¹ A-i takiow mih iawng kawmat mih uang uown nakhai bowt chekhai bow? Anging hownia enni, now enni hownia anging, kiowri tawngtala mih chasak mapaw hau dowi, nami klen kowi nacham pawla chasak kown mih tawng bak miuüa tut-e hau chekhai bow? ² Enni matia mih anging kawlak kowi kowh ruiah mih chasak dow enni chekhai. Namichasak dow phat hanow tuk kown tai bowt sow. ³ Nahanow enni mih krisata chasak nami chekhai, a-i taming takhet mih aiui apau uang tüng reng, mangtui hown kowh ruiah mih nadowi, masing Thurai lümlasai hownkow ruiah mih chekhai hua pher hown kow ruiah mih nadowi kowh buk nga lak kowi kowh sak iuih kowi ruiah mih chekhai. ⁴ Anging mih krista hownia Thurai luk kowi owmra khawtma uowi chekhai. ⁵ Anging matia powihia hown tawng paw anging ia chang dowi, nachang kown mih tachi tanawmra dow Thurai hownia kowh uang ting mih chekhai. ⁶ Aia matmi sangbowk laitawng sar natukla kownkow tachi tatawm iawng uang thawp anging khai nami dow chalung hownkow ruiah iawng nadowi lümlasai krui town mih hownia tachi tanawmra uang thawp anging mih chekhai, tawngplawng kachow panow ari-arow krowng chow nachun kown mih na dowi lümlasai dow achowngma singra uangpe mih chekhai. ⁷ Sangbowk laitawm prim rirow dow hua kowi arui uowi nachepaw ari-row krowng üchow aiui dow kowng müa nami sangbowk laitawm uangting khe Thurai krikrainra iawng tatüng khai. Nakhe Thurai krikraingra hown Mosi lumowr dow anowi ma uang nowi khai. Nami anowi mih uang-e rürü chepaw Israiluüa mih Mosi lumowr pra iamü büah dowi chekai. ⁸ Nami ari-row aiui maiawng khowt krikraingra uang tachi khai hanow lümlasia hown kowh lupchanra aiui ngam padow achi anawmma hai krikraingra phaw dowi tham pabow? ⁹ Now, kuakah sum kown mih ri-row khowm padow, krikraing khai hanow achi nawmmami ri-row ngam padow munkhowt chow nakrikraing kown mih. ¹⁰ Kiowrira hai tachira mih alaimi khin khe dow ahuma chadiah nachepaw kawmat dow kiowrira mih uowi dowi, tawngplawng kachow panow aia ari-row mih krikraingra lang hurowt chekhai habow ¹¹ Achur uowi khai bowt mih che krikraing khai bowt hanow iatama dowi hai achowng ma uowi kown mih ngam padow münkhowt chow krikraingra nauowi kown mih. ¹² Naiawng mih sakowmra dow akawtma anging kowh uowi khai, ka khai rakowi sak kraingma hai anging tek laiklow khowk mih chekhai. ¹³ Mosi chang mih iawng dow anging chang dowi chekhai. Aia mat dow anowi tama kownkow mumta lumowr khai. Israel chauüa mih aia lumowr mih nakhi la dowi kownkow chekhai. ¹⁴ Nachengachepaw amatni saktuak dow akawtma phaw büah khai, sangbowk laitawm prim kowikow phat hanow, sakdawng kowikow mumah mi ia tahowu dowi nahanow krista kowi dow mata büah khai; ¹⁵ Kawmat paw Mosi chabowih phat hanow Israeluüa sak tamum iawng uowi reng tak. ¹⁶ Nachenganchepaw amatni kowh sak Thurai pra uang dang khe dow, amatni sak kowi tamum mih howuta hanow kuakta büah khai. ¹⁷ CHAKRAMANG mih dow lümla chekhai, CHAKRAMANG lümla uowiah mih sarui kowi thaulangra kareng khai. ¹⁸ A-i nawr kowi tawngpaw tamum mih uowi dowi, nawr mih nimrua iawng CHAKRAMANG Isu Krista krikarngra hai anowi mih dow chamsawt reng khai. Naiawngün lup maten lümlasai hownia uang phawmi iawng rakowi CHAKRAMANG powmiang hai salow chowchi uangtakling taklai reng chekhai.