KAWLAWSA UÜA HOWN TACHUP TAIIARA HAI THURAI TUT-E AWMRAWM LAIKLOW ¹ Thurai nauah krang iawng kowi kow Krista Isu chintakmi Pawl ang na, hanow a-i tainau Timawthe paw, ² Kawlawsa kowi kow Thurai rakowi achim asaima uowi mi hai Kriata kowi kow sakowm mih maruuü low, a-i pa Thurai sanara hai taking tasangra enni luk kowi pa cham uowi lah. ³ A-i Chakramang Isu Krista Pa Thurai tut-e tek awmrawm lai now enni vüi kowi anging chup Thurai reng khai. ⁴ Krista Isu enni owm khowk mi laiklow hai maru achim asaima mi maiow kowi enni sakrauah khai mi laiklow anging ta chekhai, ⁵ Mukuang pren kowi enni vüi sakowmra ahuma uowi. Satangiung lainowm hownia sakowmra dow enni ta khowk mi chekhai. ⁶ Enni tut-e kow sataiung uang towm mi dow palusama iung müa chekhai padow tauet khowk, anowm ma hown enni owmmi ni hownia enni luk kowi Thurai sanara dow uowi khai. ⁷ A-i vüi kowi kow Krista lupchang mi kaah asakowm mih Epafra tüngsangra hownia en tuk khowk, enni vüi Krista rakowi kaah sakowmmi kruikhet mi lowkia aia na khai. ⁸ Lümla sai luk kowi enni kow sakraura uowi khowk mi laiklow aia nawr hown ang ta chekhai. KRISTA KRAINGRA HAI LAWNGRA LUPCHANG ⁹ Lümla pra sakraura laiklow tami ni hownia enni vüi atungma anging chup la enni Thurai reng chekhai, Lümla pra chanlaira hai prengia maten aia nauah miiawng enni na nowngia tuk la ngamlam kown kow. ¹⁰ Enni chowmkrang uowi krang kowi ün, lupiung chang rakowi ün a-iuih apau tüngah diah, hanow Thurai chanlaira hown awr iuk awr sown hai Chakramang nauah mi krang maten nowngia uowi la kown kow anging chup la enni Thurai reng chekhai. ¹¹ Aia lowra nowngia changlami kraingra hai sanara enni tut-e akhi-khawtma pacham uowi lah, sak khawtma hai nowngia khamsumra mi a awmrawm ma hown enni nowngia uowi la kown kow anging chup Thurai reng khai. ¹² Hanow maru achim asaima mi uüa hai lawm, aia pren nowi kowi kow dawngthawng uan vüi bak na tawi ka la kown kow apiawma hown Thurai kowi awmrawm lai enni nowngia tek la kown kow anging chup enni thurai khai. ¹³ Aiamat dow iiu kowi alow changmi hownia uang lawng uang tang a-i hanow aia Chapa lainowmma sakrauah mi pren kowi kup la a-i khai bowt. ¹⁴ Aiamat Chapa hownia chawng a-i klan a-i khai, a-i ngak ün lawt ta a-i khai bowt. KRIKRAING MIH KRISTA ¹⁵ Krista mi dow nowngia khiah dowi mi Thurai klunguang chekhai. Uan thawp maiow rik thawp miia chekhai. ¹⁶ Mukuang hai krawng kowi kow nowngia khiah mi hai nowngia khiah dowi mi achap hai uan maiow thawp miia chekhai. Aiamat vüi na own la kown kow, mang nanra ün, kri kraingra ün, pren hai alow uowi la mi ün lowra mih aiamat rakowi thawpah mi chekhai. ¹⁷ Aiamat dow lowra mi uowi dowi rawn tak khe uowi khai bowt. Aiamat rakowi lowra mi nowngia uowi mi chekhai. ¹⁸ Aia mi dow buknga, now auan dow powchak lu na chekhai. Aia dow auown, lowra mi kowi na lang kraing la kown kow makowng pungma dawng hownia awr rik rü miia chekhai. ¹⁹ Thurai khowm ta miiawng dow lowra mi Krista hown uang tachi mi khai; ²⁰ Krista rakowi krawng kowi kow uowi miuüa hai mukuang kowi kow uowi mi uüa Thurai hown taking tasangra aia thawpah khai. Kraws luk kowi aia chapa vi hawr mi dow taking tasang müa kowi thawpah khai. ²¹ Achük alai khe dow Thurai hown alakma enni uowi khai, naiawng rakowi enni changah mi lup ngak rakowi enni matia saktuak kowi ransu uang tüng mi chekhai. ²² Krista uang kowng mi rakowi aia buknga hownia enni achim asaima, aser auowk uowi dowi hai Thurai aiamat hown enni nowngia uowi khai bowt mi chekhai. ²³ Hanow Krista satangiung lawnguan kowi enni kow sakowmra dow akhi khawtma hai owmah büah diah, satangiung mi dow mukuang krüa kowi kow uan thawp maiow tut-e cham tek ta khowk mih enni tuk khai, ang Pawl mih mami satangiung lupchang miia dow ang na khai. CHAKRAMANG TUT-E AKHAWTMA NA UOWI KOWN MIH ALOW ²⁴ Akawmat enni matia rakowi ang kham ngare mi kowi ang awmrawm chekhai, langhawah mi uüa vüi Krista khamah mi ngare ang plan kut kham kown mi dow Krista buknga chekhai. ²⁵ Thurai laiklow hai aia khowmah bowkah mi aküm angima langhawah miuüa tut-e na phuang na tek kown mi ang kow kurdik chekhai, naiawng rakowi aia lupchangmi nar lowkia ang na mi chekhai. ²⁶ Achük alai hownia chowng chowng sak sakma petah mi anowm laiklow mi dow akawmat achim asaima mi aia maruuüa tut-e uang tatüng khai bowt. ²⁷ Chaptowng tut-e kow petah mi anowm mami rowsira laiklow aia maruuüa pa tuk pataah kown Thurai down nau khai, nami laipet mi dow, Krista enni matia kowi kraingra sakowm müa lawnguan dow na chekhai. ²⁸ Krista laiklow mi dow maru maiow tut-e anging tek reng chekhai, maru maiow uüa mi Krista chanlaira maten hai nowngia tachi tanawm la bowk kown kow lawngtowng büarüa kowi anging tüngah sangah mi chekhai. ²⁹ Nami nachang la kown kow Krista kraingra ang matia rutchün khawkleng na khai, naiawng rakowi akawm akrat luk hown chepaw ang na chang reng kown.