SÜRLAWK LAWNGUAN KOWI TÜNGSANGRA ¹ Phaisaiuüa ari-arow tüngsang tawng mih chabak dow Jerusalem hownia kowh uang miuüa hai lawm aia tute uang tawi khai. ² Now, atapeuüa tawngmi chabak sürlawk mami rut hown chah chak kham büah khai. ³ Pharisai klen kowi Juda hawmuüa maiow paw lawngtanguüa sang chawn lai bowk lai chün hai rut siaah dowi matchang dow katpaw chah büah dowi. ⁴ Now chi hown uang mang chepaw rik tasia tasau dowi hanow kat paw chah chakkham büah dowi. Akengmi lup ahuma laiklow na chün kown mih paw pu bia, kri bia ün sauah büah khai. ⁵ Nahanow Pharisai hai ari arow tüngsang miuüa dow, ”Matawng plawng kowh chow en tapeuüa mih lawngtanguüa laibowk chün dowi mih hai rut sürlawk mahai chah khai dow?” pa dow klangah khai. ⁶ Aiamat dow klangah khai, ”Enni maru puan miuüa lawnguan Isai mih maiawng hawt rik ta mih lai nowmma na khai. Aia ruiah mih dow “Mami maruuüa amatni laiklow chataih rowsi ang khai, tarapchedow amatni saktuak dow ang hai alakma chekhai.” ⁷ Now, maru thawpah mih ari-arow kowi dow, ari-arow ching pahai tüngsang büah khai; na ün mih uang kiow ang mih alow low chataih chekhai. ⁸ “Thurai alow pek dow enni cham klowkah dowi, maru laibowk ün dow enni dowkah chen chen khai”pa büah khai. ⁹ “Enni matia laibowk enni na powngah kownkow Thurai alow pek mih na kuak takown mih aklangiung ma enni tuk chekhai” pape khai. ¹⁰ Nachenganchepaw Mosi dow, ”En u hai en pa kowi rowsiah diah, pamatia u chepaw pa kowi chepaw tek nak lak mih dow na kowng ngengche kown chekhai” pakhai. ¹¹ Tarapchedow enni tute maru mih a u chepaw ,apa kowi chepaw , “En kowi ang ia khowng kown taih” pakhai, hanow Thuarai kowi peah mih chekhai bowt. ¹² A u uüi chepaw apa uüi chepaw matawng paw chang kla dowi bowt chekhai. ¹³ Hanow enni laibowk rakowi mih Thurai laiklow dow enni mata khai nami iawng ün mih dow ahuma enni chang reng chekhai. ¹⁴ Now, maru kawmma uüa kowi dow aiamat tute dow plan kut hawah khai iawk ,Enni bowk bowk mih ang laikow sünta büah achangma tukta büah diah, pakhai. ¹⁵ Uat pra hownia kowh maru kawlak kowi kupmi dow matawng paw aia kowi nowngia sürlawkah dowi chekhai. ¹⁶ Nachenganchepaw maru kawlak hownia kow awr lawt mih sarui dow maru kowi sürlawk mih chekhai. ¹⁷ Maru kawmmauüa tute dow kim kowi kup khai, atapeuüa dow sangchia laiklow laiuat achangma lüntaah khai bowt. ¹⁸ Aiamat dow, “naiawng khowt chekhai bow enni pawp? enni mapaw tukta dowi bow, matawng sia paw uat pra kow maru kawlak kowi kup mih; na ün mih dow matawng paw iasürlawk dowi chekhai.” ¹⁹ Hanow amatni saktuak lakkowi kup dowi, nachepaw aia mulak kowi kup khai rowt chekhai now uat pra kowi kowh lawt khai. Nami laiklow hownia dow chak kham maten dow chimsaiah khai. ²⁰ Maru kawlak hownia kowh uang awr lawt mih ngengche dow maru kowi sürlawkah reng chekhai, pa dow tekpe khai. ²¹ Maru saktuak lak hownia kowh dow atuak ngak tapawk tanau, kukra, maru sak pawkra ün, iangchangra ün chekhai. ²² Now irra ün, iangchangra ün, ngakra ün, kuanra ün, klattatra ün, mikmük ngak ün,Thurai kowi tek nak lak mi ün, kumaraura ün hai samura chekhai. ²³ Ma ün mih lup ngak chang maiow mih kawlak pra hownia kowh uang lawtmi chekhai, maru kowi sürah lawkah mih dow. ²⁴ awr rü hanow aia dow nami hownia Suria hai Sidon pra kowi cham khai; kim lowkmi kowi kow kup khai, amiaiawng mih na tukah dowi kownkow nau mih chadiah nachepaw nowngia tapet dowi chekhai. ²⁵ Lümla sürlawk kup pe kawlak mih chama mih masiuüa paw Isu laiklow ta hai krowksang uang khai, aia khawk daw kowi uang tabawk krawm khai. ²⁶ Nami masiuüa dow Grik chekhai, Suria pren kowikow Phoenicia powng kowikow chen chekhai. Achama kawlak hownkow süngnam dow na prüt tape kown kowh uang lü khai. ²⁷ Tarapche dow aia tute ,”Auown khe chauuüa kowi pa du ah diah, chauuüa hawm paw tape hanow, kui kowi peta bowk e dow mapaw hing takah dowi chekhai ” pa hawt tekpe khai. ²⁸ Aiamat dow klangah khai, ”Na dow na CHAKRAMANG, nachengan chepaw salawnma krüa kowi kuiün paw chauuüa chah mih adi uai dow tawi chah büah reng chekhai. ²⁹ “En tek laiklow mih na khai rakowi mang diah hanow, süngnam dow en chama kawlak hownia dow lawt tüng khowk chow ”pakhai. ³⁰ Aiamat dow kim kowi mang hanow,achama dow iüara prowng kowi mawkmi kow khi khai; süngnam dow hawt lawt tüng khowk chekhai. ³¹ Suria marow hownia dow lawt khai hanow Sidon kowi kowh kup la now Dekapoli powng dow hai klen lah hanow Galili kan kowi dow kut plan ting khai iawk. ³² Param pang mih lowkia mih, alai paw phuang dowi mih aia tute uang paw lah büah khai; aia lukkowi na tang pe rut kownkow uang lü büah khai. ³³ Isu dow maru kawm pungma dawng hownia cham lang paw lah now, aia rut chawk dow aia param kua kowi kak pe khai, kria paw phawkpe khai hanow dai kowi paw kak pe khai. ³⁴ Aia dow mukuang pra kowi awr tau hanow hü sak khai hanow, ”Ephata”. nami dow pa uang ta uow lah pami chekhai. ³⁵ Hanow aia param dow uang ta uow khai, aia dai tatawm mih paw uang ta lat khai bowt, klangiung mahai laiklow paw uang ia tek khai bowt. ³⁶ Miaiawng mih kowi paw na cham tek dowi kownkow amatni kowi dow hangah khai, nachengachepaw aia hangah mih lake cham tek büah ngamlam khai. ³⁷ “Amatni dow lainowmma awda büah khai, lup iung lainowmma chang khai nowm dow param pang mih uang ta uow khai; laiphuang dowi mih paw nowng prow sang kown mih kür uang peah khai” pa büah khai.