubaame ma ponuute lia'e!" ⁹ Injopai, Petrus neluange ma nonuuta'e malaikate injoo'e. Labai nootoinya bai nuga sanu nebali nanyata la'e malaikate injoo'e, tapi notoinye bai nuga sanu initonye. ¹⁰ Watu jimo nalabate topo njaga pamulangonye ma o'doluoana'onye, jimo nodua'e li pintu gerbang pue sanu monunga kotama'e. Pintu gerbange injoo'e tebo'a eseseilunye antage jimo, injopa jimo neluange ma nelampa nodua'e li sounge loronge, tiba-tiba malaikate injoo'e nolinjo'i oi Petrus. ¹¹ Watui Petrus nasadare la'e sanu nebali kankaiio, io negombo'e, "Sekarange, lia'e tu-tutuu uotoi onjo Siopu nejai malaikato-Nye ma nonyalamata'e lia'e la'e umbungi Herodes ma la'e4 jojoo so'ale sanu noranmuae la'e too-too nu Yahudi." ¹² La'e sinadarangoma'e ni Petrus, io na'o labongi Maria, siinani Yohanes sanu notopei Markus, injopa goota too nengelinsonge kangkai ma nesusuyange. ¹³ Watui Petrus nodendenge pintu gerbang, sotoo pelayane bengkele totopei Rode nodua'e untuke momboa'e. ¹⁴ La'e inotouangonya suarani Petrus, lantarane neege tutuu io labai nombo'aa'e pintu, tapi netaimbulane lalongoma'e ma nomeilua'e onjoi Petrus o'olome li pintu gerbange. ¹⁵ Jimo negombo'e kangkai Rode, "Li'oe labai mawarasa!" Tapi, oi Rode momeilua'e taruse onjo sanu pineilua'onye tutuu, injopa jimo tetape megombo'e, "Injoo'e nu malaikatonye. ¹⁶ Tapi, oi Petrus meinsa-insange modendenge, ma watu jimo nombo'aa'e pintu, ma ne'e i'toi Petrus, jimo tetaingkinge. ¹⁷ Boi, nopuse nombee kode kangkai umbungonye ba jimo mopoodoye, io nonjalaasa'e kangkai jimo Siopu sanu nongkoniio neluange la'e panjara. injopa, io negombo'e, "Peilua'a so'ale injeine kangkai Yakobus ma so-soungange seiman." Injopa, io nelengkate ma nelampa pomoiyangoma'e sanu tantani. ¹⁸ Watu tanga eleo nodua'e, nebalia a'kacau sanu labai boi dedee'i li antaranu prajurite tentange nuga sanu nebalime kangkai Petrus. A'pateni Herodes ¹⁹ Watui Herodes mongintugei Petrus ma labai dinua'onye, io nomaresa toponjaga ma nombee parinta ba jimo nopatei. Iniopai, Herodes nesau la'e Yudea Kaisarea ma'e ma nomoiya apio'e. ²⁰ Watu injoo'e, oi Herodes noungkule tutuu kangkai too-too nu Tirus ma Sidon, injopa kangkai nosituru'e, jimo nodua'e kangkai Herodes, ma nopuse no mbu-mbujui oi Blastus, topo nguruse labongu raja, jomo nomongi untuke nodamai lantarane wilaya nu jimo na'agaade nongembe sanu no'inang la'e wilaya ni Herodes. ²¹ Watu eleo sanu tinantua'ome nujimo, Herodes nomake pakeanu kerajaan, nodungko'e li kaderanu pengadilan, ma neloaa'e sanu nopeilua'e kangkai jimo. ²² Rakyate si'eloa taruse, "Injeina suara nu allah, labai manusia!" ²³ Boi watuma'e injoo'e teule, sotoo malaikat tu Siopu nenyau nonapa'e pa io labai nombeea'e kemuliaana kangkai Allah ma io ininangu gonggoloang, injopa nate. ²⁴ Tapi, Gombo'u Siopu o'tutuhuma'e ma netilale doluo. ²⁵ Injopa, oi Barnabas mai Saulus nongulele la'e Yerusalem nalapase jimo nongopusa'e pelayananu jimo, kangkai nomeihuanei Yohanes, sanu notope teulei Markus.