ISU KOWI KHAMAH DOWI MIH ¹ Nami ra hownia Isu dow lawt khai, aiamat kua pra kowi uang khai; atapeuüa paw aia kung kowi uang tawi büah khai. ² Now tanai ni khe takura kim kowi dow tüngsangah khai; maru kawmma paw aia tek mih laiklow ta büah hanow lainowmma awda büah khai , “Ma ün mih maru tawng hownia chow aia tuk khai? matawng chanlaira chow Thurai peah? aia rut hownia awda lup maten nowngia chang lami ka kha da? ³ Mari cha Jokop ün, ,Joseph, Juda hai Simon uüa taichah nauchah laksama chapa na dowi bow? Aia tuamauüa paw a-i pungma dawng kowi tawi uowi bow?pa ün tek pe büah khai; naiawng hai Isu kowi hangah khai. ⁴ Isu amatni kowi tek pe mih dow, Risiuüa mih aia mat marow pra kowi tasin miuüa hai aia kim chak miuüa dawng kowi na dowi hanow rowsiah büah reng chekhai. ⁵ Now arau uowi mih uüa ditchah aia lukkowi tang pe rut hanow iungah mi chataih klen kowi dow nakowi dow awdara mih nowngia chang lah dowi chekhai. ⁶ Owm büah dowi mih rakowi kaneuma aia awda khai, nami kung kowi kua towng kowi tüngsangah khai. ⁷ Now, aia dow laipreiauüa kowi dow hawah khai, preiah chi achum chum chow aia chinah khai; now lümla sürlawk maün mih lukkowi paw naia chang alow kown mih paw peah khai. ⁸ Tiama rawng kowi raitua chataih klen kowi dow kawm paw, im paw, amatni kekawm kowi paw pawisa paw na phang la dowi kownkow hangah khai . ⁹ Tarapche dow phanaih khawk dow nowngia krua khai, prebuk kowrma na khup kown mih dow hangah khai. ¹⁰ Now aia dow amatni tut e, “Enni cham pün mih kim kowi enni lawt dowi mowr da enni kowh pünra kim kowi uowi büah reng diah . ¹¹ Lowra kua kowi chepaw howr enni dowi kowh enni laiklow sünta büah dowi hanow, nami kua hownia enni lawt mih khin khe; amatni dow mapaw na dowi mih krang na tuk la büah kownkow enni khawkpha kowi kowh dinchow thet la prowng büah diah”pape khai. ¹² Hanow ,cham tarü büah khai; angak hownia maru sak nata plan lakown kowh cham tek büah khai . ¹³ Süngnam kawm kowi dow prüt ta büah khai, arau uowi mih maru kawm kowi paw phawk la pe sau hanow iung la büah khai. ¹⁴ Isu ming dow anang iukma cham ta howng khai rakowi mang Herod dow tawita khai, “Baptis chang mih Johan mih kowngra hownia plan kut rü khai iawk bow? maün mih lowra nowngia chang la mih aia mat kowi uang lup mih chekhai.” pa tekpe büah khai . ¹⁵ Nachenganchepaw akengmi uüa dow, “Elija chekhai paün büah khai; tawngmi chabak dow ,Risi , dawng kowi kowh lowkia iawng mih chekhai” pa büah khai. ¹⁶ Nachenganchepaw Herod dow hawt tuk ta hanow , “Johan lu dung ta pe mih chekhai; uang rü khai iawk chekhai “ pakhai. ¹⁷ Herod dow aia naumow Filip masi chawngtape khai rakowi Johan kowi khümta hanow thawngrum lak kowi phangta khai. ¹⁸ Nachenganchepaw Johan Herod kowi tek pe mih ,”En nauma misi paw ta pe mih iung dowi chekhai pa hai tek pe khai. ¹⁹ Naiawng rakowi , Herodi aia lukkowi kunmarau khai; na paw tape asak kown mih nau khai, chepaw nowngia paw dowi chekhai. ²⁰ Now, Herod mih Johan kowi dow achima hai chimsai mami tuk khai, hanow lainowmma kramah khai now lawngah khai ,aia laiklow sün tape hanow kaneuma saktuak krat khai now süntak iung khai. ²¹ Herod dow aia kowh maru iuk ma miuüa ün, Galili pren kowikow maru iukuüa kowi krawi pawah pin khai, aia dia khin kowi howrah khai; akhin taka klowk mih uang uowi khai bowt rakowi. ²² Now, Herodi chama dow pawi chakra kowi uang tawi kup hanow, uang plai khai; Herod hai aia hai ta iua chah pawi miuüa kowi paw awmrawmah khai .mang dow malauuü tute dow, “En nauah mih sarui lü ang diah, ang na pe en kown” pakhai. ²³ “Lowra chap en lü ang mih sarui, ang pren dawnglang mowr pat ang na pe en kown taih,” Padow khamah khai. ²⁴ Aia mat dow prang kowi kowh lawt hanow, a-u tute kowi now,” Matawng chow ang lü e na iung kown?” pah kow tek khai. A u dow, “Baptisma chang mih Johan lu” Pa hawt tekpe khai. ²⁵ Now alenma hai mang tute dow plan kowi khai iawk ,”Lawngpan hai Baptisma chang mih Johan lu uang pe ang diah” pakhai. ²⁶ Nahanow, aia laikham ta mih hai pawi chak miuüa rakowi uam plan dowi bowt chekhai, nachepaw aia mih dow lainowmma sak nga khai. ²⁷ Mang dow kangchawng mih siphai lowkia mih kowi chinah khai; thawngrum lak hownia Johan lu dow pa kow dung pe hanow uang paw lah pahai peah alow khai. ²⁸ Now lawngpan hai uang paw lah pe khai, malauuüa kowi uang peah khai hanow malauuü mih dow a-u kowi plan peah khai iawk. ²⁹ Nami dow atapeuüa ta hanow kowhkowi büah khai, auak dow kow krowng büah hanow dupah büah khai. ³⁰ Tapeuüa mih Isu tute uang büah khai; amatni changah mih lup sarui miün hai amatni laiklow tüngsangah mih maiow dow uang tek pe büah khai. ³¹ Aia mat dow amatni kowi tek pe mih ,”Enni mih rarim rarama mih rakowi tanai büah diah, pakhai. Maru kawmma ta hen iualua khai, chah lah chakkham kown mih khin ngam dow ka büah dowi chekhai. ³² Hanow, amatni dow rarim raramma pra kowi lawng hai cham lang kowi büah khai. ³³ Now amatni kowi dow maru hawt khi büah khai, tawng bak mih dow amtni kowi tuk matah khai; marow hownia kowh maru amatni dow rawn krawi iowm büah khai. ³⁴ Lawng hownia uang lawt büah hanow maru kawmma uang khi büah khai, akhet mih ia uowi dowi mih ruapur iawng na khai büah rakowi sanaah khai; kaneuma amatni kowi tüngah sangah khai. ³⁵ Now nih paw uang kowi iawlaw khai, atapeuüa dow aia tute uang hanow tekpe mih, “Mami süngrüp süngkangma chekhai, ni paw chur pra chabowt” pakhai. ³⁶ Marow ria ret kowi kowh ün hai kua ün kowi kowh matia chak kham matawng chün chü na cham nowngia ran lah kownkow amatni kowi dow pa mangah diah, pa hai uang tek pe büah khai. ³⁷ Tarapchedow aiamat dow, "Enni matia mih na chah büah kown mih peah diah” pa dow klangah khai., “Amatni dow, kawm pre kawm sung ranah hanow chak kham a ia na peah kown bow?” ³⁸ aiamat dow mün khowr chow kawm uowi enni tut-e? Sam mü büah madiah pakhai.amatni dow mü hanow ,”Kawm tanga pah, dam pre kawn chatiah uowi” pa dow klangah khai. ³⁹ Aiamat dow amatni bowk bowk kowi bawrchak asingma dawng kowi dow aphow aphowma na chowm kownkow tekpe khai. ⁴⁰ Tawng bak mih tan kowi dow akawm ün, ngakawm iah ün chowm büah bowk khai. ⁴¹ Aia mat dow kawm tanga pah hai dam pre kawn paw hanow, mukuang pren pra awr mü hanow tek awmrawm lai khai; kawm dow sekah hanow, maru kawmuüa tute retah kownkow atapeuüa rut kowi ap pe khai; dam amatni bowk bowk kowi ret pe khai. ⁴² Amatni bowk bowk cha büah khai, lainowmma sak-i büah khai. ⁴³ Now atapeuüa mih kawm hai dam retah mih lat dow laipre kharang atekma towah büah khai. ⁴⁴ Hanow kawm chak miuüa maten kowi dow kachakuüa tanga thawng uowi büah mih chekhai. ⁴⁵ Nami khin khe maru kawm dow mang büah klawm klam khe pai pra pown Bethsaida kowi na kow rik uowi kown mih Isu dow atapeuüa kowi akhawtma hai tek pe khai, now lawng kowi dow pe pünah büah khai. ⁴⁶ Maru kawmma mang bowk mih kung kowi na chup Thurai kownkow hung kowi awr pün khai. ⁴⁷ Now, uar uang iu hanow lawng dow Satatui dawnglang tiliti kowi uowi khai, tarapchedow aiamat malowkchah süng kowi uowi reng tak khai. ⁴⁸ Now kung hownia li hutla khai rakowi abowmma hai lawng hown mang büah mih Isu dow aia tape uüa kowi khi khai, uar thowi ria pra khe Isu mih satatui lukkowi amatni tut-e uai tui uang khai haonw amatni kowi dow ta lawttah büah khai. ⁴⁹ Satatui lukkowi aia mang mih khi büah hanow süngnam chünchü pa büah khai now pla büah khai. ⁵⁰ Kram hai haw büah khai. chepaw, amatni kowi alenma hai klowpah khai, “Hang kow kram büah diah enni kow sak mih dow akhawtma uowi büah diah. ⁵¹ Lawng kowi awr phüt büah khai, li paw rim khai; hanow, naiawng ün khi büah now awda büah khai. ⁵² Kawm lawng uan krang uowi mih dow mapaw hing tukta büah dowi, amatni saktuak kowi nowng katuak büah dowi chekhai. ⁵³ Amatni dow hai pown büah khai, Genesaret pren kowi kowh ting büah hanow lawng dow khuowkah büah khai. ⁵⁴ Lawng hownia dow lawt büah hanow, maruuüa dow Isu kowi hawt tuk matah büah khai. ⁵⁵ Now aia kowi tuk mat a kung kowi dow nami powng kowikow maru uang iowm büah khai hanow tawng mi rah kowi chow aia uowi mih ta büah hanow arau abau uowi mih maru kowi dow mawkrah hailawm uang paw lah büah khai. ⁵⁶ Hanow kua towng marow towng kowi, lowra pren kowi ün, aia cham kowi rasarui kowi uowi miuüa dow amatni chi changra kowi pa chowmah büah khai; aia uan ret ün paw na ia towpah kown lü leng büah khai hanow towpah mih sarui dow uang iung büah khai.