¹ Watu eleo Pentakopsta nodua'e, jimo singkaiyane na'aadange li sounge pomoiyange. ² Injopa, tiba-tiba ilongoma'a la'e golunge, aime suaranu bayale sanu makancange, injopa suara injoo'e ilongo seisinu labonge pomoiyangu jimo se'edungko'e. ³ Injopa nodua'e kangkai jimo oyo-oyo a'ime legangu api sanu si'eleabe ma nesompo kangkai jimo sotoo-sotoo. ⁴ Injopa jimo hinu'eangu Roh Kudus ma nompamulame megombo'e lilalongu bagiana'u bahasa, aime bineea'u Roh Kudus untuke nogombo'a'u jimo. ⁵ Watuma'e injoo'e, a'daange too-too nu Yahudi sanu momoiyua li Yerusalem, too-too me imane la'emae tunggalu bangsa li yangkopu golung. ⁶ Injopa, watu ilongoma'a suara injoo'e, goota too nodua'e nengelinsonge kangkai ma nengeherange lantarane tungalu so tooa nolongoma'e jimo injoo'e si'egombo'e bahasanu jimo ambo-ambo'e. ⁷ Jimo nenge herange, kangkai negombo'e, jelauje jimo sanu si'egombo'e injoo'e boi too-toome nu Galilea? ⁸ Laqbai tutuua sipada li'ite mo'olongo jimo kangkai bahasa li pomoiyange pinembuaangote? ⁹ Too-too nu Partia, ma Media, ma Elam, ma nu penduduk Mesopotamia, Yudea, maq Kapadokia, Pontus ma nu Asia, ¹⁰ Frigia, ma Pamfilia, manu daera-daera Libia meense'e Kirene, ma pendatang-pendatange la'e Roma, too-too nu Yahudi a'aiyo'e teule topo nuute Agama mnu Yahudi, ¹¹ Too-too nu Kreta ma nu Arap. Ilongotoma jimo se'e gombo'e la'e bahasate tentange pogu-gutu nu Allah sanu giombange." ¹² Injopa, jimo jojoo neherange ma nebingunge kangkai negombo'e sotoo kangkai taninye, nuga antu'onyeine? ¹³ Tapi, pinokeke'angu too taninye ma neghombo'e, jimo namabo nu anggur bou." Petrus Negombo'e kangkai Too Goote ¹⁴ Boi, u'noloa'ai Petrus kangkai sompuluma sounge rasul, nopolongoa'e suara ma negombo'e kangkai jimo, hey too nu Yahudi ma jojoo sanu nomoiya li Yerusalem, tubayama'oma notoimie ma pongo matui pomeilu'e. ¹⁵ Pa too-too injeine labai namabo, aime sanu li pikiranomie pa diapa o'tolu jama'onye, ¹⁶ Tapi, injeinoma sanu pinelua'omae la'emaei Nabi Yoel: ¹⁷ Injopa, watu ele-eleo pongopusonye a'sanu mebali, Allah negombo'e: Pa Lia'e monjuana'e Roh-E kangkai jojoo manusia. ma unga-aungaame langkai ma unga-ungame bengkele mogutu nubuate, ma unga-unga molumbaame me'e i'to ponyilige, ma too-too meisi li antaraame ,mongupia'e upi-upiong. ¹⁸ Aiyo'e teule, antage hamba-hamba'e langkai ma hamba-hamba'e bengkele watu ele-eleoma'e injoo'e, ma'u juana'e Roh-E, ma jimo mogutu nubuate. ¹⁹ Injopa, ma'u popoitaa'e mujisat-mujisat li golung, li tuhunye, ma tanda-tanda ajaipe li juniaa, liyangkoponye, laa ma nu api, ma luungge, obol. ²⁰ Eleo nobali'e mebali o'nopang ma nu hulange mebali laa, laupe eleo nu Siopu sanu giombang ma sanu mulia modua'e. ²¹ Injopa a'sanu mebali, tunggalu sotoo sanu moleba tope nu Siopu nosalamata'e."' ²² "Hey too nu Israel, peilongoa'a pegombo'o'e injeine. Yesus, too nu Nasaret, too sanu nanyatame lin antaramie lantarane Allah kangkai so'al-so'ale ajaip, mujisat-mujisat, ma nu tanda-tanda, sanu pinmopo'itaa'ome nu Allah li antaramie la'emae Liio, aime sanu notoimime. ²³ Injeinei Yesus, sanu sinarakane monuru'e rencana sanu tinantua'ome ma popo'otoinu Allah ulenge luulumae, pinateangomie kangkai nonyalipe-Io la'emae umbungu too-too durhaka. ²⁴ Tapi, Allah nobangkita'e Liio, mailapasa'o-Nye la'emae penderitaan nu maut lantarane labai mungkina antage-Io nokuasai nu sanu mate. ²⁵ Pai, Daut pernaame negomboa'e tentaangei Yesus, 'U i'to Siopu a'daange taruse li tolo'e, lantarane Io a'daange li sebia moanongo'e injoma lia'e labai magaade noihu'a'e. ²⁶ Lantarane injoo'a, nyaa'e madandalane, ma nu oyo'e o'lo-loa. batangano'e teule momoiya lilalongu poranuange, ²⁷ Pa Li'oe labai molinjo'i jiwa'e a'daange li juniaa nu too mate, ma labai notubayaama batanganu too mo kuduso-Me me'e i'to sanu mebinasa. ²⁸ Pineilua'omome kangkai lia'a jalange mo o'tuhu. nopogutuu-Me meege tutuua lia'e kangkai rupaa-Me.' ²⁹ Sounga-unga'e, lia'e mayakina megomboa'e kangkai li'eme tentaange siamanu sioputomae luulu, oi Daut, pa io nateme ma kinuhur, ma kuhuronye ulenge a'daange kangkai li'ite dua'e eleo injeine. ³⁰ Jadi, lantarane io injoo'e sotoo nu nabi ma mo'otoi onjo Allah nojanjime kangkai sumpah kangkaiio untuke medungko'a'e sotoo la'e keturunani Daut li babo'u tahta-Nye. ³¹ Lantarane injoo'a, oi Daut sanu ne'e i'to so'ale injeine luulumae, io negombo'e tentange kebangkita nu Kristus pa: Io labai nolinjo'i li juniaa nu too mate, ma batangano-Nye labai me'e i'to sanu mebinasa.' ³² Injeinimei Yesus sanu binangkita'u Allah ma li'ame jojoo nu sabi tentange so'ale injoo'e. ³³ Lantarane injoo'a, la'emae inapangkata'e la'e umbunge moanongu Allah ma nonarima janji la'e Siama tentange Roh Kudus, Liio nonjuana'omaime, nuga sanu initomie atau ilongo. ³⁴ Pai, Daut labai nomene'e surgama'e, tapi ambo-ambo'onya nomeilu, "Siopu negombo'e kangkai Tuano'e, 'Podungko'ome li sebia moanongo-E, ³⁵ dua'e Lia'e mogutu musu-musu'ome mebali pongumpagangu bibisoome."' ³⁶ "Lantarane injoo'a, tubayama'oma jojoo labongu Israel mo'otoi matantu onjo Allah nopebali-Io Siopu ma nu Kristus, injeinimai Yesus sanu sinalipomie." ³⁷ Watu jimo no'olongo so'ale injeine, aime sinusu'a nyaa nu jimo, injopa negombo'e kangkai Petrus ma nu rasul taninye, "Sounga-unga, nuga sanu haruse nopogutumame?" ³⁸ Injopai Petrus negombo'e kankai jimo, potoba'oma ma pe'i baptisa li'eme sotoo-sotoo li lalongu topeni Kristus Yesus untuke mongampuni dosa-dosamie, injopa bli'eme monarima karunia nu Roh Kudus. ³⁹ Pa nu janji boi untuke li'oe, ma unga-ungaame, ma untuke jojoo too sanu ulenge agaale, o'gootonye sanu Siopu Allah li'ite molebama'e-Io." ⁴⁰ Injopa, kangkai goote pegombo'e taninye, oi Petrus nonyabia'e tu-tutuu ma neloa'e kangkai jimo, pineilunye, salamata'a li'oe la'e turunane sanu mebengko'e injeine? ⁴¹ Too-too sanu monarima pegombo'i Petrus binaptis ma watu eleo injoo'e tinianange o'gootu jimo sekitare tolu lihu jiwa. Po'osounangu Too-Too Momaracaya ⁴² Jimo tu-tutuu lilalongu pangajaru rasul-rasul ma lilalong po'osounang ma monanabile roti ma mesusuyang. ⁴³ Injopa, o'hehule nodua'e kangkai tungalu sotoo ,ma goota so'ale ajaip kangkai tanda-tanda sanu nebali la'e nu rasul. ⁴⁴ Jojoo sanu nomaracaya nelinsonge kangkai ma na'agaade bagiana'onye singkaiyane. ⁴⁵ Injopa, jimo nobalu'e harta nu ambo-ambo'u jimo, injopa notilala'e kangkai jojoo too, sesuai sanu noparlua'u ambo-ambo'e. ⁴⁶ Tunggalu seeleo, kangkai mo'osounge nyaa jimo melinsonge kangkai li Bait Allah ma mona-nabile roti lilabo-labong. Jimo nonarima po'inangu jimo nadandalane ma nasanange nyaa, ⁴⁷ Kangkai momuji Allah, injopa jimo seilunu too goote. ma, tunggalu seeleo notianinu Siopu o'gogootu jimo, injoo'ume too-too sanu nosalamata'e.