¹ Sounge watu, a'daanga li antara jemaat tu Antiokia, nabi-nabi ma guru-guru, injoo'umei Barnabas, Simeon sanu notopei Neger, Lukius la'e Kirene, Manahem sanu bina'ayange kangkai Herodes, raja nu wilaya, mai Saulus. ² ulenge pepeese mo ibadah too-too injeine kangkai Siopu ma nepuasa, Roh Kudus negombo'e, "antaga'e Lia'a oi Barnabas mai Saulus untuke tugase sanu pinoleba'o'e jimo." ³ No'uma'e, jimo nepuasa ma nesusuyang, inkjopa nongengkata'e umbung jimo kangkai Barnabas mai Saulus, jimo nejai doluonye nelampa. Barnabas mai Saulus li Pulau Siprus ⁴ Injoma, nopusoma'e pinejai nu Roh Kudus nelampai, Barnabas mai Saulus nesau Seleukia ma'e, injopa la'emaeo'e jimo nolayage Siprus soma'e. ⁵ Watu jimo nodua'e li Salamis, jimo nobambala'e Gombo'u Allah li sinagoge-sinagoge too nu Yahudi, injopa jimo teule nongkoni oi Yohanes untuke pelayanu jimo. ⁶ Watu jimo na'o nelologe jojoo pulau dudua'e Pafos, jimo no'odua'e sotoo topo nyihir, sotoo nabi palsu nu Yahudi, sanu totopei Baryesus. ⁷ Io kangkai Prokonsul Sergius Paulus, sotoo sanu mapande, sanu nomongi oi Barnabas mai Saulus nodua'e kangkaiio ma malani me'ilongoa'e Gombo'u Allah. ⁸ Tapi, oi Elimas, topo nyihire injoo'e, pa a'aiyouma topenye inantu'a'e, mongevai Barnabas mai Saulus, ma mongusaha mombengko'a'e iman nu Prokonsul injoo'e. ⁹ Boi, oi Saulus, sanu nootoi oi Paulus, nohu'e nu Roh Kudus, nomatasei Elimas, ¹⁰ injopa negombo'e, "Hey li'oe, sanu huhu'e kangkai bagiana'u poonipu ma bagiana'u majaa'e, li'oe injaane unganu Iblis, li'oe injaane musu'e la'e bagiana'u sanu tutuu, labai no soro'ima mombengko'a'e jalanggu Siopu sanu mondolonge? ¹¹ Siligoma'a, umbungu Siopu modua'e kangkai'oe injopa li'oe mebali mohulol ma labai me'e i'to eleo baisogau eleo e'e'endenye." Watuma'e injoo'e teule, solonsom ma no'onope nenyau ngkaiio injopa io nelampa nekulilinge mongintuge too untuke mongintide umbungonye. ¹² Injopa, prokonsul injoo'e nebali nomaracaya watu ne'e i'to sanu nebali pa liio masanange antage ajaranu Siopu. Paulus mai Barnabas na'o kotama'e nu Antiokia li Wilaya nu Pisidia ¹³ Sounge watu, oi Paulus ma too-too sanu kangkaiio nolayage la'e Pafos nodua'e li Perga, li Pamfilia, tapi oi Yohanes nolinjo'i jimo ma nongulele Yerusale moma'e. ¹⁴ Boi, oi Saulus mai Barnabas nonarusa'e peela-lampa la'e Perga ma nodua'e li Antiokia, li Pisidia. injopa, watu eleo Sabat, jimo na'o li sinagoge injopa nodungko'e lio'e. ¹⁵ Nopuse pombaca nu Hukum Taurat ma kitap pu nabi, kapala-kapala nu sinagoge nejai too negombo'e kangkai do too rasul injoo'e, "So-soungaange, onjo a'daanmga sanu nopogombo'a o'mie untuke mo paasanange too-too injeine, gombo'a'o'ma." ¹⁶ Injoma, oi Paulus u'noloa'e ma nombee kode kangkai umbungonye ma negombo'e, "Hey too-too nu Israel ma li'eme sanu mohule kangkai Allah, pe'ilongoa'a! ¹⁷ Allah bangsa nu Israel injeinesanu nomile sioputomae ma nolinjo'i bangsate e'endenye nujimo nomoiya li petu nu Mesir ma kangkai ongkonge teengkate, Io nomimpine jimo neluange la'e injoo'e. ¹⁸ e'endenye sekitare apampulu toung, Io nonyabare kangkai pepeihu'u jimo li padang belantara. ¹⁹ Ijopa, Nopusoma'e Io nongancura'e pepitu bangsa li petu nu kanaan, Io no warisa'e petu injoo'e. ²⁰ Jojoo injoo'e nebali kira-kira e'endenye 450 toung. ( Apagatuse ma Limampulu Toung ). La'emae injoo'e. Allah nonyarakane kangkai jimo hakim-hakim nodua'e li antage watu Nabi Samuel. ²¹ No'uma'e, jimo nomongi sotoo raja, injopa Allah nombeea'e kangkai jimo oi Saul, unga langkai ni Kish, too la'e suku Benyamin, e'endenye apampulu toung. ²² La'emaei Saul nalisa'u Allah, Allah nongkoloa'ei Daut untuke mebali raja nu jimo, sanu tentange io Allah nonyabia'ome ma negombo'e, 'Lia'e no'odua'omei Daut, unga langkai ni Isai, too sanu mo'ono li nyaa'E, sanu mogutu jojoo sanu seilu'E.' ²³ La'e turuna nu too injeine, Allah, sesuainu janji-Nye, mongkonia'e kangkai Israel sotoo Juruslamat, injoo'umei Yesus. ²⁴ Laupe podua'i Yesus, oi Yohanes no bambalaome watu injoo'e tentange baptisan mo'otoba'e kangkai jojoo too nu Israel. ²⁵ Injopai, Yohanes ulenge pepeese mongopusa'e tugasonye, io gogombo'e tarus, "no kikira'omie oiga lia'eine? lia'e labai Liio. Tapi, siligoma'a, Otooa modua'omae mopuse lia'e,sandale li bibiso-Nye labai sipato'a lia'e mongalisa'e.' V 26 So-soungaange, turuna nu soungangi Abraham ma too-too li antaramie sanu mohule kangkai Allah, antage li'ite bambale masalamate injeine pineilua'ome. ²⁷ Saba'e, jimo sanu momoiya li Yerusalem ma topo mimoinu jimo, sanu labai mo'otoi Liio ma labai momahami pomeilunu nabi, sanu nobacaa'e tunggale eleo Sabat, nongana'ime pomeilu nu nabi injoo'e kangkai nehukumei Yesus. ²⁸ Injopa, soula labai no'odua'e alasane bainuga jimo untuke mehukume mate, jimo nomongi oi Pilatus untuke momatei Yesus. ²⁹ Injopa, watu jimo nongana'i jojoo sanu tutulise tentaangei Yesus, jimo nenyauwa'ei Yesus la'e ayu salip ma nongkeluna'e-Io li lalongu pekuhurange. ³⁰ Tapi, Allah nombangkita'e Liio la'e antaranu too nate, ³¹ injopa bai sogau eleo e'endenye, oi Yesus nopo'ita kangkai too-too sanu singkaiane Liio la'e Galilea dudua'e Yerusalem, sanu a'alaine nebali sabi-sabi-Nye antage bangsa injeine. ³² Injopa, liame mongkonia'omae ngkai'eme Bambale Paila'e tentange janjinu Allah kangkai sioputomae, ³³ onjo nu Allah nombea'ome janmji-Nye kangkai li'ite, unga-unga nu jimo, kangkai nombangkita'ei Yesus, aime sanu tutulise lilalongu kitap Mazmur pasale doluo: 'Li'oeane nu Unga-E. Patuine, Lia'e mebalime Siama-Me.' ³⁴ Tentange Allah sanu nombangkita'ei Yesus la'e antaranu too nate, laume bai'ulenge meteule antage ma'ancure, Allah negombo'ome, 'Lia'e mombeea'e ngkai'eme berkate sanu mokudus ma mebali noparacaya, sanu bineea'e kangkai Daut.' ³⁵ Injoo'uma saba'onye, Liio teule negombo'e lilalongu Mazmur sanu taninye, 'Li'oe labai mombeea'e Too-Me Mokudus me'e i'to ma'ancure.' ³⁶ Pai, Daut, nopuse nolayani keturunanonye ambo-ambo'e lantarane e'seilunu Allah, injopa nate, ma ngkineluna'e li antara nu siopunyomae, injopa ne'e i'to sanu ma'ancure, ³⁷ tapi oi Yesus sanu binangkita'u Allah la'e antaranu too nate, labai ne'e i'to ma'ancure. ³⁸ Lantarane injo'a, tubayama'a nootoimie, so-soungange, pa boi la'e Liio injeine pongampune antage dosa-dosa pina'anyata kangkai'eme, ³⁹ ma boi la'emae-Io, tunggale too sanu momaracaya nobebasa'e la'e babagiana'onye, sanu la'eio li'eme labai magaade no bebasa'u Hukum Taura ti Musa. ⁴⁰ Jadi, panga'apaila'a bala so'ale sanu pineilua'e li lalongu kitap pu nabi labai mebali kangkai'oe: ⁴¹ 'Siligoma'a, hey topo nagore! Teta'ingkinge injopa ma'ancurome, lantarane Lia'e mogutu pokarajaange li jamanoome, sounge pokarajaange sanu labai noparacayamie, sabii o'too monjalaasa'e kangkai'oe."' ⁴² Diapa malani meluangai Paulus mai Barnabas, too momongi bala jimo momeilua'e tentange Gombo'u Siopu injoo'e watu eleo Sabat babalii. ⁴³ la'e pedudua'anange injoo'e naakore, goota too nu Yahudi ma nu proselit sanu mohule kangkai Siopu nonuutei Paulus mai Barnabas, sanu negombo'e kangkai jimo injopa nongudea'e jimo untuke momoiya taruse li lalongu anugrah nun Allah. ⁴⁴ Watu eleo Sabat babalinye, ampi jojoo too li kota nelinsonge untuke me'ilongoa'e Gombo'u Siopu. ⁴⁵ Tapi, watu too nuh Yahudi ne'e i'to arameange injoo'e, nyaa nu jimo nenge'iri ma nompamulame mongeva nuga sanu pineilua'e la'ei Paulus kangkai mohina'io. ⁴⁶ Injopai, Paulus mai Barnabas nengimbatoma'e kangkai nabarani ma negombo'e, "So'ale injeine penting pa Gombo'u Allah haruse no peilua'e luulu kankai li'eme. pa labai seilumie ma nosangkamie li'eme labai sipato'e ma'agaade tutuhuange seende-endenye, siligoma'a, li'ame mombali'e antage bangsa-bangsa taninye. ⁴⁷ Lantarane, a'aina Siopu nombeea'e parinta kangkai li'ame: 'Lia'e mopobali li'eme mensilaage untuke bangsa-bangsa taninye bala li'eme magaade mongkoni a'salamate dudua'e tampa'u juniaa." ⁴⁸ Watu too-too labai nu Yahudi injoo'e no'olongo so'ale injeine, jimo neege ma nomuliakane Gombo'u Siopu. Injopa, o'gootonye aim,e sanu ti nantua'ome untuke tumuhu seende-endenye, mebali momaracaya. ⁴⁹ Injoma, Gombo'u Siopu nadadage jojoo li wilaya injoo'e. ⁵⁰ Tapi too-too nu Yahudi mongo-ngonda'i bengkele-bengkele meiman sanu nohormati ma too-too pentinge li kota injopa nongo nganiaya kangkai Paulus mai Barnabas, kangkai nonaim,bula doluonye neluang la'e daera perbatasanu jimo. ⁵¹ Injopa, kangkai nonantana'e ahu la'e bibis la'e too nu Yahudi lio'e, Paulus mai Barnabas na'o Ikonium. ⁵² Injopa, nu murit hinu'eange kangkai neege injopa kangkai Roh Kudus.