¹ “Now lainowmma ang na tek enni kown, nami ra e kow iowng mih hawm tawngmi chabak mih dow, Thurai pren dow lowra chang lami hai lawm na uang ting kown mih khi büah dowi mowr dow na kowng dowi kown mih uowi” pa tek khai. ISU POWM TAKLOWI MIH ² Hanow taruk nih kung kowi Isu Peter ,Jakop hai Johan ün dow hung kroma kowi hawlah now amatni kowi chataih khi dowi iawng hai awr pün la khai, amatni pur kowi dow apowm tüng krang uang ta klowi khai bowt chekhai. ³ Aia khupdip tawngklai kowh lainowmma kaw khai, lusa kowikow uan chukmiuüa ngam naiawng khowt kaw nowngia chuah dowi tham chekhai. ⁴ Now Elija hai Mosi iüah dow amatni tute uang tatüng khai; Isu amatni hai ta lawp büah khai. ⁵ Peter dow Isu kowi tek pe mih, tüngsang mih, makowi anging uowi kown mih iung khowk; En uüi lowk, Mosi uüi lowk, Elija uüi lowk anging thawp teh sumbuk kown. ⁶ Kram büah khai rakowi na tek kown mih ma paw tuk büah dowi chekhai. ⁷ Now uangnim mih dow amatni kowi dow uang tungah khai, uangnim dawng hown aklow uang tün khai; “Mami ang chapa, ang lang sakrau mih chekhai, aiamat laiklow sünta büah diah”. ⁸ Hanow alenma aiamat ria ret kowi mü büah khai, amatni dawng kowi dow Isu aiamat lowk chah klen kowi dow mia paw akeng mih kowi khi büah dowi bowt chekhai. ⁹ Hung hownia uang iu dowm hanow, maru chapa kow kowng miuüa pungma dawng kowi hown awr rü dowi mowr dow amatni khi mih lup ün miaiawng mih kowi na tek dowi kownkow tekpe khai. ¹⁰ Hanow kowng miuüa pungma dawng hownkow awr plan rü pami dow matawng mih krang chekhai chow pa dow cham tatek büah reng kown. ¹¹ Aiamat dow, ”Matawng iawngmi krang chow Ari-arow tüngsang miuüa dow, Elija na rik uang kown tek chekhai” pa büah khai dow? pa dow Isu kowi dow lünta ah büah khai. ¹² Now “Elija dow owmra akümma asar na thawp kownkow uang rik uang khowk hanow, matawng plawng kow chow Maru chapa mih ngare ahuma kham hai maru kawm na suiah kown chekhai pa mih ruiah mih chekhai; pa dow Isu klangah khai. ¹³ Nachenganchepaw ang tek enni kown, Elija dow naiawng hai na uang kown, aia satang ruiah büah ngengche khai iawng dow Isu kow lowra lup hai tüngsangra hailawm aia lukkowi amatni nau iawng changah büah khai bowt chekhai. ¹⁴ Now Tapeuüa tute uang büah khai, amatni ria ret kowi maru kawmma dow kowh khi büah khai, Ari-arow tüngsang miuüa hailawm hawt ta iüah büah khai. ¹⁵ Aiamat dow khi büah khai hanow maru maiow dow kaneuma awda büah khai; aia pra kowi uang iowm hanow uang howrah khai. ¹⁶ Aia dow amatni tute, ”Maün mih matawng lawnguan kowi chow enni hawt taiüa khai?” pa dow lünta ah khai. ¹⁷ Maru pungma dawng kowi lowkia mih dow klangah khai, ”Tüngsang mih, ang chapa kow lai puk dowi mih süngnam kup pe kawlak mih nowngia lai dowi chekhai, en tute ang uang pawla mih chekhai chaw. ¹⁸ Khümah mih sarui kowi nawt taah reng khai, kria pawp ün lawt khai, aia iüng ün krit khai akhawtma aia kow iowng khai; En tapeuüa kowi na prüt ta kown mih ang tek pe khai, na chepaw nowngia büah dowi chekhai. ¹⁹ “Isu dow aia tapeuüa kowi klangah khai, aw owmdowi miuüa low, mün khowt tak chow enni tute ang na uowi kown? mün khowt nih tak chow enni kowh dik ang na kur kown chow? Now,ngeuuüa kowi ang tute uang paw lah ma diah”. pakhai. ²⁰ Now atapeuüa mih ngeuuüa kowi Isu tute uang paw lahpe khai, süngnam sürlawk mih dow aia kowi khi hanow ngeuuüa kowi dow akürma betah khai, now krawng kowi tim khai, nawr hownia kria pawp iar khai. ²¹ Apa kowi dow, “Mün ni khowk chow mih ngeuuüa maiawng uowi mih?” pa dow Isu lüntaah khai. ²² “Ngeuuüa pa mih dow asowm chow hownia Maih kowi ün aiamat kowi na kowng ta kownkow atungma kuakah khowk; nachenganchepaw en mih sana sakrau mahai nowngia iung kown mih khowng ang diah” pakhai. ²³ Isu mih aia tute,”En owm khai hanow bowk bowk nowngia chang” pakhai. ²⁴ Now ngeuuüa pa mih dow,”Ang owm chah, ang kowi owm dowi iawng hai hang kow tuak ang diah” pa dow awr pla khai. ²⁵ Maru kawmma akatsang uang iowm büah khai mih khi hanow lümla sürlawk kowi dow nangah khai,”En lai phuang dowi mih lümla, ang pe en alow khai; mih ngeuuüa kawlak hownia awr lawt hanow, aia kawlak kowi dow kat paw hang uang kup tham” pakhai. ²⁶ Awr pla hanow akürma petla now aia kawlak hownia dow uang awr lawt khai; neuuüa dow kowng iawng taibowt uowi khai, maru kawmma miuüa ngam dow, ”kowng khai bowt chekhai” pakhai. ²⁷ Tarapchedow Isu aia kowi dowk pe rut hanow krüngah khai, now aia dow uang awr ia iowng khai. ²⁸ Hanow Isu dow kim kowi kup khai,atapeuüa dow,”Matawng plawng kowh chow nami lai phuang dowi mih lümla kowi anging ia prüt dowi dow?” pa dow aiamat lowkchah khe lüntaah büah khai. ²⁹ Aia dow Thurai chup hai chataih dowi hanow, akeng mih tawng paw ia chang dowi chekhai. ³¹ Now na hownia dow Isu Galili pren iawng hai mang khai, mia paw tuk dowi kownkow aia nau khai. ³⁰ Nachenganchepaw aia tapeuüa kowi dow sangah khai, amatni tute dow, ”Maru chapa kowi dow maru rut kowi naap taah kown chekhai, na paw ta pe sak kown chekhai. now aia kowng kung kowi sum ni khe na awr rü iawk kown” pakhai. ³² Nachepaw aia tek laiklow mih auan tukta büah dowi, Isu kowi kowh hing lüntaah kown mih kram büah khai. ³³ Hanow Isu hai atapeuüa Kapernaum kowi uang khai; kim lak kowi uang now amatni tute ,”Tiama rawng kowi khe matawnguan kowi chow enni taiüa mih dow? pa dow lün taah khai. ³⁴ Tiama rawng kowi dow a-i pungma dawng kowi mia chow langkri kown mih pah ta iüa khai, nami rakowi rarim raramma uowi büah bowk khai. ³⁵ Now Isu dow chowm hanow, lai preia mih tapeuüa kowi dow hawah khai; “Amia iawng mih chow rik uowi kown nau mih dow, nami bowk bowk kung kowi na uowi kown now bowk bowk kowi na ming na khet kown chekhai, pakhai. ³⁶ Hanow ngeuuüa sowmlowmchah mih kowi uang pawla khai, amatni pungma dawng kowi dow pa iowngah khai hanow aia kowi paiah now tekpe khai, ³⁷ “Lowra maru ang ming rakowi naün mih ngeuuüa sowmlowmchah lowkia kowi howrah mih dow ang kowi howr ang mih chekhai; lowra maru ang kowi howr ang mih dow uang chin ang mih kowi howrah mih chekhai” pakhai. ³⁸ Johan dow, “aw tüngsang mih, amiaiawng mih chabak dow en ming hai prüt süngnam mih anging khi lowkia, anging tute uang tawi kown nau dowi rakowi anging hangah khowk diah” pa dow tek pe khai. ³⁹ Tarapchedow Isu tek pe mih, "hang kowh hangah büah diah, amai iawng mih paw ang ming hai awdara lup chang kowh krawi piakta ang ming kown mih uowi dowi. ⁴⁰ Nachepaw ang kung pra kowh na dowi , ang pra tangi mih taih chekhai. ⁴¹ Lainowmma ang na tek enni, Krista maru enni na khai rakowi na kham kown mih tui pa bia chow pe enni paw, awmrawm sung mih nowngia tama dowi bowt tham chekhai. ⁴² “Langsowm nowm mih ngeuuüa ang kowi owm mih, miaiawng mih chü amatni owmra piakta pe khai e dow; amatni ngawng kowi kawm di küamüa hua aiuk mami awk pe hanow, satatui kowi kuak ta khai e dow aia uüi na lang iung rowt kown chekhai”. ANGAK NACHANG KOWN KOWH PUANRA ⁴³ - ⁴⁴ En kow rut ngak pra pawla en hanow dung ta diah; rut pre uowi hailawm maising kankowi kowh maih hai na kam lak e dow uaing sepa mahai en chowng kowi uowi mih na langiung rowt kown chekhai. ⁴⁵ Now en kow klowng angak pra pawla en hanow dung ta diah; khawk pre buk hai maih sing kan kowi uowi kla mih lake dow khawk dung mahai en chowng singra kowi na uowi kown mih langiung rowt kown chekhai. ⁴⁶ En mik paw angak pra paw lah en hanow, lai taah khai diah. ⁴⁷ Mik pre uowi hai mai kan kowi uowi lake dow mik papra chow hown Thurai pren kowi kup mih en uüi na langiung rowt kown chekhei. ⁴⁸ Maising kan kowi tiawng chow dung kowng dowi, naiawng dow mai akat paw mit dowi chekhai. ⁴⁹ Lawngtowng büarüa kowi awisa ik iawng hai mai hai na nowngia kam kown. ⁵⁰ Awisa mih kaneuma ih khai, nachenganchepaw awisa mih aia ik mih uowi dowi e dow ,matawng hown chow nakut planih ah iawk kown chow? Enni matia mih awisa iawng uowi diah, taking tasang büah hanow thaulangma uowiah büah diah, pakhai.