¹ Nahanow nataming takhela kown mih kurdik alup anging kakhai bow, naiawngra kowi Thurai sanara paw anging ka khowk rakowi angingia tanua dowi bowt chekhai. ² Now, akeng miuüa dow rukrai hai kukpa changlup büah reng nachepaw anging dow chang dowi chekhai. Thurai laiklow mih atawima hown anging phuang dowi; Thurai pur kowi tachi tanawm iawng tüngse maru saktuak kowi kowmatia tataing mih iawng changah rowt chekhai. ³ Satangiung che a-i phuangta khai hanow piak hai tama khowk miuüa tut-e paw taphuang reng kown. ⁴ Kawmat kowh chowng dow khampha dow krui town lusa miuüa owm Thurai dowi rakowi amatni Thurai maru saktuak du tape khai, tawplawng kachow panow Thurai a-i klung klang powmiawng mih krista kraingra satangiung anowi mih amatni nakhila dowi kownkow chekhai. ⁵ Anging matia satangiung tekmi nadowi Isu Krista CHAKRAMANG pami tekmi chekhai rowt nami klen kowi Isu Krista rakowi anging matia mih aia nar chekhai. ⁶ Thurai aia mih tek khai, “iui kowi nowi pacham uang uowi lah” aia dow a-i sak kowi anowi uang sawt a-i khai. Tawngplang kachow panow aia krikraingra tukla kown kowh anowi uangta tüng khai, nami anowi dow Isu Krisata lumowr kowi uowi mih chekhai. ⁷ Nachenganchepaw dawngthawng uanh dow pulak kowi a-i towah mih chekhai. Nami pu dow ai nami chekhai. nami krikraingra a-i hownia kowh na dowi, Thurai howia kowh uang ting pami maru miuüa tuk kown takla khai. ⁸ Lowra mih pra kowi kawmkrat anging kowh uowi, nachenganchepaw anging piak dowi hai tuak achang kadowi chepaw anging tanua dowi. ⁹ Krawng kowi theu anging chepaw anging teu dowi, nawngpowng chang uang ting chepaw Thurai dow tawi uowi a-i reng chekhai. ¹⁰ Anging matia kowh howia Isu dow singra na pami tatüngla kownkow atunngma Isu Krista kowng khowk mih auak anging kawt reng khai. ¹¹ Anging sing uowi reng tak chepaw Isu krista rakowi kowngra atungma anging taap khai, tawngra kowi chow panow anging kow kowh buk nga hownia Isu dow singra pami iatüngla kownkow chekhai. ¹² Nahanow anging matia mih kowngmüa lup iawng anging changreng khai, enni tut-e amatni kowi tarapche dow singla müa lup chang mih chekhai rowt. ¹³ Anging kowh owmra khawtma uowi, aia lümla mih tawi uowi anging reng chekhai. Chimsai mih sangbowk laitawm kowi arui uowi mih ang owm khai naiawng mih rakowi angtek chekhai pakhai, naiawng mih owmra saktuak uowi hai a-i uüi paw owm khai laiklow paw a-i tekreng mih chekhai. ¹⁴ CHAKRAMNG Isu Krista kowi Thurai mih awr krüngta khowk, aia dow Isu rakowi naküng a-i kown, enni matia hai aia pur kowi nalawng a-i kown pami a-i tuk. ¹⁵ Maiawng ün maten mih enni naiungla kownkow phawmi chekhai. Thurai sanara maru kawmma pungma dawng kowi uang khük pe a-i khowk, nami sanara mih kala kownkow hai Thurai kowi kiow hai awmrawm laiklow ahuma natek kownkow chekhai. ¹⁶ Nami iawng rakowi a-i tanua kown nadowi a-i kowh buk nga piak khowk chenganchepaw a-i kawlak kowikow maru dow nitowng asar kowi thawpah rowt chekhai. ¹⁷ Mami akhin nawng chakowi-e a-i kham ngare mih rakowi chowng chowng saksakma Thurai krikraingra hai nowngia nowkah, nowngia khaiah dowi mih a-i naka kown. ¹⁸ Tawngplang kachow panow nowngia khiah mih pra kowi a-i tangmü mih nadowi nowngia khiah dowi mih pra tangmü rowt mih chekhai. Khiah mih chap dow nawngcha kowi nowngia tama khai nachenganchepaw khiah dowi mih chap dow chowng chowng saksakma nauowi kown.