¹ Lilalongu buku sanu tinuliso'e watu injoo'e, Teofilus, tentange jojoo sanu pamula pinogutu ma inajara'i Yesus, ² dua'e eleo watu Io inengkate, nopuse nombee parinta Io, la'emae Roh Kudus, untuke rasul-rasul sanu pinileango-Nye. ³ Kangkai jimo, Io teule nopo'itaa'e ambo-ambo'o-Nye kangkai jimo e'endenye apampulu eleo injopa nomeilua'e tentange Kerajaan nu Allah. ⁴ Watu ulenge kangkaia jimo, Io nomarintaa'e balabai nolinjo'inu jimo Yerusalem. Tapi medaange janji nu Siama, sanu pineilu-Nye, "Ilongomima la'e Lia'e, ⁵ Pai Yohanes nombaptise kangkai ogo, Tapi labai meende la'emaeine li'eme no baptise kangkai Roh Kudus.'" Yesus Teengkate Surgama'e ⁶ Lantarane injo, Watu nelinsonge kangkai, jimo no'utanya kangkai-Io, Siopu, Bai watunyoma injeine Lioe mopoitaa'e kerajaan untuke Israel?" ⁷ Io negombo'e kangkai jimo, "Labai bagianoma untuke mo'otoi tentange watu ma nu jamane sanu tinantua'onyomaime nu Siama lilalongu Kuasa-NYe. ⁸ Tapi, li'eme monarima Kuasa onjo Roh Kudus modua'ome kangkai'oe ma li'oe mebali sabi-sabi'E li Yerusalem, jojooma'e li Yudea, Samaria, ma bagianoma'e nu tampa'u juniaa pongopusonye." ⁹ Injopa, nopusoma'e Io nomeilua'e so'al-so'ale injeine, ulenge pepese momatase, Io teengkate ma luunge nongkoni-Io neilange la'e penyiligu jimo. ¹⁰ Injopa, watu jimo ulenge si'esilige golungoma'e Io lalampame, siligoma'a, a'daange dotoo langkai papakeane memease o'olo li jeinu jimo, ¹¹ Injopa, negombo'e, "Hey too nu Galilea, inoga li'eme si'e'olo ma monyi-nyilege golungoma'e? Injeinei Yesus, sanu teengkatome la'e antaramie surga ma'e ma modua'omae babalii kangkai cara sanu selilio aimeli'eme ne'e i'to-Io nelampa surga ma'e." Momile Sotoo Rasul Bou ¹² Nopusoa'e injoo'e, jimo nongulele Yerusalem moma'e, la'e punsunggu sanu tinopea'e Zaitun, sanu mense'oma'e Yerusalem. A'agalonye sepelampange Sabat. ¹³ Watu jimo nensio'oma'e jimo nomene'e ruangane li babo'onye, pomoiyangu jimo. Petrus, mai Yohanes, mai Yakobus, mai Andreas, Filipus, mai Tomas, Bartolomeus, mai Matius, Yakobus ungani Alfeus, mai Simon too nu Zelot, mai Yudas ungani Yakobus. ¹⁴ Jimo jojoo no'osounge nyaa tu-tutuu lilalongu pesusuyangu jimo singkaiane bengkele. mai Maria, siinani Yesus kangkai soungango-Nye. ¹⁵ Boi se'eleleoana'onyoma'e injoo'e, Petrus u'noloa'e li tatanganu soungange se'imane ( o'gogotonye kira-kira magatusema dompulu too ), ma negombo'e, ¹⁶ "Sounga-unga'e, Kitap Suci haruse nogana'i, sanu ginombo'a'ome nu Roh Kudus la'e ngangani Daut tentangei Yudas, sanu mebali topo mimpine antage too-too sanu mela'opei Yesus. ¹⁷ Pa io terekenge li antarate ma na'agaade bagiane lilalongu pelayanane injeine. ¹⁸ A'alaine, too injeine nongolime so'ompola petu kangkai tambo la'e a'jaaonye, injopa nopusoma'e ba'inye nanahu luulu, antage tanganu batanganonye nebiase, ma jojoo isinu ompongonye ne pusasi. ¹⁹ Ijopa so'ale injeine inotouangome nu jojoo too sanu nomoiya li Yerusalem injoma petu injoo'e lilalongu bahasanu jimo no tope Hakal Dama, Antu'onye, 'Petu Laa'. ²⁰ Pa, tinulisome lilalongu Kitap Mazmur: 'Tubayama'oma pomoiyangoye mebali mogolintoo'e, ma tubayama'oma ampio'e labai a'daange sabii sotoo sanu momoiya lii'e,' 'Tubayama'oma too taninye mongaade jabatanonye. ²¹ Lantarane injo, too la'e jimo sanu kalepu a'daange kangkai li'ite e'ende nu Siopu mensio'e ma meluange la'e antarate, ²² Nompamula la'e baptisani Yohanes dudua'e eleo watu Io inengkate la'e antarate, sala sotoo la'e jimo injeine haruse mebali sabi tentaange a'bangkito-Nye ngkai li'ite." ²³ Injopa, jimo nongusula'e do too, oi Yusup sanu notope oi Barsabas, ma notope teule Yustus, mai Matias. ²⁴ No'uma'e, jimo ne susuyange, "Li'oe Siopu sanu mo o'toi jojoo nyaanu too. po'ita'omae kangkai liama o'iga li'antara do'too injeine sanu pinileango-Me. ²⁵ Untuke monarima tilale pelayanane injeine ma jabatanu rasul, la'ei Yudas sanu nonyampange untuke nelampa pomoiyangonyoma'e ambo-ambo'e." ²⁶ Injopa, nu rasul le nongundi untuke monantua'e o'iga li antaranu jimo sanu nopilei, injopa undiane nanahu antagei Matias injoma io irekena'e kangkaima'e sompuluma sounge rasul.