¹ Enni hai Laodikei marow kowi kow maruuüa vüi, khi ang lamowr dowi tak mi maruuüa vüi mün khowt kawm hai chün chü ang chang alup mi enni na tuk la kown mi ang nau enni khai. ² Amatni sak kowi na nowngia sakkhawt la kown kow sakraura hai ta cheng büah hanow, chanlaira maten kowi saktuak hai achangma mi ahuma ka büah khai, Thurai petah mi Krista kowi na nowngia tuk la kown kowh. ³ Chanlaira hai prengia maten bowk bowk mi Krista tut-e uowi chekhai. ⁴ Amiaiawng mi paw lainowmma mi powmiawng tüng mi, hing nowm dowi mi hai na puan la enni dowi kown kow ma mi ang tek mi chekhai. ⁵ Kow hai enni tut-e ang uowi dowi chenganchepaw lümla hai dow enni pungma dawng kowi ang uowi reng, achima tahen takuang mi krang hai Krista owmra kowi kow enni akhi akhawtma uowi mi krang ang khi hanow kaneuma ang awmrawm khai. ⁶ Nahanow Krista Isu kowi Chakramang pahai enni owmah mi iawng dow aia nauah mi iawng chang büah reng diah. ⁷ Aiamat kowi dow sawt hing sawt kiama hai uang awr taking tasangah büah, tüng enni sang enni miiawng owmra kowi dow akhi akhawtma iowngah büah hanow, awmrawm laiklow tek büah diah. KRISTA CHOWMKRANG UOWIKRANG AIUIH ⁸ Pe la pe ching büah diah, Krista hown kow na dowi lusa tatüng tasangra nowm dowi mi süngnam hownia kow lawt mi, lusa chanlaira pa pe büah mi chataih mi dow amiaiawng mi chün chü na puan na li enni ün tarawng. ⁹ Krista kow mi dow Thurai taküm tangira maten uowira chekhai. ¹⁰ Nami rakowi aküm angima mi singra enni ka mi dow, aiamat mi dow lowra luk kowi kow alow uowi mi maiow lu chekhai. ¹¹ Krista hai tatawm khai mi rakowi khampha uan pik hiata mi enni nakhai bowt, nami dow maru rut hown nadow Krista aiamat ngengche na khai, kow kowi kow angak kru uowi mi hownia uang chawng uang klanta enni khai bowt. ¹² Baptisma kowi dow aia tut-e enni tawi ta dup khai bowt, makowng pungma dawng kowi uang awr rü miia Thurai kowi enni kow owmra dow krüngla enni khai bowt. ¹³ Chang angakmi ün hai kow kowi kow khampha uan pik hiah dowi mi khin khe enni kowngmi na khai, nachenganchepaw Thurai dow a i ngak maiow lawt ta hai Krista hai lawm pa sing ta enni khai bowt. ¹⁴ Alow pek ruiahmi, a i kow angak prek lowi maten mi dow aia piak ta khai bowt. Tak pe khir hai Kraws luk kowi tatar hanow a i ngak maiow aia sawkta sauta khai bowt. ¹⁵ Alow uowi mi maiow hai akraingra maiow ün dow maru mik khiah kowi Kraws luk kowi nowngta hanow, Krista mi dow kuakah asum khai. ¹⁶ Nahanow tawngchow na cha kown hai na kham kown mi lawnguan kowi ün, pawi chang hai la sar pawi chang lawn uan kowi ün, khang ni lawng uan kowi chepaw amiaiawng mi paw enni luk kowi hang pa cham chang enni alow bowt lah. ¹⁷ Na ün mi dow alup na uang ting kown mi anim chataih chekhai, aching mi dow Krista mi chekhai. ^{18 19} Kupdaw iiaiowngma powmiawng kramamu kowi chup miuüa ün amiaiawng mi paw enni kow awmrawm sung hang pa nowngia rup lah. Matawng paw na dowi kowi hang pa cham chang tingling lah now, pamatia kow saktuak kowi hang kow taphaw umlum lah. Thurai nauah mi iawng kow pabukma mi dow awr iuk awr sown reng mi tuak dowi chekhai rakowi Krista kowi dow amatni lu pami klowkah dowi bowt. KRISTA KUNG KRAWI MI MARUUÜA CHOWMKRANG UOWIKRANG ²⁰ Ka piati khowkmi lusa owmra maiow Krista hailawm kowng khai bowt hanow, matawng palawng kachow lusa nowm dowi mi tüngsangra luk kowi tow sakowmra hai enni uowi reng tak; ²¹ “Hang kow kak, asowr hang kow tang, hang kow towp diah”? ²² Na ün mi nowngia piakmi hai nowngia tama mi uan maiow na tawngah dowi kown kow maruuüa mi tatüng tasang hai tachia taphuang reng khai. ²³ Matawng iawng chow na chup Thurai kown, matawng iawng chow pamatia kowi kupdaw iia iowngma nowngia uowi kown, akawm kratra klowkah dowi iawng kow kowi nauowi kown pa ün mih tatüng tasangra lusa mik mük kowi kaneuma iung chekhai, chenganchepaw angak prek nowngia kuak ta kownmi kowi matawng paw hing marawk dowi.