MASI KHUA LAWNGUAN ¹ Awr rü hanow, na hownia dow Judai pren kowi hai Jordan pai pra pown kowi ün kowi khai; maru kawmma uang tawi krawi iüalua khai. aia changah iawng hawt tüng sangah khai. ² Pharisaiuüa na chaing kownkow aia tute uang büah khai, ”lowkia mih hua a masi kowi na khuaah kown iung bow?” pa dow Isu kowi lüntaah khai. ³ Aiamat dow, “Mosi dow matawng iawng chow pe lah enni alow khai?” pa hawt klangah khai. ⁴ Amatni tek mih dow, ”Mosi dow takhua talan kown mih cha ruiah hanow, nowngia takhua talan kown.”pa khai. ⁵ Tarapche dow Isu mih Enni saktuak akhawtma rakowi nami a low dow enni uüi rui mih pape khai. ⁶ Nachenganchepaw uan uown thawp hownia Thurai mih kachakuüa hai masiuüa kowi thawpah khai. ⁷ “Nami rakowi kachakuüa dow a-u hai a-pa kowi na towah hanow aia masi kowi na dowk kown. ⁸ Hanow amatchi preia dow pabuk panga sang na own bowt kown, preia na dowi bowt tham; pabuk panga sang own rowt iüa kown chekhai. ⁹ Thurai dow tawm pe sutawng khai bowt rakowi amatchi dow hang cham taprai lah pakhai. ¹⁰ Kim kowi tapeuüa dow na ün mih lawnguan Isu kowi kut plan lün taah iawk khai. ¹¹ Now aia dow, ”lowra maru aia masi kowi khuaah kowh, akeng mih masi kowi paw hanow aia masi lukkowi changiang mih chekhai. ¹² Masiuüa paw ahua kowi praiah kowh akengmi tute cham pün khai hanow, nami dow ahua lukkowi changiang mih chekhai. ¹³ Now, aia na towpah kown kowh aia tute ngeuüa sowmlowm chamiuüa kowi uang paw lah büah khai, tarachedow atapeuüa dow hawt nagah khai. ¹⁴ Nachengachepaw Isu dow khi hanow mapaw sak i dowi chekhai, atapeuüa kowi dow, ”Ngeuuüa mih ang tute uang pe uang a hang kow hang büah diah,Thurai pren dow maün mih uüi na chekhai.” ¹⁵ Lainowmma ang na tek enni kown, Thurai pren dow ngeuuüa iawng howr dowi mih sarui, miaiawng mipaw Thurai pren kowi ia kup dowi tham. ¹⁶ Amatni kowi dow paiah khai, amatni lukowi tang pe rut hanow peah prasi khai bowt. ¹⁷ Now aia dow kut plan lawt hanow tiama iawng mang khai, nami khin khe maru lowkia uang iowm khai hanow aia pur kowi uang tatüng khai, ”tüngsang mih achowngma singra nowngia ka lah kown mih matawng chow ang na chang kown? pa dow uang lün taah khai. ¹⁸ Isu dow aia kowi, ”Matawng plawng kowh chow en iung padow tek ang khai chow? Thurai klen kowi miaiawng mipaw iung mih uowi dowi”. pape khai. ¹⁹ Alow pekün en tuk na dow bow,b”Hang paw maru sak, hang changiang, hang ku, dailai hai hang chawktawk maru, hang puan, en u hai en pa kowi ringkawah reng diah”. ²⁰ Aia dow, ”tüngsang mih naün mih dow ang sowmlowmchah hownia kowh ang chün reng mih chekhai” pakhai. ²¹ Isu dow aia kowi achangma hai müah hanow tekpe khai, en changah dowi mih uowi pachap tak, en kow dawngthawng uan kowh sumah hanow, ngarai miuüa kowi peah diah; nahanow, mukuang pren kowi en na ka dawngthawng uan kown chekhai, khanow ang kung uang tawi krawi diah pakhai. ²² Nami laiklow rakowi dow kaneuma aia tamawn la se mang khai, tawng plawng kowh chow panow aia kow dow tangka pawisa ahuma uowi khai rakowi chekhai. ²³ Hanow Isu dow aia ria ret kowi krawi mü hanow, atapeuüa tute dow, ” kureng miuüa tute Thurai pren na kup kown mih kaneuma krat khai” pakhai. ²⁴ Now tapeuüa dow aia laiklow ta hanow lainowmma awda büah khai; nachepaw Isu amatni kowi dow klangah khai iawk, “CHauuüa low, dawngthawng uan ahuma mih dow Thurai pren kowi na kup kown mih kaneuma krat khai”. ²⁵ Thurai pren kowi kurengmiuüa na kup kown mih lake dow kap kua kowi ut na ia kup kown mih lang ia rowt kown chekhai. ²⁶ Nowm nowm awda büah khai,” naiawng chekhai hanow mia chow lawngra kowi na nowngia kala kown?” pa büah khai. ²⁷ Isu amatni pra kowi müah hanow,Thurai chataih dowi hanow; maru na changah kown mih ia dowi chekhai nowm, natarapche dow Thurai changah kown mih lowra nowngia chang mih chekhai. ²⁸ Peter dow aia tute, ”Sün ta,anging lowra towta hanow en kung anging tawi” pa hai tekpe khai. ²⁹ . Isu dow hai klangah khai, ”Lainowmma ang na tek enni, lowra maru ang matia rakowi hai satangiung rakowi kim-iüa,tanauuüa, u-pa, chauuüa ün, krawng-bawn ün ta tow ta mih dow lusa kowi uowi khin khe kawm mowr naka ngengche kown chekhai.” ³⁰ . Aia kow kim, taima, nauma ün, u chepaw, chauuüa ün hai krawngbawn ün bowk na plan ka kown now, achowng mami singra na kakown chekhai. ³¹ . Nachenganchepaw maru kawmma mih rik uowi amüng achük miuüa dow akung mowichah kowi na own kown now, akung mowichah kowi uowi mih dow amüng achük kowi na uowi kown chekhai. Isu mih dow sum kat aia kowng lawnguan kowi tek khai. ³² Now Jerusalem na awr pün kown kowh tiama kowi dow mang büah khai, Isu dow rik mang khai, amatni dow kaneuma awda büah khai; aia kung tawi miuüa paw kram büah khai. Isu dow lai preia uüa kowi aia lukkowi lup na uangting mih maiow dow tek pe khai. ³³ Sün ta büah Jerusalem kowi a-i na kakowi kown, Maru Chapa mih uamakriuüa hai Ari arow tüngsang miuüa tute na apta kown chekhai, amatn dow kowng mowr pat aia kowi napeah angak kown, now Jentaileuüa tute naap ta kown chekhai. ³⁴ “Amatni dow na renah kown, lumowr kowi na thawkpe kria kown, na tepah büah hanow na paw pe asak kown; chepaw sum ni kung kowi na awr kut rü iawk kown” pakhai. ³⁵ Jebedai chapa preia Jakop hai Johan iüah dow aia tute uang hanow, ”Tüngsangmi anging nau iawng en tute na lü kown mih sarui mih en na chang anging kown anging nau khai” pa büah khai. ³⁶ “Enni nau iawng? matawng chow ang chang enni kown?” ³⁷ Amatni dow, ”En kraingra kowi dow en hawmlawm pra kowi lowkia lakuai pra kowi lowkia chowm anging diah” pa klangah khai. ³⁸ Isu dow amatchi tut e tawng chow uang lü mih enchi tuk dowi chekhai. Ang nakhamah kown mih Bia hown enni paw tawi nowng kham kown bow? now Baptisma ang chang kown mih enchi na tawi nowngia chang kown bow? pakhai. ³⁹ Amatchih tek mih dow, ”Ang na kham kown mih bia hown enchi na tawi nowng kham kown taih hanow Baptisma chang kown paw natawi nowng chang kown”. ⁴⁰ Nachenganchepaw mia iawng mih kowi chow ang hawmlawm pra kowi chepaw lakuai pra chepaw na chowm enchih kown mih dow ang alow iape dowi chekhai, pakhai. ⁴¹ Akeng mi tapeuüa hamütia mih dow nami ta büah hanow Jakop hai Johan iüa luk kowi sak i dowi chekhai. ⁴² Isu dow amatnni kowi hawah khai hanow Jentailuüa lukkowi na chet tara kown mih khowmah büah khai, amatni lukkowi kaneuma kri büah khai, amatni kow maru iukuüa ün paw amatni lukkowi kaneuma alow khawt reng pa mih enni tuk. ⁴³ Nachenganchepaw enni pungma dawng kowi dow naiawng chang dowi tham chekhai, lowra maru enni dawng kowi langkri mih nachowng kown nau mih dow enni chintakmi kowi na uowi büah kown chekhai. ⁴⁴ Now lowra maru enni pungma dawng kowi langkri mih na chowng kown nau mih dow, maru maiow nar kowi na uowi bowk kown chekhai. ⁴⁵ Maru Chapa mih na uang ming khet kownkow uang mih chekhai, nachepaw maru kawmma klanmüa na chowng kownkow aia sak na uang pe kowkow uang mih chekhai, pakhai. ⁴⁶ Now Jeriko kua kowi uangting büah khai, Isu mih aia tapeuüa hai maru kawm kraingma hailawm Jeriko hownia dow lawt khai, Timai chapa Bartimai dow lu lükra tiama kowi hawt chowm khai. ⁴⁷ Nazaret Isu chekhai pa mih tuk hanow, ”Isu David chapa, sana anging diah” pa dow akürma pla khai. ⁴⁸ Maru kawmma dow nagah khai, rarim raramma na uowi kownkow tekpe chepaw, lang tün rowt chekhai; David chapa, sana ang diah, pa dow haw ngamlam khai. ⁴⁹ Isu dow iowng hanow tekpe khai, mikdu mih kowi dow hawah khai,” Sak kraing mahai uowi hanow, awr rü diah; Isu haw en” pakhai. ⁵⁰ Aia dow uan ün ta kuak la hanow, lo se awr rü khai hanow Isu tute kowi khai. ⁵¹ Isu dow hawt klangah khai, ”Matawng chow en nau? en uüi tawng chow ang na chang kown? “Mikdu mih tekmi aw tüngsangmi ang khi kown nau” pakhai. ⁵² Hanow Isu dow mang taih bowt diah, en owmra en iun mih chekhai. Uang hing nowngia khi khai bowt, tiama rawng kowi dow tawi hing tawi khai bowt chekhai.