CHINTAKMIUÜA AKAWM AKRAT HAI AWNGRA
¹ Thurai sanara mih dow asung uowi dowi iawng hang kowh hawt paw büah diah, anging Thurai lupchang mih mami dow uanglü enni. ² Nahanow aia dow tek khai, akhin taka makowi enni chup ang mih ang sünta enni, lawngra ni mowr pat ang khowng enni, sünta diah kawmat mih akhin taka mih dow nami chekhai, kawmat mih lawngra ni dow na.
PAWL KHAM NGARE MIH
³ CHAKRAMANG tiama kowi mangthüm khe lowra maru mih natauowk lakown mih lup dow anging chang dowi chekhai. Tawngra kowi chow panow, nami taming takhetra lupchang neplawng nesak dowi kownkow hai anging sakowmra kaah dowi iawng phawdowi kownkow chekhai. ⁴ Thurai nar anging na khai; lowrami lawnguan kowi tawi dowi iawng tatüng reng khai; kunma thawngma, nowngpowng chang, ngarera, aprüaiia uowi chepaw aia nar pami tathuak saksi reng chekhai. ⁵ Kunma thawngra chaing chaing ngre kham akawr awng phima, thawng kowi tabawpra kawmkrat mün ni chow müi dowi hai uowi mih. ⁶ Chinawm mih chownglawng hownia prengia ün ia khamra ün aiungra ün lümlasai hai sakraura ün. ⁷ Chinawm mih laiklow phuangra hai Thurai kürra hownia anging mih thuaksaksi reng. Pre rut hown tasen tawnguat anging paw hanow Krista chintakmih anging pe saksi reng chekhai. ⁸ Anging lawnguan kowi-e aiung hai angak tek chepaw kiowrira hai nüklowk dowi chepaw aning chang lup reng chekhai, maruuüa mih dailaiküa pahai angak pe chepaw anging dow achianawmma pami anging tatuk reng chekhai. ⁹ Anging chang lup reng chepaw miapaw tuk anging kown na büah dowi, nachenganchepaw lawngtowng büarüa hingtuk anging khai. Kowng iawng tai anging uowi khe anging asak uowi reng tak, tarip mira anging krum nachepaw asakmi dow hingpaw anging dowi. ¹⁰ Aprüa angukma nachepaw atungma anging piaw reng khai, ngarawng ngarai ma chepaw akeng miuüa kowi dow anging pakurengah khai. Anging kowh tawng paw uowi dowi, tawkche dow bowk bowk iapowng mih anging nakhai. ¹¹ Aw Kawrint owm Thurai khowk miuüa low, enni tut-e laiklow achangma hai saktuak prawngma hai anging uang tek mih chekhai. ¹² Enni matia tut-e dow thaulangra enni kakhowk nachepaw enni sak kowi dow thaulangra kadowi tak chekhai. ¹³ Chauüa kowi powmiawng angtek enni kawmat aia uangtape iawng enni matia paw tape hanow sakkraing ma uowi diah. ¹⁴ Owm dowi miuüa hai hangka tabak lai thawn tim büah diah; tachi tanawm mih hai angak chang mih nowia tabawng mih matawngra kowi chow uowi? Nowi hai aiu paw nowia tahum kakat tak bow? ¹⁵ (Belian) Setan hai krista mih tatura uowi bow? Nami klen kowi owmdowi mih hai owm miuüa tawng chow powng kown mih uowi? ¹⁶ Thurai tempol hai arup ren miuüa tatawm mira uowi khai pabow? A-i mih dow masing Thurai tempol nami chekhai, Thurai mih sangbowk laitawm kowi tek mih amatni tut-e ang nauowi hanow ang hing uowi la kown amatni Thurai ang naown hanow amatni mipaw ang maru-uüa naown büah kown pakhai. ¹⁷ Naiawng mih rakowi amatni pungma dawng hownia cham lawt büah diah, hanow akeng kowi chamlang uowi büah diah, asür alawkma mipaw hang ka cham kak büah diah, nahanow ang nahowr enni kown. ¹⁸ Enni kowh Pa ang na own hanow, enni mih paw ang chapa chama naown kown, langkri langkraing mih CHAKRAMANG dow mami laiklow mih tek khai.