MUKUANG KOWI A-I KOWH UOWIRA
¹ Mami lusa tangbung krüa kowi a-i uowi mih a-i tatuk khai, nami buk nga napiak natama kown, nachepaw Thurai thawp a-i mih kim dow uowi khai, lusa maru rut hownia kowh tawpah mih na dowi, chowng chowng saksakma anikma uowira dow mukuang pren kowi chekhai. ² Akawmat a-i buk kowh iahüsak mih akawmma uowi khai; sakdawng hownia a-i nau mih Thurai pren kowikow buk nga sar thawpah mih chekhai. ³ Naiawngmi buk kowh a-i kakhai bowt mih khin dow tengiow tengklaima hai uowi dowi bowt tham. ⁴ Kawmat kowh chownglawng dow kür uowi dowi chekhai, tawngplang kachow panow a-i tengiow tengklai ma a-i nau dowi uansar a-i khup kown nau, kowngra alow kowi uowi mih buk nga dow chowngma singra takling taklai kown mih a-i nau rowt mih chekhai. ⁵ Thurai thawp a-i mih dow tawngra kowi chow thawp a-i uang tow dawng pün chia mih iawng pe a-i lümlasai mih chekhai. ⁶ Naiawng rakowi a-i sak kraingma nakhai, a-i tut khowk mih iawng dow mün ni chow buk nga uowi mowr dow chownglawng kowi a-i uowi reng tak, nachepaw Thurai hownia dow a-i tala ngamlam reng tak. ⁷ Owmra hownia chownglawng uowi khowk chepaw mik khi hai mü now aia kowi khi dowi mih pra a-i mang rowt mih chekhai. ⁸ Sak kraingma hai a-i uowi khai, ngachenganchepaw kowh kür hownkow nadowi, CHAKRAMANG Thurai tut-e uowi mih langiung rowt pahai a-i sak kraing uowi mih chekhai. ⁹ Kim üa hai a-i uowi khowk chepaw akeng prenn chak a-i nakhai, naiawng rakowi a-i nau mih dow Thurai awmrawmra nakala rowt kown mih chekhai. ¹⁰ Krista tarachetra nanra pur kowi a-i bowk bowk naiowng kown, buk nga sing uowi sakuowi khe kowh aiung chepaw angak chepaw a-i bowk bowk nami sung dow naka kown. ¹¹ Nahanow, kramra uowi nami krang natukla kownkow maru uüa tut-e a-i phung rowt mih chekhai, a-i amia iawng mih chow Thurai achangma tuk, enni atutk kowi nami dow achangma khowk pami ang sakowmra uowi chekhai. ¹² Anging mih enni tut-e kowmatia takiow mih nadowi, anging hownia enni paw sakhüra kala kownkow chekhai. Saktuak kowi müdowi hai prang pra mü takiow miuüa kowi amatni kowi enni mih ia klangla kown kowh chekhai. ¹³ A-i prengia kadowi chepaw nami paw Thurai alow chekhai, now prengia iung phaw khai chepaw nami dow enni uüi kowi iung müa chekhai. ¹⁴ Krista sakraura dow nowngta ang khai maiawng ang katuak khai, maru bowk bowk vüi maru lowkia uang kowng khai, naiawng rakowi maru bowk bowk mih uang kowng mih uang nakhai. ¹⁵ Sing uowi miuüa dow kowmatia vüi kowi singuowi mih nadowi bowt, amatni rakowi uang kowng khai bowt, nahanow awrkut plan rükhai aia vüi kowi nasing rowt kown mih nakhai, tawngplang kachow panow krista mih bowk bowk uüi kowi uang kowng khai bowt chekhai. ¹⁶ Naiawng rakowi kawmat hownia lowra maru kowi iawng pami maru iawng anging müah hai chetpe tara dowi bowt, pakat khe krista kowi paw maru iawng anging müah hai chetpe tara khai chekhai, nachengachepaw amaia kowi paw kawmat dow naiawng hai anging müah dowi bowt. ¹⁷ Lowra maru krista kowi uowi khai bowt midow uanthawp sar uang nakhai bowt, uan prim maiow dow tama khai bowt sünta diah uang sar khai bowt tak. ¹⁸ Maün maiow mih Thurai changah bowk mih chekhai, aia mat dow Krista hownia uangsawm ta a-i khai. Akeng miuüa hai natasawmla kownkow taming takhetla kown mih lup uang pe a-i mih nakhai. ¹⁹ Thurai mih Krista hownia lusa kowi uang tasawm khai, amatni angak tawima khowk mih dow klowk pe dowi hai natasawmla iawk kown kowh satangiung phuang kurdik pe anging mih chekhai. ²⁰ Nahanow Krista mang ria mang mih powmiawng anging changmi lup mih na khai, Thurai mih anging hownia aia matia mih uanglü khowk chekhai, now Krista takcha kowi-e Thurai hown katsang tasawm lakown kowh anging uanglü en mih chekhai. ²¹ Aia dow angak uowi dowi nachepaw a-i ngakra kowi Isu Krista mih dow uang tawi tahumla a-i khai, Krista Thurai tachi tanawmma rakowi a-i paw tachi tanawmma mih chekhai.