SÜNGNAM PLAWPAH MIH KOWI IUNGAH MIH ¹ Sata aw pai pra pown Gerasin maruuüa pren kowi kowh ting khai. ² Lawng hownia lawt now lümla sürlawk kawlak kowi uowi mih lowkia, chengrawng hownia aia pur kowi uang khai. ³ Nami dow chengrawng kowi uowi reng mih chekhai, miaiawng mih paw leng hai paw nowngia tawmah dowi chekhai. ⁴ Maru kawm dow plan plan leng hai lawngkeh krua pe now tawmah khai, chepaw leng ün raita khai now lawngke ün paw sek ta di ta bowk khai; mia paw nowng ia dowkah dowi chekhai. ⁵ Now nih e uar e mih chengrawng kowi hai hung kowi pla reng now hua bür mih hai aiamat mih ta ngen khai. ⁶ Alakma hownia Isu kowi uang khi hanow uang chupah khai. ⁷ Aklow tün mahai pla khai ,”Isu Langkri mih Thurai Chapa, en hown matawng paw anging kow alow uowi dowi, hauang towk ang ngare diah Thurai ming hai ang uang lü en “pakhai. ⁸ Nahanow Isu dow tekpe mih, “Lümla sürlawk mami maru kawlak hownia uang awr lawt pape khai.” ⁹ En ming tawng chow ? pa dow lüntah khai, now aia klangah khai, ang ming dow Siphai hawm chekhai, anging dow akawma chekhai. ¹⁰ Nami hownia matni kowi na prütah dowi kownkow lainowmma kalü khai. ¹¹ Nami hung ret kowi dow pak thing maru uowi lowkia. ¹² Aia tute dow,” Pak tute mih pa kowh kowi anging hanow, amatni kawlak kowi anging na kowh kup taih sow” pa dow lü büah khai. ¹³ Isu dow pakupah khai hanow, lümla sürlakuüa uang lawt khai, pak kawlak kowi dow kowh kup büah khai; pak hawm dow pre thawng chekhai, rak powr pra kowi kowh hing iowm now lün büah khai, Sata tui kowi kowh hing tamir büah khai. ¹⁴ Athing miuüa thing pak khe , iowm büah hanow marow pra hai kua towng kowi hanow, pe satang khai matawng chow naown kown mih maru kawmuüa dow uang mü kownkow uang büah khai. ¹⁵ Isu tute uang khai hanow süngnam plawpah mih maru dawnguan khup hai sak sowrma haiuowi büah khai; amatni dow lainowmma kram khai. ¹⁶ Süngnam plawp ah mih hai pak thing mih lawnuan dow khi büah khai, khimi maru uüa dow lawnguan hawt tekpe bowk khai. ¹⁷ Naün mih maruuüa dow amatni uowira hownia na lawt ta kown mih kowlü büah khai . ¹⁸ Isu dow lawng kowi awr pün mih khin khe süngnam plawpah mih maru dow aia tute na tawi mang lah kown kowh tekpe khai. ¹⁹ Chepaw peah alow dowi chekhai, “En kim kowi ,enni kimchakuüa tute kowi diah hanow, Thurai chang en mih lup maten sanama hai katek pe diah, pape khai. ²⁰ Aia dow mang hanow, Dekapoli kua kowi dow Isu changpe mih lup krang dow cham tek hanow bowk bowk maru mih awda khai. ²¹ Now, Isu dow lawng hown pai pra pown kowi hai pown khai hanow maru kawm uüa dow aia tute uang takua khai; nami khin khe Sata aw ret kowi uowi büah khai. ²² Takuara kim hownia aluchow aming Jaira pami aia tut uang hanow, aia khawk daw kowi tabawk krawm khai. ²³ “Ang chama na kowng kown chabowt, en uang now aia lukkowi en rut tang pe diah; hanow na awr iung kown chekhai “ pa dow kowh lü khai. ²⁴ Hanow maru kawmma aia kung uang tawi büah khai now aria aret kowi paw lainowmma taet khai , aia mat paw tawi chekhai. ²⁵ laipre ning khowk awng vi mih masiua uowi khai lowkia, ²⁶ Daktawr akawmma paw rawah khowk now aia kow tangka ün paw khowk ta bowk khowk na chepaw ia iung dowi chekhai, uang hu ngamlam khai. ²⁷ Isu Satang aia uang tawi ta khai hanow aia kung pra kowi maru kawmma dawng kowi dow uang khai , aia uan dow kow towp khai. ²⁸ Aia uan chataih ang ka towp khai e dow ang na iung ngengche kown, pakhai . ²⁹ Hanow aia dow towpah khai, now awng vi mih paw uang iung khai bowt nami rawka arau hownia aia iung mih tatuk khai. ³⁰ Isu dow aia mat hownia kowh lowra nowngia changla mih kür lawt mih tuk khai, maru kawmma dawng kowi krawi ngeu now aia dow amia iawng mih chow towp ang? ³¹ Atapeuüa tek pe mih, Maru kawm taet mih paw en khi khowk da, ‘Miaiawng mih chow towp ang mih pa en tek khai da?’ ³² Nachenganchepaw Aia mat kowi towpah mih ia kowi nakhi kown nau kowh aria ret kowi krawi mü khai. ³³ Now nami masiuüa dow nami auan tuk hanow kram se chür klukluk khai , aia pur kowi uang tabawk krawm nwo lowra akümma tekpe khai bowt. ³⁴ Aiamat dow ,"Tum ,en owmra iung en mih chekhai ,thaulang ma hai mang diah now kowh iungma, arau hownia en na iung kown taibowt” chekhai. ³⁵ Aia tek laiklow thüm khe Jaira kim hownia kowh uang miuüa dow “En chama kowng khai bowt. Matawngplawng kowh chow tüngsang mih kowi en na towkah kawm kown chow?” uang pa büah khai. ³⁶ Tarapche dow amatni tekmi laiklow tawi ta hanow, Takuara kim aluchah mih tute tek pe mih dow,” Hang kram diah, owm diah” pakhai. ³⁷ Peter, Jakop tainau Johan , matni sumiah chataih dowi hanow miaiawng kowi paw aia kung kowi pa tawi dowi. ³⁸ Takuara kim aluchah kim kowi uang ting khai, akawmma saknga mahai chowm phulu büah khai hanow maru kawm mih dow atünma kar büah khai. ³⁹ Aia kowh puk hai amatni tute, “Matawng plawng kow chow akürma enning kar khai? Ngeuuüa mih dow kowng mih na dowi, müi mih chataih. ⁴⁰ Amatni dow renah khai, hanow amatni bowk bowk kowi prüt ta khai, ngeuuüa u p hai aia tapeuüa hailawm ngeuuüa mawkra kim kow kup büah khai. ⁴¹ Now ngeuuüa rut kowi kowh dowk pe now ,”Talitha kum” pakhai, nami dow Tum, awr rü diah pami chekhai. ⁴² Masiuüa ngeuuüa mih dow awr rü now nowngia mang khai; aia mat dow lai pre ning now amatni dow lainowmma awda khai bowt. ⁴³ Tarache dow amatni tute, “mami laikowi amiawngiang mih kowi paw hang cham tek pakhai . “Nacha kown mih peah diah” padow tekpe khai.