¹ Achimsai mih maru-uüa uanpek lawnguan ang narui enni kown mih mapaw hau dowi bowt. ² Enni nau mih krang paw ang tuk, Makedawnia maru-uüa tut-e nowm ang awmrawm khai, amatni kowi ang tek pe mih dow, kowi mih ning hownia akhaiia, maru-uüa uan pek mih dow kamrüt tarüm khowk, enni sowngür rakowi maru akawmma uang sowngür büah khai. ³ Nami iawng rakowi ang tainau kowi ang uang chin enni mih nakhai, tawngplawng kachow panow, iachang dowi mih nadowi kowi enni hown ang iachangla bawri khai, now, ang tek enni iawng enni mih kamrüt büah diah. ⁴ Nahanow Makedoniia lowra maru mih ang tut-e uang khe enni che kamrüt hown uaowi dowi mih uang khi hanow, a-i narukrai kown, enni lawnguan natek kown mih tawng paw ang kowh uowi dowi tham, now kawmat dow, sakowmra atatma enni lawnguan kowi ang ia tow bowt kown. ⁵ Naiawng rakowi angkatuak iawk mih dow, ang tainau mih enni tut-e uangrik uang kown mih nowm hau chekhai, prasira naka kown enni hawt chawng mih nami lawng uan kowi-e nachangla kownkow, naiawng hai kamrüt büah diah, uan pek atuak alangma enni na pela dowi kownkow hai uan pek dow kürhown nadowi chekahi.
ALIU DUP MOWR CHOW NGEN PAW NGEN KOWN
⁶ Alawng auan dow maiawng; a-e chow dup aliu mih dow, a-e chow auih paw nangen kown. Amia chow prasira hownia aliu dupmi dow prasira hownia aia dow aliu nangen kown. ⁷ Kowmatia sak kowi tawngiawng chow sangkrangah khowk iawng nami powmiawng pacham pela, saktuak kowi ngan hai pek takla khai pami rakowi hang cham pela. Tawngplawng kachow panow, sak kowi awmrawma hown pe mih dow Thurai aia kowi dow sakrauah reng chekhai. ⁸ Thurai mih lowra sia kowi uepat prasira iape dowi pabow, nami iawng rakowi lowra khin lowra lawnguan enni nau hai haumi sarui; dow lupiung maten hai purpra kowi san khawk büah diah. ⁹ Chimsai mih sangbowk laitawm kowi maiawng arui uowi, aia dow aia kowh dawngtawng uan ret tape khai, now ngarawng ngarai mih kowi pe khai; aia kowh tachi tanawmra dow chowng chowng sak sakma anik ma uowi reng. ¹⁰ Aia dow khetti chang miuüa tut-e aliu hai nacha kown mih kawmpa ün uangphaw reng, nami klen kowi dupah mih hownia aia dow aliu aphow aphow uang pahu reng, khanow enni kowh tachitanawmra iui paw ahuma nape enni kown. ¹¹ Lowrami pra enni nakureng kown hanow uan pek paw enni iape kown, now maiawng hai a-i mih sakdawng howia Thuria tut-e natek awmrawm laiklow kown takla. ¹² Enni khowng mih hownia chimsai mih maruuüa akhawr uowi dowi kown mih chatai nadowi nami klen kowi Thurai pra kowi chup miuüa ahuma cham tauet mipaw nachekhai. ¹³ Enni owmra khawtma khowk mih mami enni changlup hownia nauang tüng kown, nami khi now amatni mih nakiow Thurai kown nahanow Isu Krista lawnguan kowi satangiung naung owm büah kown, saktuak thaulang prawngma hai enni bowk bowk mih uan pek rakowi chekhai. ¹⁴ Amatni dow enni uüi kowi akrama khowk chup enni Thurai reng. Tawngplawng kachow panow Thurai saksing sanara hai sakowmra enni luk kowi uang takla kownkow chekhai. ¹⁵ Aia uaniawng pek hownia tekah dowi nami dow Thurai chapa Isu Krista rakowi Thurai tut-e awmrawmra pacham uowi lah.