ACHIM ASAIMA NAUOWI KOWNMI TÜNGSANGRA ¹ Krista tut-e krüng laah mi enni nakhai bowt tak, naiawng rakowi Thurai hawmlawm pra Krista nanra kowi uowi kown mi auan pawtuak büah rowt diah. ² Lusa lawnguan kowi lak-e Mukuang pren lawnguan kowi enni saktuak neplawng ne sakah rowt büah diah. ³ Enni kowng khowk mi chekhai, enni singra mi dow Krista tut-e Thurai mi aklangiungma tow enni khowk mi chekhai. ⁴ Enni singra atut, Krista nauang tatüng mi khin khe enni mi paw aia kraingra hown natawi tatüng kown. ⁵ Enni lusa chowmkrang uowikrang ngak tapawk tanaura ün, asür alaawkma mi ün, irsira ün, angak sakraira ün, lawphara ün hai arup aren chup mira ün klüp thua ta hai kir kuakta büah diah. ⁶ Na ün mi alup rakowi dow owm dowi mi chauuüa luk kowi Thurai kunma raura nauang tüng kown mi chekhai. ⁷ Achük alai khe dow enni mi paw naiawng mi kowi dow enni uowi khai. ⁸ Akawmat dow kunma rau ün, kunmangak ün, irsi ün, Thurai kowi tek naklak mi ün hai siri laingak ün enni nawr hownia hang pa lawt bowt lah. ⁹ Dailai hang kow tatek büah tham bowt, arik khe kow enni kiangah khowk mi dow uanh tu khowk mi iawng kirta kuakta büah diah. ¹⁰ Nami maru asar mi hai dow enni tatawng tauatah khai bowt, Thurai kowi achangma natuk la kown kow aiamat powmiawng achanlaima mi uan thawp sar enni na mi chekhai. ¹¹ Krista mi dow lowra luk kowi lang kraingmi na khai rakowi Grik hai Juda, khampha uan pik hia mi hai hiaah dowi mi, tukcha dowi mi, lang e-ah mi chenchap, nar hai athaulangma mi matawng paw uowi dowi bowt. ¹² Nahanow Thuarai ruiah mi maru tarap dow achim asaima hai sakrauah mi maruuüa tasakrau mira ün, tasaksing sanara ün, kupdawiia iowngra ün, towplawng towsakra ün, nowng kham sumra ün hai dow tatawng tauatah büah diah. ¹³ Takham sum büah ria-ria diah. Taiua chang lup iung ria-ria büah diah. Amia iawng mi chün chü changta angak khai hanow talawt büah ria-ria diah, enni ngak Thuai lawt taiawng dow enni matia paw talawtah ria-ria büah diah. ¹⁴ Naiawng ün uan maiow kowi dow sakraura hown tawngah kengah büah, sakraura chataih lowra kowi nowngia kawm nowngia keah mi dow nakhai. ¹⁵ Krista taking tasangra hai enni saktuak kowi taming takhetah büah diah. Nami taking tasangra dow pabuk pangasang kowi na uowi la kown kow na khai mi chekhai rakowi. Awmrawmma hai na uowi la kown mi tatuakah büah diah. ¹⁶ Krista laiklow mi dow enni saktuak kowi akurengma pa cham uowi lah. Enni tukra hai chanlaira maiow hown Thurai kiowmüa meng, Lümla meng ün hai lawm tatüng tasangah büah hanow tape kür reng büah diah, enni saktauak maiow Thurai rowsi müa kowi apiawma hai awmrawm meng tek büah diah. ¹⁷ Enni laiklow tekra kowi ün hai lupchangra maten kowi Chakramang Isu ming hown Pa Thurai tut-e tek awmrawm lai büah diah. KRISTA KIMCHAK NA CHÜNAH KOWN MI RI-ROW ¹⁸ Masiuüa low, enni hua laiklow chün büah diah, nami dow chakramang nauah mi krang chekhai. ¹⁹ Huauüa low, enni masi uüa kowi sakrauah büah hanow, amatni kowi hang kow changah anowng apowng büah diah. ²⁰ Ngeuuüa low, lowra mi kowi enni u hai pa laiklow chün büah diah, nami dow Chakramang howrah mi krang na chekhai. ²¹ Pauüa low, enni chauuüa kowi hang kow towkah kunma rau büah diah, amatni sak na tanua dowi kown kow. ²² Naruüa low, lowra mi kowi tawn enni miia laiklow chün büah diah, hanow lusa maru pa awmrawmah mi powmiawng amatni khi khe chataih khe kow chang miiawng na dowi saktuak lak kowi chakramang ring kaw lukkowi amatni khiah dowi mi rakowi paw changah büah diah. ²³ Enni changah mi sarui mi kowi lusa maru lupchang miiawng na dowi hai Chakramang lupchang na rowt miiawng lainowmma hai changah büah diah. ²⁴ Thurai dawngthawng uan powng miia na khai mi rakowi Chakramang awmrawm sung enni na ka kown. Chakramang Krista nar lup enni chang mi rakowi chekhai. ²⁵ Lup ngak chang miuüa dow amatni lup ngak sung na ka büah kown, Thurai dow amiaiawng mi kowi paw anem achowng changah dowi tham.