JERUSALEM NA PIAK KOWN MIH HAI ISU KUT PLAN UANG IAWK KOWN MIH ¹ Thurai chup kim hown lawt büah khe atapeuüa dawng kowi lowkia mih dow, “Tüngsangmi mü ma diah, hua ün, kim ün lainowmma klangiung khai! ² Now Isu dow, “Ma ün mih kim aiuk mami en khi bow? Huaklu lowk lukkowi lowk tatan dowi bowt tham, na piak bowk kown chekhai, pakhai. ³ Isu mih Thurai chup kim pur kowi Olive hung kowi chowm büah khe Peter, Jokop, Johan, Andrew uüa dow lang lün taah khai. ⁴ Na ün mi dow tawng nam khe chow na uang uowi kown? Na ün maiow na uang ting mih khin khe amatmüa khi hanow na ün mih uan uangtowm khai bowt chaw? pa dow tek ainging diah pakhai. ⁵ Hanow Isu dow amatni kowi klangah khai, “Kaneu büah, mia iawng mipaw na nowng puan enni dowi kownkow pe ching büah diah. ” ⁶ Ang ming na uang kham kown, “Ang Krista chabowt pahai maru kawm kowi dow na uang puan kown” pa dow tek pe khai. ⁷ Hanow tasen satang ün enni ta mih khin khe paw hang kow takrow büah diah; na ün mih dow na uang ting ngengche kown chekhai, tarapchedow akhin chur na dowi tak tham. ⁸ Now Chen lang hai chap lang na tasen hanow, chowlowkkow pren mang na tasen kown. Parah parah kowi lihowng na uang hanow khown na kuak kown chekhai; na ün mih kawm krat dow uanguown khowk pami chekhai. ⁹ “Enni dow kawmat kamrüt hown uowi büah. Takuara kowi hai tara chet miuüa tute na ap enni kown, na tep enni kown;Ang matia rakowi aluchauüa hai manguüa pur kowi,ang laiklow na tuk lah büah kownkow na pa iowng enni kown.” ¹⁰ Satang Iung mih chap maiow tute na rik tek kown chekhai. ¹¹ Now nakhüm enni kown, enni lawnguan kowi-e tara chetrah kowi na ap enni kown; enni na tek kown mih hang kowh rik tuak büah, nami khin khe uanting mih sarui dow enni na tek kown taih, natek miia dow enni matia na dowi tham, Lümla chekhai. ¹² Hanow tainau lala hai u-pa kowi kowngra kowi na apah kown; now chapa mih amtni u hai pa kingküa kown hanow sak paw na paw tape kown chekhai. ¹³ Ang matia rakowi maru ahuma na sui en kown; nachenganchepaw achur kowi patamtiaiawng mih chow nowngia uowi mih nanü miuüa ngengche dow lawngra na ka kown chekhai. ¹⁴ Now “Suiiai kaniai mami uan dow na chur tabowk hanow iowng mira kowi iowng mih enni khi khe tarapche dow na phat kown mi akrang pacham tuk lah, Judai pren kowi uowi miuüa dow hung kowi pa cham powt lah; ¹⁵ Now kim lukkowi uowi mih dow kim lak kowi na uang iu paw uan kown kow adak kowi hang pa iu dowm lah. ¹⁶ Hanow iüa kowi chat miuüa khup dliptawngklai pawla now kung pra hang pa uang plan lah. ¹⁷ Nami khin khe amuma mih hai chasowm uowi miuüa, na ün mih masiuüa dow uowi krang lainowmma na kawm kown chekhai. ¹⁸ Chungrau khe na uangting dowi kownkow chup Thurai büah diah. ¹⁹ Nachenganche paw nami khin khe dow ngare na uang ting kown.Thurai mih uown thawp krawng bawn hown kowh kawmat mowr e naiawng mih ngare kat paw uowi dowi tak chekhai, tawng nam khe paw kat paw hing phaw dowi tham. ²⁰ CHAKRAMANG dow na ün mih nih dow uang iu tow dowi e dow miaiawng mih paw na sing kown mih uowi dowi tham chekhai; nachepaw Thurai aia kloah mih maru rakowi dow Thurai mih ni na uang e tape bowt kown. ²¹ Nami khin khe dow lowra maru paw enni tute , “Mü ma diah, Krista dow ma kowi, mü ma diah, pai re pai, tek chepaw hang kow owm büah diah. ²² Krista hai Risi uüa na uang büah kown chekhai rakowi, Thurai klo ta khowk miuüa kowi paw na puanah kownkow amatmüa hai awdara lup ün na chang büah kown chekhai. ²³ Nachengachepaw enni mih kamrüt mahai uowi büah diah, lowra sia mih ang rik tek enni khowk chaw, pakhai. ²⁴ “Na ün mih ngare rawn khin khe dow sat na iu hanow, lama paw hing nowi dowi tham chekhai”. pakhai. ²⁵ Hanow Mukuang kowikow krek dow nadow bowk kown chekhai now, lama ün, sat ün, krek ün hai mukuang kowikow kür uowi mih maten na chü bowk kown chekhai. ²⁶ Nami khin khe dow Maru Chapa mih lowra nowngia changlami kraingra hai lawm mih mai dawng kowi na uang mih khi büah kown. ²⁷ Nahanow kramamuuüa kowi na chinah hanow, Thurai lang kloah miuüa kowi dow pren tali ting nui hown kowh krawngbawn achur mih hownia mukuang chur mowr maru kawm kowi na kua na lawmah kown chekhai. ²⁸ “Hanow, iuih dut singh uowi krang iawng sang büah diah; aram uang thawn mih khin now satma khin uangting khai bowt pami enni tuk chekhai” pa büah khai. ²⁹ Naiawng plawng dow, enni paw na iawng ün maiow na uangting kown mih dow enni khin khe aia dow kim plawt kowi uang ting khowk. ³⁰ Lainowmma ang na tek enni, na ün mih maiow uangting dowi tak mowr dow kawmat kow maru uüa tama dowi tak tham. ³¹ Krawng hai mukuang na tama kown chekhai, nachenganchepaw ang laiklow dow achowngma na uowi kown chekhai. AKHINHAI TUKAH DOWI MIH NIH ³² Nachenganchepaw, nami khin hai nami ni khe kowh laiklow amiaiawng mih paw tuk dowi; mukuang kowi kow Kramamuuüa paw tuk dowi, chapa paw tuk dowi, pa chataih tuk chekhai. ³³ Kamrütia ma how uowi büah diah, pe ching büah reng diah hanow chup Thurai büah diah; nami khin dow matawng khe chow uang towm kown mih tukah dowi tham chekhai. ³⁴ Now, Lowkia mih pamatia kim towlah now cham kowi khari khe aia naruüa tute amatni lup chang kown mih alow peah khai; kim plawt kang chawng mih kowi paw kamrüt ia ma na uowi la kown kow tekpe khai, naiawng hai nami ni dow na uang ting kown chekhai. ³⁵ Hanow naiawng rakowi, kamrüt mahown uowi büah diah, kimia mih dow iakpra chünchü, ni-e chünchü, ua ka khe chün chü, rau pra chün chü, nami dow hing tukah dowi chekhai. ³⁶ Amai sang uang mang khai hanow mui thüm khe na uang khi enni tarawng. ³⁷ Hanow enni tut-e ang tek mih maru maiow uüi ang tek mih chekhai, kamrütia uowi büah diah pakhai.