JERUSALEM KOWI KUP MIH ¹ Now Jerusalem uang ta tawn büah khai, Olive hung kowikow Bowifogi kua hai Bethani kua na ting büah kown khe dow atapeuüa pungma dawng kowikow preia mih chinah khai. ² Amatni kowi dow, ”Enni pur dawng kowikow kua kowi kowkowi hanow; kua kowi kup hai krowksang miapaw chowmah dowi tak mih kawrnga ramchük chah khuowkah mih enchih na khi kown taih, lat lah hanow uang hai paw lah" pa dow tekpe khai. ³ “Mia chünchü matawng plawng kachow naiawng chang kown pa enchih hanow? nami dow CHAKRAMANG lake khai; kawrnga ramchük kowi dow na uang plan towah iawk kown, ”pa iüah khai,pakhai ⁴ Hanow amatchih dow kowh kowi khai bowt, lowkmi kawrnga ramchük cha kim plawt hai atawn chow prang kowi khuowk ta hüa mi dow, kow khi iüah hanow; lat lah iüah khai. ⁵ Na kowi iowngmi alak kowi miaiawng mih chünchü dow hawt khiah khai, “Matawng rakowi chow kawrnga ramchük chah kowi enchih lat khai? Pa khai. ⁶ Atapeuüa kowi Isu krawi tek pe powmiawng dow katek pe khai now amatni kowi dow pemang ta khai bowt. ⁷ Now atapeuüa dow kawrnga ramchük chah kowi Isu tute uang pawla iüah khai, kawrnga ramchükchah lukkowi dow amatni kowh uan bepe büah hanow, nami lukkowi dow Isu kowi pa chowmah khai bowt chekhai. ⁸ Hanow Maru kawmmauüa dow tiama sak kowi amatni uan ün, tawngmi chabak dow amtni kowh krum hownia kow singmia ün tu ah büah hanow; beah büah khai. ⁹ Aia pur kowi rik mang miuüa hai aia kung kowi uang tawi miuüa dow, ”Hossana! CHAKRAMANG ming kowikow uang mih dow akiow pa cham uowi lah, ¹⁰ Pren na uangting kown mih, a-i pa David pren dow, rowsi kowi pa cham uowi lah, langkro mih kowi dow Hossana”pa dow haw büah khai. ¹¹ Now Jerusalem tempawl kakowi khai, aria ret kowi krawi mü bowk kung kowi dow sat paw kowi pra chekhai; lai preiauüa hai lawm Bethani pra kowi uang büah khai. THURAI CHUPKIM KOWI ISU KOW KUP MIH ¹² Nami ni kung kowi Bethani hownia uang büah hanow Isu dow hawm sakkrai khai bowt. ¹³ Alakma kowi uidut sing aram chak mami hai khi khai, kamü sing kownkow kakowi khaii; kowh ting khe dow aram klen kowi matawngpaw uowi dowi, tawng plawng panow iuih dut iuih khin nadowi chekhai. ¹⁴ Hanow Isu dow sing pra tau now, ”Kawmat hownia en iuih amaiawng mih paw chah dowi bowt tham. ”pakhai. Aia tapeuüa paw nami laiklow dow ta büah khai. ¹⁵ Now Jerusalem kowi dow uang büah khai, Isu Thurai chupkim kowi dow kup khai; tempul kowikow summiuüa hai ranmiuüa kowi dow lawt ta bowk khai, tangka phiakmiuüa salawn kowi ün towah hanow uatur summiuüa chowmra ün paw planta bowk chekhai. ¹⁶ Tempul kowi dow paw lah uan ün kown miaiawng mih kowi paw pe kowi dowi chekhai. ¹⁷ Now Amatni tute dow, ”Ang kim dow chaptowng uüi Thurai chupra kim na pape kown” pah ruiah mih na dow bow, tarapchedow enning mih ”Kukra kim chang lami chekhai” pa dow atapeuüa kowi tüngsangah khai. ¹⁸ Hanow Uama krimiuüa hai Ari-arow tüngsang mmiuüa laiklow ta büah khai, aia mat kowi dow na pawpe asak kown mih kamrüt büah khai bowt; aia tüngsang mih dow maru kawmuüa dow kaneuma awda khai rakowi aia mat kowi dow lainowmma kramah büah chekhai. ¹⁹ Sat kowi pra kowi dow marow hownia lawt khai bowt chekhai. ²⁰ Now rau e kowi mang iawlaw khai, iuih dut sing mih aprün hailawm kowng khowk pami khi büah khai. ²¹ Now Peter dow plan kut ka tuak khai, tüngsangmi ,”mü diah, iuih dut sing kowi en peah piati mih uang kowng khai bowt” pakhai. ²² Isu dow klangah khai, Thurai kowi owm büah diah. ²³ Lainowmma ang tek enni, lowra maru mami hung kowi mih, cham süt chamta sowi hanow satatui kowi dow khai e dow aia saktuak owmah dowi powm iawng uowi uowi dowi owm khai nowm hanow nami iawng dow na own kown chekhai. ²⁴ Naiawng rakowi ang na tek enni, enni chup Thurai mih hai lü mih sarui dow owmra hai enni ka khowk mi enni uüi na chang kown chekhai. ²⁵ - ²⁶ Hanow chup Thurai kownkow enni iowng mih khin khe paw akengmi maru lukkowi matawng laiklow paw uowi dowi now aia kowi dow lawtah diah; pa, mukuang kowi uowi mih na nowngia lawt kown pa khai. ²⁷ Now Jerusalem kowi dow uang plan ting khai iawk; Isu dow tempul kowi cham krawi len klawm klam khin khe uamakriuüa ün, Ari arow tüngsang miuüa ün hai lawngtang chah hawmuüa aia tute uang büah khai. ²⁸ “Matawng iawng mih lowk hown chow ma ün mih lup en chang? mia chow naiawng ün na chang kown mih pe en alow? pa dow lün taah khai. ²⁹ Isu dow uang klangah khai, ”lai pa nawr ang na lün ta enni kown, klang ang büah diah amia iawng mih low hown chow ma ün mih lup ang chang mih ang tek enni kown” pakhai. ³⁰ “Nahanow Johan Baptisma mih mukuang hownia kowh bow, maru hownia kow bow? sam tek ang madiah” pakhai. ³¹ Amatni hownia tatowng tapawng büah khai, ”Mukuang uowi mih alow a-i pah hanow, matawng plawng kowh chow aia laiklow enni owmah dowi? ”pa dow na tek enni kown chekhai. ³² Maru tute pah a-i plan tek edow? maru maiow mih dow Johan kowi risi na ngengche mih katuak büah khai rakowi maru kawmma kowi ün paw kramah khai. ³³ Hanow Isu kowi dow klangah khai, ”Anging tuk dowi” pa büah khai, Isu paw, ”Mia alow hown chow na ün mih alup ang chang mih ang nowng tek dowi tham” pakhai.