KIMKOWI UOWI MIH HAI CHANG LUP MIH LAIUAT ¹ Laiuat hai amatni tut tek laiklow khai bowt. “Miaiawng mih chünchü grep krum thawp khai hanow rumah khai, grep iuih petmüa kuam thai khai, achawng rah akroma chang pe kim lowk khai; akeng pren kowi aia dow chang lup miuüa tut tatowh lah now cham kowi khai. ² Amin khin uangting khai bowt hanow aia nar kakowi mih aphow na kow paw kown krum khet miuüa tute aia kow nar lowkia mih kowi uang chinah khai; ³ Now, amatni dow hawt khümah büah khai, tepah büah hanow, rut akhaw mahai pa mangah khai. ⁴ Akengmi nar amatni tut-e kow kut plan chin pe khai iawk aia kowi paw lu pik tatat pat hawt tepah khai hanow peah rukrai khai. ⁵ Now, akemg mih nar kowi plan kut chin pe iawk khai, nami kowi ngam dow hawt paw pe asak khai. Akeng mih nar ün kowi paw kow chin pe ngalam khai, tawng mih chabak dow tepah büah khai; tawng mih chabak kowi dow paw tape asak khai. ⁶ Hanow nachinah kown mih aia langsakrauah mih chapa chataih dowi hanow amia iawng mih paw uowi dowi bowt chekhai, aia langsakrauah mih chapa kowi dow naruüa tute achur amowi kowi pe kowiah khai, ‘Ang chapa mih kowi dow na hawt ring kawah bowt kown’ pa dow ka tuak büah khai. ⁷ Nachenganchepaw krum ming khet miuüa dow, “Nami na powng dawngthawng uan kown mih dow na khai, uang a-i kowng ta kown, aia na powngah kown dawngthawnguanmih a-i uüi na chowng kown taih” pa büah khai. ⁸ Hanow nami kachakuüa kowi dow khümah büah hanow, paw pe asak büah khai; grep krum hownia uatpra kowi cham kuak ta büah khai. ⁹ Nami kung kowi dow, ”Krumia dow matawngiawng chow na uang changah bowt kow? aia uang hanow krum ming khet miuüa kowi na uang mata bowk hanow, krum dow akeng mih maru kowi na peah kown. ¹⁰ Mami Thurai chah laiklow mih enni phat dowi bow? “laksamauüa nuatami hua che asung lang uowi khai, ¹¹ “Nami dow CHAKRAMANG Thurai chang mih chekhai, anging khi hanow lainowmma awda khai” ¹² Now nami laiuat laiklow dow amatni mih Isu kowi na khümah kown mih Isu dow lai uat hai tekpe khai, natarapchedow maru kawmmauüa kowi plan kram büah khai; aia kowi ta towlah hanow amatni dow cham powt büah bowk chekhai. ¹³ Hanow Aia tek laiklow mih kowi lai na tawi chünchü pa kowh aia tute Pharisaiuüa hai Herod kowi Isu tute chinah khai. ¹⁴ Aia tute uang büah hanow, “Tüngsangmi, maru nowm ma en na khai, Thurai tiama ching en tüngsang khai; amiaiawng mih kowi kram dowi hai, nachepaw maru matawng chow tek en mih laiklow hown dow hangka chetah diah. NowThurai laiklow ching en tüng en sang reng; Sizar kowi napeah amu kownmi taka tak bow? ”pa büah khai. ¹⁵ “Anging na pe en kown bow pe dowi tham bow? pa büah khai. Amatni puan mih krang dow Isu hawt tukta pe bowk khai, Matawng plawng kowh chow enni chaing ang khai? uang paw lah ang nguikhawi iun madiah ang hawt sam mü matak” pape khai. ¹⁶ Amatni dow uang paw lah pe büah khai; amatni tute Isu dow, “Mami mia ming hai mia rup chow uowi mih? ”pakhai, Amatni dow, “Sizar” pa büah khai. ¹⁷ Now Isu dow, ”Sizar kow uan dow Sizar kowi peah büah diah hanow, Thurai uan dow, Thurai kowi peah diah” pa dow klangah khai. nami laiklow dow ta büah hanow lainowmma awda büah khai. ¹⁸ Hanow Sadukia hawmuüa Isu tute uang now, “Kowngra hown dow maru kat paw awr kut plan rü iawk dowi bowt tham” pa dow lüntaah khai. ¹⁹ “Tüngsangmi, Mosi dow lowra maru chepaw kala chah dowi matchang amasi mih kowi ta kowng khai edow, aia masi dow aia tainau hai tachawng hanow aia tainauuüi na towpe aliukown chekhai” pa dow uang rui anging khai. ²⁰ Na chow, tainau uüa low, kachakuüa ranitia uowi büah khai; lang tamih paw masi khai, kala chah dowi kow kowng khai. ²¹ Nami hai taken mih dow chang lah masi khai, tow la aliu dowi matchang plan kowng khai iawk; sumia mih paw naiawng chekhai iawk. ²² Now nami tainau ranitia dow chang la masi bowk büah khai, chepaw mia iawng mih paw tow la aliu dowi; achur kowi khe nami masiuüa paw tawi kowng khai. ²³ Nahanow na awr plan kut rü iawk khe ranitiah kowi dow miaiawng mih masi chow na own kown? “Amatni ranitiadow chang la masi bowk büah chekhai rakowi”pa dow lün taah khai. ²⁴ Isu dow amatni kowi klngah khai, “Cha Laiklow hai Thurai lowra nowngia changla mi enni tuk dowi rakowi chekhai na dowi pra kowi enni cham mang büah reng mih? ²⁵ Na uang awr rü büah mih khin khe dow masi huaiu ta pün kown bow na ta lo kown bow, mukuang kowi kowh Kramamu büah iawng na own büah bowk kown chekhai rowt. ²⁶ Kowng miuüa na awr rü kown mih laiklow dow Mosi chabowih kowi, singplum kowi mai lün mih laiklow katpaw enni phat dowi bow? Thurai dow aia tute, “Ang mih Abraham Thurai, Isak Thurai, Jakop Thurai ang na khai” pa tek khai. ²⁷ Aia dow makowng Thurai na dowi masing Thurai chekhai rowt; kaneuma enni tama ta khai bow” pakhai. ²⁸ Ari-arow tüngsangmi, dawng kowi lowkia uang khai, amatni taiüa mih laiklow sün ta hanow, aklang iungma klangah khaipami tuk hanow aia tute , “Alow pek maiow kowi matawng mih chow langkri? pa dow hai tawi lün taah khai. ²⁹ Isu dow klangah khai, “aw Israel, sün ta, CHAKRAMANG a-i Thurai chataih mih dow CHAKRAMANG dow nami chekhai. ³⁰ Now CHKRAMANG en Thurai dow saktuak maiow hai, en singra maiow hai na sakrauah kown chekhai, pami lang pankri khai. ³¹ Pre kowi dow, “En matia en ta sakrau iawng en klowk chakuüa kowi paw sakrau diah”pa mih chekhai. Mami prebuk alow pek lake kow lang pankri rowt mih dow ma paw uowi dowi chekhai” pakhai. ³² Now Ari arow tüngsangmi paw, “Na nowm khai tüngsangmi, aiamat chataih klen kowi dow akengmi miapaw uowi büah dowi. ³³ Aiamat chataih saktuak maiow hai prengia maiow hai en kür-ra maiow hai sakraura now, klowk chakuüa kowi matia sakrau mih iawng ün pabukma tape mih hai rowsira maiow lake lang iungnowm mih chekhai pami kaneuma en tek mih na khai. ³⁴ Hanow prengia chakma m-iiawng klangah chekhai pah Isu dow tuk hanow, Thurai pren hai en tawn chataih bowt pakhai.Nami hownia bowt now lowra laiklow mia paw uam lün taah büah dowi bowt chekhai. ³⁵ Isu dow Thurai chup kim kowi tüngsang lah mi khin khe klangah büah mih dow, ”Ari arow tüngsang miuüa mih matawng iawng chow Krista dow David chapa na khai? ³⁶ Aiamat David chapa ngengche mih lümla sai kowi tekmi, “CHAKRAMANG dow ang CHALRAMANG tute, Ang hawmlawm pra kowi uang chowm diah, en ransuuüa mih khawkpha krüa kowi ang towah khai” ³⁷ Aiamat David ngengche dow aia kowi dow CHAKRAMANG pakhai, hanow matawng iawng chow aia chapa na own kown mih krang? pakhai; Maru kawm dow aia laiklow asowrma sünta khai. ³⁸ Isu aia mat tünsangra hownia dow amatni kowi tekpe mih ari-arow tüngsangmi hownia kaneu büah, amatni tarap chedow athawng mami tawnguat khupah hanow cham krawi len büah reng chekhai. ³⁹ Takuara kim kowi chowmra lang iungmi kowi hai pawi changra kowi chowmra langiungmi nau büah khai, now chi ün kowi paw tachup büah khai. ⁴⁰ Ma ün miuüa mih, mamaima kim bowk bowk mih khün tape büah khai; hanow maru na khiah krowngchah akrama chup Thurai khai reng miuüa mih ngare towra kowi na kham ngare nowm nowm kown chekhai. ⁴¹ Now akawk pekra tatawng mih rah e dow aia chowm khai, maru kawm miuüa dow akawk pekra kowi phang tangka thüm hawt khiah khai; maru kureng miuüa dow ahuma uang phang büah khai. ⁴² Now mamaima ngarai chah mih lowkia uang tawi khai, kri pawisa pre iun chow uang tawi phang khai; nami dow pa iun ingsap chow chekhai. ⁴³ Isu dow atapeuüa kowi hawah now, amatni tute, Lainowmma ang na tek enni akengmi maru maiow lake mamaima ngaraima mih akawk pekra kowi lang pe hu rowt chekhai padow tekpe khai. ⁴⁴ Nachenganchepaw akeng miuüa dow amatni ka klen kowikow maratmi uang phang büah mih chekhai, aia mih dow ka dowi mih luk hownia aia ka mowrchah mih maiow, aia sakrui tawmmüa na chang kownkow aia ka mowrchah mih uang phang mih chekhai, pape khai.