ISU AWR PLAN RU MIH HAI ¹ Now Tanai ni kowi khai bowt hanow, Magdala kuachak Mari ün, Jakop u Mari hai Salomi ün kowkowi hanow naphawk la pe kow kowk sau namiung mih ran lah büah khai. ² Hanow saptah ni uown ni rau e tadupra kuam kowi kowkowi büah khai, sat paw lawt khai bowt. ³ “Tadupra kuam plawt hown kowh hua dow miaiawng mih chow na süt pe a-i kown?” patek pe büah thüm khe, ⁴ Nami khin khe tadupra kuam re hai downg büah hanow kow kup büah khai, Naiawng khowt iuk mih hua amia iawng mih chow hawt süt ta khai. ⁵ Tadupra kuam lak kowi dow kow hup büah khai, klanguüa lowkia dow uan akawma khup, hawmlawm pra kowi kowh chowm mih khi büah khai; amatni dow lainowmma awda büah khai. ⁶ Hanow aia dow amatni tute, “Hang awda büah diah. Nazaret Isu tarah büah mih kowi cham büah. sam mü büah madiah, aia dow uowi dowi bowt; iuaah mira mami e chekhai” pa pe khai. ⁷ Nachengabchepaw kow mang büah hanow atapeuüa hai Peter tute dow, “Aia tek enni mih ngengche iawng Galili pren kowi aia na kow rik kowi kown chekhai; na kowi dow enni na khiah kown, padow kow tekpe büah diah” pakhai. ⁸ Nahanow amatni dow chür büah khai now takrow büah khai bowt rakowi dow tadupra hown awr lawt büah hanow, iowm büah khai bowt; mia tute paw cham tek büah dowi, kaneuma kram büah khai. ⁹ Hanow saptah ni uown ni kowi rau mur pa Isu dow rü hanow Magdala Mari kowi khi khai, nami hownia kow ranitia süngnam prütta mih. ¹⁰ Nami kung kowi dow Isu tute uowi miuüa kowi amatni kowi satang peah khai, amatni dow sak nga khai hanow kar büah chekhai. ¹¹ Nachenganchepaw Isu dow awr sing iawk khowk, khi paw kowkhi büah khowk pami ta chepaw hinnau owm büah dowi. ¹² Nami kung kowi dow amatni pungma dawng kowikow preia mih tute, süng kowi kua pra kowi mang thüm mih iüah tute paw, apowm langma katatüng pekhai. ¹³ Amatchih paw akengmi maru tute dow tekpe iüah khai, hing hawt nau uam owm büah dowi chekhai. ¹⁴ Now nami kung kowi dow lai preia lowkia, chah hawm büah thüm khe, kow tatüng pe khai, aia awr rü mih hai kow khi miuüa liklow owm büah dowi rakowi amatni owm dowi mih hai amatni saktuak ama mami tia kowi dow pringah hawiah nangah khai bowt mih kahi. ¹⁵ Amatni tute, pren bowk bowk kowi cham kowiah büah diah, uan thawp maiow kowi dow Satangiung mih cham tek büah diah. ¹⁶ .Now Lowra maru owm khai mih kowi dow lawngra na ka büah hanow, lowra maru nau owm dowi miuüa na kuakah asum kown chekhai. ¹⁷ Ma ün mih amatra awda ra uowi ün mih owm miuüa pungma dawng kowi na tawi uowi reng kown; Ang ming hai süngnam na prüt büah hanow, lai sar ün hai na prow sang büah kown. ¹⁸ Now, rua ün rut hai na khüm büah hanow, makowng kru ün paw kham büah chepaw amtni dow kowng dowi tham; kownga miuüa lu kowi amatni kow rut tang pe hanow, na iung kown chekhai. ¹⁹ Nahanow amatni tute ki tek laiklow kung kowi kow CHAKRAMANG Isu pra kowi awr pün khai bowt, Thurai hawmlawm pra kowi chowm khai bowt. ²⁰ Amatni paw mang büah hanow, pren towng kowi cham tek Thurai lai büah khai bowt, CHAKRAMANG dow amatni kowi tawi chang pe khai, amatni laiklow dow amatra dow lup hai awdara ün akhima tawi chang reng khai. Amen.