AWMRAWMMA HAI PE UANIAWNG MI UI. MAKEDAWNIA PREN KOWI
THURAI LANGHAWAH MIUÜA PE UANIAWNG MI LAWNGUAN
¹ Tainauuüa low, Makedawniia Thurai lang hawah mih hawmchakuüa kowi Thurai mih sanara pe ang mih laiklow tek enni kown ang nau khai. Nahanow owm khowk miuüa nare kraingma hai kow achangah büah mih luk kowi kaneuma owm. ² Owm khowk miuüa mih akawm kratma ni kowi chepaw amatni dow naiawng chepaw nowm awmrawm büah khai. Amatni nagrawng nagarai mami luk kowi ahuma ia pe büah khai. ³ Amatni vüi ang thuak saksi mih nakhai, amatni mih ka mowr pe büah khai, nami klen kowi paw amatni sak nau ngengche hown paw ahuma pe büah chekhai. ⁴ Amatni dow sakrauma hai owm khowk miuü taming takhet hai takhowng riaria kown uang khowng anging khai nami dow saksing sana uowi ma hai tawiia changla lup bowk kownkow chekhai. ⁵ Anging sakowmah dowi mih iawng maiawng ün dow uang phaw mih chekhai, ngachenganchepaw amatni dow auown khe Thurai kowi rikpe khai, nami kung kowi Thurai nau iawng hai uang pe anging khai. ⁶ Naiawng rakowi Tita kakowi anging khai, aia dow alai hownia enni kowh tüngsangmi nachekhai, tawngplawng kachow panow enni tut-e saksing sanara lupia churla pat kownkow chekhai, Tainau-uüa kowi chang lup iung riaria kown mih dow, CHAKRAMANG Isu Krista dow kawklaw mami chowmkrang uowi krang iawng chekhai. ⁷ Nachenganchepaw lowra lawnguan kowi enni dow owmra khawtmami na, sangprowk lai tek kowi ün, prengia pra ün, sang kown mih ün hai enni sakraura angiang luk kowi klanmi dow enni tut-e paw ngengche nami saksing sanara alup mih uang klami nachekhai. ⁸ Nami laiklow mih ang pe ana kowh tek mih nadowi, enni kowi nowm nowm sakraura kowi hai akeng mih maru kawmkrang hown paw iatatu dowi bowt rakowi chekhai. ⁹ A-i CHAKRAMANG Isu Krista saksing sana mih krang dow enni tuk khowk. Aia dow kurengma chadiah nachepaw enni rakowi ngarai khai. Tawngplang kacha panow aia ngarai rakowi enni nakureng lakownkow nami chekhai. ¹⁰ Nami lawnguan rakowi tawngiawng chow enni iungiawng ang tek enni mih nakhai. Kowi mih ning hownia sowngürma hai enni uown chang khai. nachenganchepaw naiawng ündow enni chang kown mih nowm enni sakkrai rakowi angpe enni prengia kown mih nakhai. ¹¹ Nami lup khawtma chur tabüah tawngplang kachow panow, sak kraingma hai sak i-ma lup changah büah diah, nahanow enni matia kür hai lup dow enni naia chur kown. ¹² Now, sangürma hown chanlup mih dow, nami lup dow langtachi tanawm khai, nami dow iatawng keng now, alawnguan hai lupiung kaah akumük khai, lowkia maru kowh tawng paw uowi dowi now, aia tut-e dow tawngpaw lü dowi chekhai. ¹³ Nami alup kowi akeng mih asowrma nauowi kown enni nabowm kown mih ang nau dowi, ang naumi dow kureng ngarai katsang nauowi kown mih chekhai. ¹⁴ Purpra kowi enni mih, dawng thawng uang uowi mih khawr miuüa kowi tape riaria hai kureng ngarai katsang naia uowi kown mih ang nau. ¹⁵ Maiawng arau uowi khe, süngrüp süngkang makowi, ahuma manna kaah büah khai, ahuma kua mih paw langka hu dowi adid chow kua mih paw langka e dowi chekhai.
TITA KOWI KAWRINT KUA KOWI SA-AH MIH
¹⁶ Enni vüi kowikow ang towngplang towsakma mih Iawng uan dow, Tita sak kowi pe hai ming khet mi-ia Thurai tut-e awmrawm laiklow pacham uowi lah. ¹⁷ Aia mat dow anging lüah mih chatai na dowi, aia mat towngplawng towsak mahai aia sakrau mih rakowi enni tut-e uang mih chekhai. ¹⁸ Tita tut-e anging kow tainau kowi paw uang krawi chin enni khai, aia dow Thurai lamghaw amih hawmchakuüa tut-e satangiung phuang mih kowi ming iung mami nakhai. ¹⁹ Nami klen Thurai langhaw amih hawmchak miuüa nümnap mih paw nakhai, CHAKRAMANG aia mat kiowrira, saksing sanara lup hai anging sowngür-ra natüngla kownkow langruiah mih chekhai. ²⁰ Mami krikrangmi uanup krawipawla kownkow anging tainau kowi anging ung chinah mih nachekhai. Amia iawngpaw anging luk kowi angakia pela dowi kowh na khai. ²¹ Thurai mik mük kowi ringkaw iawng hai anging chang mih na dowi maru pur kowi paw naiawng hai anging chang mih chekhai rowt. ²² Nami klen kowi tainau akeng mih kowi paw enni tut-e uang krawi chin khai, aia dow nami lup kowi nowm nowm sowngür mih hai owmra paw nowm nowm iakham khai, nami dow ahuma amatra anging khi khowk, naiawng rakowi uang chin enni mih na, tawngplang kowchow panow, aia dow enni luk kowi sakowmra ahuma uowi chekhai. ²³ Tita vüi kowi-e aia dow, enni hown tahum hanow, enni kowi tawi khowng mih na, Thurai langhawah mih hawmchak uüa Krista kiowri tawngtara nakala kownkow anging tainau kowi krawi chin mih na. ²⁴ Naiawng rakowi amatni kowi enni kowh sakrau mih tüngpe büah diah, amatni kowi enni tüngpe mih hownia enni hai anging hownia akengmi chauüa paw ia awmrawmla kownkow chekhai.