¹ Nahanow ang sakrauah mih tainau uüalow, mami lai kham mih dow a-i kakhai rakowi hai lümla pra asür alawkma mira hownia Thurai ringkaw hai achim asai mamira kowi dow CHAKRAMANG kram hai achim sai mih tiama kowi a-i mang diah sik.
PAWL AWMRAWM MIH ² Enni sak kowi enni vüi uowira thawpah büah diah, tawngra kowi chow panow, amia kowi paw angak anging chang dowi, mia kowi paw piakah dowi lowra mih kowi puanah dowi chekhai. ³ Nakuak enni asum kownkow mami laiklow ang tek mih na dowi; tawngra kowi chow panow mami rik tek enni khowk, anging sak kowi enni uowi khai, kawm chepaw taiua kawm kown, sing chepaw taiua siang kown chekhai. ⁴ Enni luk kowi angsakraura akhawt ma uowi, enni rakowi sakkhawtra ang ka khai. Bowk bowk aprür aiia hai kawm krat kowi paw sak khawtra akümma hai awmrawmra atekma iaka khai. ⁵ Makedawniia pren ang uang ting khe paw ang kawm mih mapaw prowng dowi, lowra mih prakowi kawm krat anging ka khai, tawngplawng kachow panow, prang kowi tasen klow rakowi sak dawng kowi kram hili chekhai. ⁶ Nachenganchepaw Thurai pe saktauak khowk miuüa kowi aia dow pe sak khawtra now Tita uang ting mih hownia pe anging sak khawtra khai. ⁷ Now, Tita uangting mih chatai nadow; enni howia anging ka sak khawtra mih na khai; naiawng rakowi anging paw ka sak khawtra mih chekhai. Enni saksing sana mih hai aprüa aiia laiklow uang tek anging khai; enni mih ang vüi kowi tawngpaw towsak mih krang ün nami rakowi nowm nowm awmrawmra ang kakhai. ⁸ Ang chasak pe enni aprüa aiia khai hanow, ang sak plan nga khai iawk, nachenganchepaw mami chasak mih nawngcha mowr chatai nape enni aprüa aiia kown pami alenma ang tuak rakowi ang sak kut plan nga dowi iawk chekhai. ⁹ Kawmat dow nowm ang awmrawm khai enni sak taprüa khowk mih rakowi enni sak taprüa mih hownia diasarra kakhai mih chekhai, Thurai nau mih iawng rakowi enni sak tapüara ka mih na khai, tawngplang kachow panow anging hownia lowra lawnguan kowi enni napiak ladowi kownkow chekhai. ¹⁰ Thurai naumi krang iawng taprüa tanguk mih rakowi angak howia lawngra iakala kownka diasarra kowi nakhowng enni kown, nami dow sakraura na dowi, nachenganchepaw lusa hownia kowh aprüa aiia uang ting mih dow kowngra nauang pawla kown chekhai. ¹¹ Sünta diah Thurai nauiawng rakowi sak tapüa tanguk mih dow sak kowi tachi tanawmra uangpaw lakhai, enni sak kowi nau mih iawng dow enni matia mih angak uowi dowi bowt iawng thuak saksi mih. Angak dow mün khowt chow suiiai kaniai mih, kramra uowi mih atuak uowi mih dow angak kowi natowk ngare kown mih chekhai. Maiawng ün lowra mih hownia enni dow angak uowi dowi chekhai. ¹² Enni tut-e ang krawi rui enni mih chasak chekhai, nachenganchepaw angak chang miuüa kowi nadowi; Thurai pur kowi ia tatüng hai lainowmma enni sakrau mih tukla kownkow chekhai. ¹³ Naiawng mih rakowi anging sakraura kakhai; Tita kowi howrmi rakowi ang awmrawm ngamlam khai enni bowk bowk mih aia sak kaneuma enni klampe chekhai. ¹⁴ Aia tut-e lowra lawnguan kowi enni matia rakowi ang chang bawri khai hanow, mapaw nami kowi ang rukrai dowi chekhai, aia takcha kowi-e lainowm ma hai ang tek enni mih chekhai. Tita tut-e dow nami iawng anging chang rakowi mih dow enni vüi awmrawm mami uang phaw khai. ¹⁵ Now enni bowk bowk mih kram hai hawt howr mih krang ün enni changpe khai, nami kowi tukla reng hai aia sak kowi enni, enni luk kowi tasakraura uang hu ngamlam khai. ¹⁶ Ang nowm nowm awmrawm iawng dow lowra mih enni luk kowi ang akhawtma hai sakowmra kami rakowi chekhai.