¹ Watui Petrus mai Yohanes negombo'e kangkai too goot, noduaomae kangkai jimo nu imam, kapala toponjage Bait Allah, ma too-too nu Saduki, ² kangkai noungkule tutuu lantarane jimo nongunde too goote injopa nobambala'e li lalongi Yesus adaange kebangkitan la'e tatanganu too nate. ³ Injopa, jimo nela'opei Petrus mai Yohanes nonsio'a'e lalongoma'e nu panjara dudua'e do-dondomonyomae lantarane libengime. ⁴ Boi, goote la'e jimo sanu no'olongome pegombo'u rasul nebalime nomaracaya, ma o'gootu langkai li antaranu jimo nebali kira-kira lima lihu too. ⁵ Watu Do-dondomonyomae, pemimpin-pemimpin, to-tomogulang, ma ahli-ahli Taurat jimo nelinsonge li Yerusalem, ⁶ kangkai Imam Giombangei Hanas, mai Kayafas, Yohanes, Aleksander, ma jojoo too la'e soungangu Imam Giombang. ⁷ Watu jimo nopopomoiyai Petrus mai Yohanes li tanga-tanga, jimo no'utanya, "kangkai kuasa nuga atau kangkai topeniga li'eme mogutu so'ale injeine?" ⁸ Injopai, Petrus, hinueangu Roh Kudus, negombo'e kangkai jimo, "topo mimpin nu bangsa ma to-tosia'ang, ⁹ onjo noparesa li'ame patuine lantarane sounge pepeihu'e paila'e sanu pinogutumamime antage too sanu molungkenge injeine, kangkai cara nuga too injeine pino'odoongome? ¹⁰ Tubayama'a so'ale injeine nootoi la'e li'eme jojoo ma jojoo too nu Israel paboi la'e topeni Kristus Yesus, Too nu Nazaret, sanu sinalipomie, sanu binangkita'ome nu Allah la'e tatanganu too nate, too injeine o'olo li tolomie lilalongu keadaane mesehat. ¹¹ Yesus injeine nu: 'Polu sanu labai neseilumiemie, topo gotu bangunan sanu nebali poli pamulanye. ¹² Injopa, labai adaange keselamatan antage taninye palabai adaange tope taninya lyangkopu golung bineea'e li ta-tanganu manusia sanu la'e tope injeine li'ite magaade nosalamata'e." ¹³ Watu jimo ne'e i'to a'barani ni Petrus mai Yohanes ma notoinu onjo jimo labai too mapande ma boi too biasa, jimo nebali neherang ma nompamula mo'otoi onjo doluonye perna singkaianei Yesus. ¹⁴ Injopa, la'emae ne'e i'to too sanu pino'odoonge injoo'e no po'olo li jei ni Petrus mai Yohanes, jimo laume no mba-mbaro. ¹⁵ Tapi, watu jimo nomarintaa'ei Petrus mai Yohanes untuke molinjo'i Sanhedrin jimo negogomboane sotoo kangkai taninye, ¹⁶ kangkai negombo'e, nuga sanu haruse nopogutute antage dotoo injeine? Saba'e, sounge tanda ajaip sanu luarbiasa nebalime la'emae jimo ma nanyatame antage jojoo ntoo sanu nomoiya li Yerusalem, ma labai magaade no ba-baroite. ¹⁷ Tapi, bala so'ale injeine labai madadage antage too-too, ambo'onya no ancamota jimo bala laume megombo'e bai kangkaiga lilalongu tope injoo'e. ¹⁸ la'emae injoo'e, jimo nolebai Petrus mai Yohanes, injopa nomarinta doluonye balabai megombo'e atau mongajara'e bainuga li lalongu topeni Yesus. ¹⁹ Tapi, Petrus mai Yohanes nengimbate ma negombo'e kangkai jimo, "Udutaoma bailiga sanu tutuu lilalongu ponyiligu Allah, me'ilongoa'e li'eme atau Allah? ²⁰ Saba'e, liame labai mebali sangadi momeilua'e so'al-so'ale sanu initomamime ma ilongo." ²¹ Injoma, watu jimo mongancame tarusei Petrus mai Yohanes, tinubayanu jimo rasul-rasule injoo'e nelampa, pa laume no'odua'e cara untuke mehukume doluonye lantarane injoo'a too goote sanu momuji Allahla'emae sanu nebalime. ²² Saba'e, too sanu pino'odoonge injoo'e nebali tanda sanu nanyata, pa umuronye labi la'e apampulu toung. Petrus mai Yohanes Nongulele So-Soungaange Seiman ²³ Watu binebasa'ome, Petrus mai Yohanes na'o kangkai je-jeiyangonye ambo-ambo'e ma nociritaa'e bagiana'onye sanu pineiluau imam kapala ma to-tosiyaange kangkai jimo. ²⁴ Ijopa, watu je-jeiyangonye injoo'e no'olongoma'e, jimo nenge suara untuke Allah kangkai no'osounge nyaa injopa negombo'e, "O Siopu, Li'omome sanu nopebali golung, juniaa, ma bagiana'u isinmye, ²⁵ sanu negombo'e la'emae Roh Kudus, la'emae nganganu hambaa-Me, Daut, siopumamimae: 'Inoga bangsa-bangsa taninye monasu, ma too-too umeseilua'e sanu labai oguna? ²⁶ Raja-rajanu juniaa si'esiapome, injopa nu penguasa nelinsonge kangkai, mongeva Siopu ma mongeva sanu Inurapango-Nye.' ²⁷ Pa, sebenaronye li kota injeine nengelinsongme kangkai untuke mongevai Yesus, Hambaa-Me sanu mokudus, sanu Inurapangoo-Me, oi Herodes mai Pontius Pilatus, kangkaime bangsa-bangsa taninye, injopa too-too nu Israel, ²⁸ untuke mogutu bagiana'onye sanu la'e umbungoo-Me ma rencanaa-Me sanu tinantua'ome la'eluulu sanu mebali. ²⁹ Injopa a'alaine, Siopu, siligomaa ancaman-ancaman nu jimo ma karunmiaima hamba-hambaa-Me injeine untuke mo bambala'e Gombo'oo-Me kangkai bagianau ababarani, ³⁰ sementarama'e Li'oe monangkaa'e umbungoo-Me mo podoonge ma tanda-tanda kangkai keajaipan-keajaipan nebali boi la'emae tope nu Hambaa-Me sanu mokudus, Yesus." ³¹ Injopa, nopusoma'e nesusuyanga jimo, negogema pomoiyangu jimo nengelinsonge kangkai ma jimo jojoo hinu'eangu Roh Kudus, kangkai mobambala'e taruse Gombo'u Allah kangkai barani. Tutuhuangu Too Momaracaya ³² Injopa, lilinsonangu jimo sanu momaracaya no'osounge nyaa ma nu jiwa. Labai sotoo-too sanu megombo'e onjo barangu ambo-ambo'onye boi sosoungonya togunmye, tapi babagiana'onye jimo jojoo togunye. ³³ Injopa, kangkai kuasa sanu giombang nurasul nombeea'e kesaksianu jimo tentange a'bangkitu Siopu Yesus ma anugrah sanu giombang adaange kangkai jimo jojoo. ³⁴ Labai sotoo-too sanu okuranange li ta-tanganu jimo lantarane jojoo too adaange jo'ong atau labong, nopobalu'onye, ma mongkoni hasilu sanu pinobalu'onye, ³⁵ injopa nolambaa'onye li bibisu rasul, ma no ti-tilala'e antage sotoo-sotoo sesuai la'emae kebutuhanonye. ³⁶ A'aiyo'e teulei Yusup, too nu Lewi, turunanu Siprus, sanu ilebaange teule nu rasul, Barnabas, antu'onye unga ma'asanang, ³⁷ mobalu'e jo'onggonye injopa nongkoni dionye, ma ilamba'a'onye li bibisu rasul.