CHAKRAMANG TUT-E AMIA PAW LANG DOWI ¹ Kimiauüa low, enni mi paw mukuang kowi enni kow aia uowi lowk pa mi tuk la hai enni nar hawmuüa lukkowi achihma hai aiungma kowi chang pe büah diah. TAPE KÜRRA ² Akamrütia ma hown atungma chup Thurai reng büah hanow, enni Thurai chup rakowi awmrawm laiklow tek luk kowi pe la pe ching büah diah. ³ Anging vüi kowi taiua chup la anging Thurai büah diah, nahanow krista lawnguan kowi tapet mi nowngia tuk la kown kow hai Thurai laiklow anging na tek la kownmi kimplaw na tauow la kown kow. Ang lka thawng mi dow naiawng ün mi rakowi chekhai. ⁴ Achima ang na nowngia tek la kown hai achangma ang na nowngia chang la kown kow chup la ang Thurai büah reng diah. ⁵ Owm dowi miuüa tut-e achanlaima uowiah büah hanow, enni kow akhin mi dow aiungma tawngah kengah büah diah. ⁶ Lowra mi khin kowi asüntak iungma iawng prowsang büah diah. Nawm pe awisa mi kan asowr uowima miiawng uowiah büah hanow lawngtowng büarüa kowi ma tawngiawng hai chow na klowpah kown mi enni tuk kown taih. ACHUR AMOWI LAIKLOW ⁷ Sakrauah mi tainau lowkia, Chakramang kowi kaah sakowm mi nar hai Thurai lupchang iua nowmma mi aming Tukik mi ang satang maiow na uang tek enni kown. ⁸ Anging satang enni na tuk la kown kow hai enni na ka low sak khawtra kown kow aiamat kowi ang uang chinah mi chekhai. ⁹ Aiamat hai enni sakowmah mi maru, sakrauah mi tainau Awnesim kowi paw ang uang tawi chinah khai. Ma kowi matawng ngai chow own mi satang na uang tek la enni bowk kown kow. ¹⁰ Ang hown thawng kowi taiua takhang mi Aristarka hai Barnaba tasin mi Mark ape enni achup aiia khai, “aia mih enni tut-e na uang mi khin khe na hawt howrah kown” kow ang rik tek enni khowk. ¹¹ Justa pah hawah mi Isu dow pe enni achup aiia khai. Khampha uan pik hia mi pungma dawng kowi amatni chataih mih Thurai pren vüi kowi tawi khowng chang ang miia nakhai. Kaneuma pe ang sakhawtra chekhai. ¹² Epaphra pe enni achup aiia chekhai. Enni pungma dawng kowi lowkia hanow Isu Krista lupchang mi nar lowkia chekhai. Thurai nauah mi krang iawng kowi owm miuüa ching enni na nowngia own la kown kow tow plawng tow sakma hai Thurai chupra maiow kowi aia lü la leng la enni reng chekhai. ¹³ Enni matia uüa vüi ün, Laodikei maru uüa vüi hai Hierawpawlis kowi kow maru uüa vüi aiamat mi lainowmma hai kaneuchah uan chang alup khai pami ang mi paw ang tuk chekhai. ¹⁴ Sakrauah mi Daktawr Luka hai Dema iüah mi krawi pe enni achup aiia khai. ¹⁵ Laodikei kowi kow uowi mi tainau maru uüa hai Numphi hai aia kim kowi kow Thurai maru uüa luk kowi peah achup aiiara khai. ¹⁶ Ang kow cha mih enni pungma dawng kowi ki phat mi kung kowi Laodikei Thurai maru uüa kowi pa tawi phatah büah diah. Now sünta, Laodikei hownia kow cha na uang towm kown mi paw hut tawi phat büah diah. ¹⁷ Now Arkhip tut-e, “Chakramang lup na chang la kown kow khowm en khowk mi down chur pat na chang la kown kow towk kür diah” pah tek pe büah khai. ¹⁸ Ang Pawl mami cha ang matia rut ngengche hai kow ruiah mi hown chup enni iia enni mi chekhai. Thawng rum kowi kow taprüa tangukra tuk la ang reng büah diah. Sanara enni tut-e pacham uowi reng lah.