PREN KAWMMA PUR KOWI ISU KOWH TARA ¹ Hanow uar thowi hai krowksang uamakri uüa dow lawngtang chauuüa ün, Ari arow tüngsang miuüa ün hai pawi kri pungma dawng kowi dow sangkrag tara büah khai, Isu kowi dow khuowkah büah khai hanow Pilat rut kowi apta büah khai. ² Now Pilat Isu kowi dow hawt lüntaah khai, “Judauüa mang en na bow?” pakhai. Isu dow klangah khai, “En tek mih nachow” pakhai. ³ Uamakri miuüa dow hing chawktowk ta büah hüah chekhai. ⁴ Hanow Pilat dow kut plan lün taah khai iawk, “Na iawng khowt kow büah chawktowk en mih en ta dowi bow, matawng paw en hing klangah dowi kabow?” pakhai. ⁵ Natarapchedow Isu mih matawng paw hing klangah dowi, Pilat dow kaneuma awda khai; ⁶ Now takat nih kowi klathawngmi lowkia mih maru kawm nauah rakowi lü büah mih sarui Pilat lawt pe reng khai. ⁷ Kingküa mih pungma dawng kowikow lowkia, Barabba pa pe mih dow, cham king küa khe, tu maru mih, tawi khai rakowi thawngrum lak kowi klung ta katmi chekhai. ⁸ Now, maru kawmma dow awr pün büah khai hanow, Pilat mih amatni uüi chang iawng , amatni paw tawi chang reng büah khai. ⁹ Pilat dow, Judauüa mang mih pa lawtah enni e dow nau ta bow? pa hawt tekpe khai. ¹⁰ Uama langkri miuüa dow irsiah büah khai rakowi Isu kowi khümah now nami laiklow dow Pilat kowi tekpe büah khai. ¹¹ Hanow Uama langkri miuüa dow maru kawmmauüa kowi dow Barabba kowi na lawt pe kownkow tekpe khai. ¹² Hanow amatni kowi dow, “Judauüa kow mang pa hai enni tekah mih kowi dow matawng iawng chow ang na changah kown enni nau?pa dow pilat mih lüntah khai. ¹³ Now amatni dow awr kut plan haw khai, “Kros kowi tarah diah” pa büah khai. ¹⁴ Now Pilat dow, “Matawng plawng kow chow? matawng ngak chow chang ta khai? pakhai. nachenganchepaw amatni dow aklow atün ngamlam, kros kowi tarah diah” pa dow haw büah khai. ¹⁵ Hanow Pilat dow maru kawmmauüa na sak ihah kown nau khai, Barabba kowi dow lawt pe khai bowt, tarapchedow Isu kowi petepah khai, kros kowi na tarah kownkow amatni rut kowi apta khai bowt. ¹⁶ Now, Sipaiuüa dow tap lak kowikow siphaiuüa uowi ra via dawng kowi dow paw laah büah khai, sipaiuüa maiow kowi hawt hawah büah khai. ¹⁷ Aia kowi dow kowrma thawngmintau paurawng uan pakhupah khai, rowsimüa khetah büah hanow chu lukruk dow krukpe büah khai. ¹⁸ “Chupah büah, Juda mang” padow uown chupah büah khai. ¹⁹ Raitua hai aia lu kowi hup pe hanow, kowkowi now thawkpe kria büah khai, tuape kung se chupah büah khai. ²⁰ Naiawng hai chang lah rensi büah hanow kowrma thawng mintau pauraw mami dow klüpta pe na büah hanow, aia mat kowh kowrma pa khüpah büa iawk khai,kros kowi na tarah kown kowh prang kowi lawt büah khai bowt. ²¹ Hanow süng pra hownia kowh uang mih maru lowkia , Simon, kurini kua chak, Aleksandra hai Rufa kowi dow Isu kow kros aia kowi apa mih pe kawt lah chekhai. ²² Now Golgotha, “lu hut uowira” pa pe büah mih rah kowi kow paw lah büah khai. ²³ Anam uowi mami tui hai Grape tui lawkah mih peah büah khai; nachenganchepaw aia mih dow hawt kham dowi chekhai. ²⁴ Hanow kros kowi tarah büah khai. aiamat tawnguat amia iawng chow napaw kown mih tuk büah dowi rakowi kuakpe plang büah khai. ²⁵ Amatni tarah mih khin dow taku nari khe chekhai. ²⁶ Now Kros lukkowi Aiamat kowi chawktowkah büah mih laiklow, “Isu dow Judauüa mang” pah ruiah hanow tarpe büah khai. ²⁷ Aiamat hai akatsang tamta preia paw tar la büah khai, aia hawmlawm pra lowk lakuai pra kowi lowk chekhai. ²⁸ Hanow tiama iawng uang mang mih maru kawmuüa dow lekla lu se aia kowi dow tekpe naklak khai. ²⁹ Tiama iawng cham mang miuüa dow leklalu se krista kowi dow chawk towkah se tek pe mih, tawng kowi chow en tekah mih Tempul piakta hanow sumni takra kowi naküngah kown mih dow? ³⁰ Hanow, “En matia talawng diah, Thurai Chapa en na khai hanow kros hownia uang iu dowm diah tara” pape büah khai. ³¹ Naiawng powmiawng dow uama kri miuüa hai Ari arow tüng sang miuüa dow, “Akeng mih maru kowi dow nowng iungah reng mih kow matia dow hang ta iung dowi bowt chekhai. ³² Aiamat kowi a-i nowngia owm la kownkow a-i khi khe, “Krista, Israel mang dow, kaw mat mih kros hown dow pa uang iu dowm tara padow” sawrawhah büah khai. Aiamat hai akat sang tarah mih paw aia kowi dow tawi sarawah khai. ³³ Now sat downg lai prenari uang na khai bowt, sat kowi pra kowi sumnari mowr pat palusama uang iu khai bowt. ³⁴ Now sat kowi pra sumnari kowi dow Isu laiklow tünma hai pla khai, “Eli Eli, Sabakthani” nami dow ang Thurai, ang Thurai, matawng palawng kow chow en powt tow ang khai” pami chekhai. ³⁵ Maru lowkia kowh iowng miuüa tawngmi chabak dow nami ta büah hanow, “Sünta büah diah, haw Eliza mih” pa büah khai. ³⁶ Nakhowk khe lowkia mih kaiowmah hown uantu duami tuisür kawng kowi kow chimah khai, now nami uantu chimia mih kaudung towr kowi bawmah nown Isu kowi awr pe khamah khai. ³⁷ Isu dow aklow tünma hai pla khai, aia sakrui bowt khai bowt. ³⁸ Now nami khin khe Thurai chup kim lak kowikow uan iang dow aluk pra hownia adak pra mowr pat uang iu tasek khai hanow preprai phaw khai bowt. ³⁹ Aia pur kowi tatawng klowkmi siphai akawmia kowikow aluchow iowngmi paw naiawng powkow Isu kow sakrui bowt khai mih dow khi hanow, “Nami Thurai chapa dow na ngengche mih chekhai dow” pakhai. ⁴⁰ Masiuüa hawm ün paw alakma hownia uang tawi tang mü büah khai, na ün miuüa pungma dawng kowi dow Magdala kua chak Maru ün, Jakop u hai Josi u Mari hai salom ün tawi büah khai. ⁴¹ Ma ün mih maruuüa mih Galili pren kowi Isu uowi khe aiamat kung kowi kowh uang tawi mihai aia kowi ta pe chin miuüa chekhai büah; akatsang Jerusalem kowi kowh uang ta iua pün büah mih akengmi masiuüa paw akawmma uowi khai. ⁴² Nami ni dow chini nih chekhai, tanai nih dowrawn ni iakpra kowi chekhai. ⁴³ Joseph Arimathai kuachak, tara chetmiuüa dawng kowi tawi uowi mih, Thurai pren tawi sak owm mih, sat kowi pra uang khai, sakkraira hai pilat tute kow kup hanow, Isu uakmi kow lu khai. ⁴⁴ Hanow Isu mih alenma kowng khaimi ta now Pilat dow alenma awda khai, sipai alucha kowi hawah hanow, aia kowng mih krang mih lün ta khai. ⁴⁵ Akawmia kowikow alucha hownia ta kung kowi dow aia uak dow Joseph kowi peah khai. ⁴⁶ Now uan nga ditchah aia ran khai, aiamat kowi dow kow klangah khai, uan nga dichah mih hai duaah khai, hua erah mih tadupra kuam kowi iüaah khai, tadupra plawt dow hua hai büngah khai. ⁴⁷ Now Magdala kuachak Mari hai josi u Mari büah paw amatni iuaah mira dow müah büah chekhai.