MARU TALI THAWNG KOWI PA DUAH MIH ¹ Now, nami khin khe dow maru kawmma uang kut plan ta kua büah khai iawk, amatni tute na chah kown mih matawng paw uowi dowi chekhai. Nahanow aia tapeuüa kowi dow aia tute hawah hanow tek pe khai. ² “Maru kawmma uüa mih kaneuma ang sanaah khai; ang tute sum ni uang uowi büah khai bowt, na chahah büah kown mih tawngpaw uowi dowi chekhai. ³ Amatni dow chah dowi hown kim kowi pe mangah e dow, tiama rawng kowi amatni mih dow na maw ün kown chekhai; tawng mih chabak ngam dow alakma hownia kowh uang mih chekhai. ⁴ Atapeuüa dow, “Matawng iawng chow sünngrüp süngkang makowi maru kawmuüa chakkham kawm na nowngia ka kown? padow klangah büah khai. ⁵ Now aiamat dow, ”Kawm mün khowt chow enni tute uowi?” pakhai. Amatni dow “Ranit pa” pa büah khai. ⁶ Hanow maru kawmuüa krawng kowi na chowm kownkow peah alow khai, ranit klüng mih kawm pa paw hanow, awmrawm laiklow tek kung kowi sekah khai, now amatni tute retah kownkow atapeuüa kowi peah khai; atapeuüa dow maru kawm kowi dow ret pe büah khai bowt. ⁷ Now amatni tute dow dam ditcha taih uowi, aia dow awmrawm lai tek hanow maru kawmuüa kowi na ret pe kownkow atapeuüa kowi tek pe khai. ⁸ . Hanow du pat chah büah khai now kaneuma awmrawm khai; now atapeuüa retah mih lat dow ranit kharang atekma towah büah khai bowt. ⁹ Maru iun uowi mih dow tali thawng chekhai; nami kung kowi dow amatni kowi pa mangah khai. ¹⁰ Aiamat paw tapeuüa hailawm lawng kowi phüt büah khai, Dalmanutha pren kowi kakowi büah khai. ¹¹ Now Pharisaiuüa dow prang kowi uang büah khai hanow uang taiüa büah khai, Aiamat tute chaing müa mukuang hownia amatmüa kük büah khai hanow khi kown nau büah khai. ¹² Kaneuma sak hü it mami hü khai hanow tekpe khai, “Mami khin khe matawng plawng kowh chow kawmat kowh maruuüa mih amatmüa krawi cham khai? Lainowmma ang na tek enni, kawmmat maruuüa amatmüa maiow tüng pe dowi tham” pakhai. ¹³ Amatni kowi dow powt ta hanow, lawng kowi dow kow phüt ta khai iawk, paipra pown kowi ka kowi büah khai bowt. ¹⁴ Now, tama paw la kawm büah khai, amatni tute lawng kowi dow kawm pa pahchow klenkowi dow akeng mih kawm mapaw hing uowi dowi chekhai. ¹⁵ “Pharisaiuüa tut hai Herod tut hown kowi dow ta ming ta khetah hanow, pe chaingah büah diah” pa dow amatni kowi pringah hawiah khai. ¹⁶ Nahanow amatni dow “Mapaw a-i tute kawm uowi dowi” pa dow taklang khai. ¹⁷ Isu dow hawt tukta pe hanow tek pe khai, “Matawng plawng kowh chow kawm uowi dowi mih kangowh enni taüa khai? Enni kawmat paw matawng paw tuk dowi tak bow? enni kowh saktuak uang khawt khai bowt bow? ¹⁸ Now, mik uowi e enni khi dowi bow? param uowi khowk e enni ta dowi bow? Enni katuak dowi bowt bow? ¹⁹ “Kawm tanga pa hai maru tanga thawng uüa ang sekpe khe mün kharang tak chow uowi mih?” pakhai. "Lai pre kharang” pa büah khai. ²⁰ Maru tali thawng kawm ranit pa ang sekpe hanow pa duah khe mün khowt tak chow lat mih?pakhai. ²¹ Hanow amatni tute, ”Enni kawmat pat mapaw tukah dowi tak bow?” pakhai. ²² Bethasaida kowi dow uangting büah khai; aia tute mikdu ma mih uang paw la büah khai, aiamat na towp pe kownkow uang lü büah khai. ²³ Aiamat dow mikdu mih rut dow dowk pe khai, kua ria pra kowi uang paw la khai; aia mik kowi thawk pe kria hanow, towp pe khai, “En nowng khi ditdet tak bow?”pa dow lüntah khai pakhai. ²⁴ Aiamat dow hai mü khai, Maru kowi ang khi khowk, sing iawng dow mang iut lut khai pakhai. ²⁵ Aiamat mih dow mik kowi rut hown kut plan towp pe iawk, aia dow khi kown mih kür ka khai bowt hanow achimma uang khi khai bowt. ²⁶ Now nami kung kowi aiamat kim kowi dow pa mangah khai hanow mami kua kowi hang kow kup tham bowt pape khai. ²⁷ Isu hai atapeuüa dow Philipi Sizari marow ria ret kua kowi ün dow cham krawi kowi büah khai,Tiama rawng kowi dow atapeuüa tute, ”Ang lawng uan kowi maru mih matawng chow tek, amia iawng mih chow ang? ²⁸ Amatni dow “Baptisma chang mih Johan pa tek en büah khai, tawng mih chabak dow, "Risi miaiawng mih chünchü pah tek en büah” pa dow klangah khai. ²⁹ Aiamat dow, "Tawng chow enni tek? ang mia iawng mih chow?”pa dow lünta ah khai, Peter dow, ”Krista dow en nakhai” padow klangah khai. ³⁰ Hanow nami laiklow dow miaiawng mih kowi paw na tek dowi kownkow hangah khai. ³¹ Now, maru chapa mih dow ngare ahuma na kham ngengche kown mih lai klow ün, lawngtanguüa uamakriuüa hai Ari arow tüngsang miuüa nauah büah dowi tham miuüa ün, na paw pe asak kown mih ün, sum ni kung kowi na awr kut plan rü iawk kown mih lawnguan ün amatni dow uown tüng uown sangah khai. ³² Now na ün mih laiklow dow achangma tekah khai. tarache dow Peter aiamat kowi dow cham lang paw la hanow, cham lang hawiah khai. ³³ Aiamat dow atapeuüa pra kowi chamngeu ta pe khai, “Setan, ang pur hownia cham powt diah; Thurai nauah mih krang tuakah büah dowi matchang maru nauah mih krang iawng en tuak mih chekhai” pa dow peter kowi dow plan kut nangah khai. ³⁴ Maru kawmmauüa dow atapeuüa hailawm kowi hawah khai, amatni tute, ” lowra maru ang kung uang tawi kown nau miuüa dow pamatia tatuak ang iawng nadowi tham kow pamatia kraws kawt hai pa uang tawi lah. ³⁵ Lowra maru pamatia asak ngan khai mih dow na towm kown, lowra maru ang kow pamatia kraws kawt hai pa uang tawi lah. matia ming rakowi Satang iung rakowi asak towm khai mih dow na plawplai kown chekhai. ³⁶ Maru mih lpa lusama ka khai e dow pamatia asak iawm khai, aia dow matawng chow namarat kown chow? ³⁷ Hanow aiamat uüi tawng chow tamakra uowi? ³⁸ Kawmat kowh maru, iang chang mih hai angak kangowh pungma dawng kowikow ang laiklow hai ang kowi mih rukrai la ang khai mih sarui dow maru chapa paw kramamu chimsaima hai a pa kraingra hailawm naiu uang khin khe dow amatni kowi na uang tawi rukrai laah kown pakhai.