ISU NGERA MIH HAI KOWNG MIH ¹ Now pre ni kung kowi Takat pawi hai The pe tua dowi mih kawm pawi na uowi kown chekhai; uamakriuüa hai Ari arow tüngsang miuüa dow Isu kowi dow maru tuk dowi iawng hai na paw pe sak kown mih tiama kamrüt büah khai. ² Nachepaw chang pawi thüm mih ni kowi dow hang kow pa na lah, maru kawmma pungma dawng kowi pusara na uang paw ün tarawng, pa büah khai. ³ Bethani kim kowi Isu uowi mih khin khe huabia hown asung uowi mami sau uang pawla pekhai now, cha kown mih chowm khowk khe nami hua bia dowteuah hanow aia lu kowi klai pe khai. ⁴ Nami re kow uowi mih uüa dow sakhia lai kow tatek büah mih tawng plawng ka chow naiawng mih sau tuk iawm tow khai dow? ⁵ Now nami sau sum e dow nguikhawi sumkowm lake nowngia kakown chekhai hanow ngarai mami uüa kowi paw nowngia pene diah. naiawng tek hai nami masiuüa kowi dow nangah khai. ⁶ Hanow Isu dow, “Rarim mow uowi büah, Matawng plawng kowchow nami masiuüa kowi dow enni pusaah khai? Ang uüi kowi aia dow lup iungma changmi chekhai, pa dow tekpe khai. ⁷ Nachepaw enni pungma dawng kowi ngarai miuüa dow lowra mih khin khe paw uowi büah khai; nau mih khin khe amatni kowi dow nowngia khowng kown chekhai; natarapchedow enni pungma dawng kowi ang na uowi reng kown na dowi chekhai. ⁸ Aia nowng chang mowr mih dow chang khai bowt tak, ang kow na dup kown mih kamrüt dowi rawn khe Ang kowh kowi uang rik phawk ang sau mih chekhai chaw. ⁹ Lainowmma ang na tek enni, “Palusama kowi Satang iung mih cham tek büah mih sarui kowi, nami lup chang mih paw aiamat kowi na tukla reng kown tek büah mih chekhai” pakhai. ¹⁰ Now, lai preia pungma dawng kowi kow maru lowkia, Juda Iskariot mih Isu kowi na khümah kownkow tuak khai hanow uamakriuüa tute kowkowi khai. ¹¹ Nami laiklow dow hawt ta büah hanow kaneuma awmrawm büah khai, pawisa na peah kownmi khamah büah khai bowt, now Isu kowi na khümah kownmih krang cham büah khai. ¹² Hanow thepe tuah dowi mih kawm nih müng ni chük, Takat pawi kowi rua pur chah ngen büah reng khai, atapeuüa, “Matawng ra e chow takat pawi kowi hawm chah kown mih en uüi na kamrüt kown chow? en nau rakowi bow?” pa büah khai. ¹³ Now, tapeuüa pungma dawng kowi kow preia kowi chinah khai, “Marow kowi kowkowi iüa hanow, maru lowkia bawn puh hai cham towngtui mih na khi kown; enchi mih dow aia kung na tawi kown pakhai.” ¹⁴ Aia kupmi kimia kowi tute dow, ”Tüngsang mih dow, ang tapeuüa hailawm takat pawi hawm anging na chah kown mih matawng ra e chow? pakhai, pa dow kow tekpe iüah khai. ¹⁵ “Aiamat ngengche dow aluk krowng kowi aiukma mih kim na tüng enni kown, na kowi a-i uüi kamrüt büah diah” pakhai. ¹⁶ Hanow atapeuüa dow marow kowi kowkowi büah khai, now tek iawng hai khi büah khai; takat pawi hawm dow kamrüt büah khai. ¹⁷ Sat kowi pra kowi lai preia hailawm Isu dow kowkowi büah khai. ¹⁸ Amatni dow chowm büah hanow chah büah khai, nami khin khe Isu mih, “Lainowmma ang na tek enni, enni pungma dawng kowi kow lowkia,tawi ta iua cha hawmmi ngengche na pa khüm ang kown chekhai” pakhai. ¹⁹ Now, aia tapeuüa dow kaneuma tuakkrat büah khai lawngtowng büarüa aia tute,”Ang nami maru bow?” pa dow lütah büah khai. ²⁰ Isu dow, “lai preia dawng kowi kow lowkia, nami dow kawmat ang hown katsang tawi ta iua chah hawm khai” pa dow tekpe khai. ²¹ “Nachenganchepaw Maru Chapa na kowng kown mih arui rik uowi khai bowt ,nami iawng na kowng kown mih, Maru Chapa kowi na pa khümah kown miia dow uang tawi phuaru dowi panü aia uüi na lang iung rowt kown chadiah” pkhai. ²² Na iawng cha büah khe Isu dow kawm paw hanow, awmrawm laiklow tek khai now sekah khai, amatni kowi peah khai, “Paw büah diah, mami ang nga chekhai” pakhai. ²³ Bia paw dowk hanow awmrawm laiklow kitek kung kowi amtni kowi peah khai, bia kowikow mih dow amatni bowk bowk kham büah khai. ²⁴ Isu dow, “Nami dow ang Vi, sang bowk laitawmsar Vi, tawngmi chabak dow khükah khai now, nami maru hownia Thurai sang bowk laitawm sar nana kown chekhai. ²⁵ Lainowmma ang na tek enni, Thurai pren kowi asar ang na kham kown mih krang uang ting dowi mowr dow, Grape iuih tui mih ang kut plan kham dowi bowt tham. ²⁶ Now Meng ki tek büah kung kowi dow Olive hung pra kowi lawt büah khai bowt. ISU KOWI PETER TA DA TAMI ²⁷ Isu dow amatni tute, “Enni bowk bowk mih na cham powt ta ang bowk kown; rurpur thingmi kowi dow na tepah hanow, ruapur hawmuüa dow na cham ta uet kown, pa ruiah mih chekhai. ²⁸ Nachenganchepaw ang na awr rü mih kung kowi dow Galili pren kowi ang kow narik kowikown, pakhai. ²⁹ Tarapche dow Peter mih,”Amatni bowk bowk cham powt ta en bowk chepaw, ang dow mapaw powtta en dowi tham” pakhai ³⁰ Isu dow aia tute, “Lainowmma ang na tek en, aiak khe ua ka pre kat dowi rawn khe sum kat en na ta data ang kown” pakhai. ³¹ Tarapchedow aia mih sakkrai mahai, “En kowngra kowi paw na tawi ia kowng kown, chepaw, mapaw ang na tada en kown na dowi tham pakhai. Akeng tapeuüa paw naiawng hai tawi tek büah bowk khai. ³² Hanow Gethsemani pape mih krum uowi lowk mih kakowi khai, atapeuüa tute, “Ang na kowh chup Thurai takra kowi mami rah e hawt chowm büah diah ba” pa khai. ³³ Now Peter, Jakop, Johan kowi paw aia tute paw lah khai, kaneuma saktuak krat khai hanow kram paw kram khai. ³⁴ Amatni tute, “Ang kowng khai iawng taih, enni mih ma re hawt uowi büah hanow, kamrütiama hawt uowi büah diah” pakhai. ³⁵ Now pur pra ditchah hai mang hanow krawng kowi lumowr ta tuk pat kow tabawkkrawm khai, mami khin khe dow aia kowi naia klen ta kown kowh chup Thurai khai. ³⁶ “apa pa lowra en nowngia chang khai, mami tuak krat bia mih uang sütsowi ta ang diah; nachenganchepaw ang matia low hai na dowi en matia nau iawng hai pa cham na rowt lah” pakhai. ³⁷ Now Isu dow uang plan hanow, atapeuüa hawt müi mih khi büah khai, Aia dow Peter tute, “Simon, en müi khai bow? Pa nari chah khowm dow kamrütia en hing ia uowi dowi bow?” pakhai. ³⁸ “Nachenganchepaw chaingra kowi enni na kla dowi kownkow taming takhet hai chup Thurai büah diah; lümla dow nau reng chekhai, natarapchedow kow dow kür uowi dowi chekhai.” ³⁹ Aia dow kaplan kowi now, aia tek iawng plan chup Thurai khai. ⁴⁰ Now, Aia kut plan uang iawk hanow kow büah hawt müi mih uang plan ktu khi khai iawk, amatni müi rau lai rakowi tuk klowpah büah dowi chekhai. ⁴¹ Aia uang kut plan uang sum kat khe dow, “Enni müi reng tak hai tanai reng tak kabow? Na iung bowt sow akhin dow uangting khai bowt tak, sünta büah diah, Maru Chapa mih maru ngakuüa rut kowi na ap ta kown chekhai chaw. ⁴² Sam rü büah ma diah, i mang bowt lah, sam mü büah madiah, na pa khüm ang kownmih paw uang ta tawn khai bowt chaw, pakhai. ⁴³ Naiawng aia tek lai thüm khe dow Juda, Hlai preiauüa pungma dawng kowi kowh lowkia mih uang hing ting khai bowt; amatni hai lawm uamakriuüa, Ari-arow tüngsang miuüa hai lawngtang chauuüa chinah mih maru akawmma saidawng hai müa chün hai amaisang uangting büah khai bowt. ⁴⁴ Now, Isu kowi na khümah kown mih amat müa ün hawt rik tek tape büah rüm chekhai bowt, “Ang na namah kown mih dow aiamat na na kown, khümah büah hanow pawlah büah diah” pa dow tek khai. ⁴⁵ Hanow uangting hai krowksang Aia tute uang khai, “Rabbi” pa dow uang nam pe awm khai. ⁴⁶ Isu kowi dow khümah büah hanow tawmah büah khai. ⁴⁷ Nachenganchepaw amatni ria kowi kowh iowng mih dawng kowikow lowkia dow iu dowk saidawng hanow, Uama lang kri mih nar kowi dow tuah khai now papra mih praram dow thiata pe khai. ⁴⁸ Na ün miuüa kowi dow Isu klowpah khai, amatni tute, “Tamta kowi na khüm kown powm iawng saidawng hai müa chün hai enni na khüm ang kown enni uang tarü mih chekhai bow. ⁴⁹ Enni pungma dawng kowi Thurai tempul lak kowi nitowng maru kowi ang tüng ang sang reng khe, enni hing khüm ang dowi kabow, cha laiklow dow na uang ting kownkow chekhai. ⁵⁰ Now tapeuüa dow aiamat kowi cham powt tape bowk khai bowt. ⁵¹ Hanow klanguüa lowkia uan nga ditcha chataih khupla now Isu kung kowi tawi krawi khai. ⁵² Nami klanguüa kowi khümla büah khai, uan mih dow kuak tape büah khai now tengiow teng klaima ia powt khai. ⁵³ Now Isu dow Uama langkrimi tute paw la büah khai; uama kriuüa, lawngtang uüa hai Ari arow tüngsangmiuüa dow uang takua büah khai. ⁵⁴ Peter dow akung amowichah kowi dow Uama langkriumi kim viadawng mowr kowi pat uang tawi khai; chintak miuüa pungma dawng kowi maikhawm rah kowi tawi chowm khai. ⁵⁵ Uama langkri hai ari mami pawi pur kowi tawi uowi mih maiow dow Isu kowi na nowngia paw tape asak kown mih laiklow dow hing taka dowi rakowi chekhai. ⁵⁶ Nachenganchepaw Maru akawmma laiklow hai uang chawk towk büah khai, amatni mih dow saksi pekmi ka büah dowi chekhai. ⁵⁷ Tawngmi chabak maru awr iowng büah khai, hanow tawi chawk towk büah khai. ⁵⁸ amatni dow maiawng hai tek büah khai, aia tek mih anging takhow, mami kim aia matrut hown napiakta hanow sumni kowi na nowngia thawp takown pami. ⁵⁹ Nami kowi paw saksi pekmi ka büah dowi chekhai. ⁶⁰ Uama langkrimi dow adawnglang kowi iowng khai, Isu kowi dow kow lüntaah khai, “Maün miuüa matawng chow tek mih en hing nowng ia klangah dowi chekhai bow?” pakhai. ⁶¹ Tarapchedow aia rarimma uowi khai, matawng paw klangah dowi, Uama langkrimi dow aia tute, “akiow kaah mih Chapa Krista dow en na bow?” pa dow lüntaah khai. ⁶² Hanow Isu dow aia kowi klangah khai, “Ang na chow; Maru Chapa mih lowra nowngia changlami hawm lawm pra kowi chowm kown, mukuang mai hai lawm na uang iu dowm mih enni na khi kown chekhai,” pakhai. ⁶³ Now, Uama langkrimi dow aia khupdiptawngklai ün dow sekah khai, “akengmi tawi tu tawi ta kown mih matawng paw hau dowi bowt na dow bow?” ⁶⁴ Hanow Thura kowi tek naklakmi krang dow enni tuk bowk khowk, matawng iawng chow enni katuak? pa khai. Now amatni bowk bowk Isu kowi dow asak pawk kla kown pahai tuak büah khai bowt chekhai. ⁶⁵ Tawngmi chabak ngam pa dow aia mat kowi dow hing thawk pe kria khai, aia lumowr ün mumpe büah khai, thawngah büah khai, “Thurai laiklow hang tek tham bowt ba? pa büah khai. Kangchawng miuüa dow pawlah hanow phekah büah khai.” ⁶⁶ Peter dow adak kim pra viadawng kowi dow uowi khai, Uama langkrimi chintakmi pungma dawng kowi malauuüa lowkia uang khai; ⁶⁷ Now, Peter dow khowm maih mih kowi dow uang khi khai, achang mahai müah khai, “En paw ma mih Nazaret maru Isu tute kow uowi mih en na chow” pakhai. ⁶⁸ Tarapche dow Peter tek mih, “En tekmi laiklow uan dow ang tuk ta dowi chekhai” pa dow tada ta khai. uat pra kowkowi hanow ua paw ka khai. ⁶⁹ “Nachenganchepaw nar mih dow krawi müah khai, aia ria kowikow iowng miuüa tute amtni pungma dawng kowikow maru lowkia mih dowk tow” kut plan pakhai iawk. ⁷⁰ Aia dow kut plan ta data ta khai iawk. Nami kung klowp chah Peter ria kowi kow iowng miuüa dow, “Amatni pungma dawng kowi en nami maru ngengche chekhai chaw en Galili maru chekhai ” pa büah khai. ⁷¹ Tarapchedow aia tape piati hanow, kham sawi khai, “Nami maru enni tek mih dow mapaw ang hing tuk dowi” pakhai. ⁷² Now ua dow prekat ka iawk khai; Isu dow aia tute, “Ua prekat ka dowi rawn khe en mih sum kat en na tada ta ang kown” pah tekpe mih laiklow Peter dow uang katuak khai bowt, nowng ta it dowi; kar khai bowt chekhai.