¹ Naiawng rakowi ang matia tatuak mih dow maiawng saktuak krat hai pusa mih khin khe enni tut-e ang uang ting dowi tham. ² Ang mih enni kow sak hing ngata enni khai bowt hanow, ang kowi miachow nape ang awmrawmra kown chow? Miachow ang hownia ang pe sakngara mih kabüah hownia chatai ang naka awmrawra kown. ³ Ang uang mih khin khe napa awmrawm ang kown mi-ia maten sakngara kadowi kownkow nami chasak ang uangrui mih chekhai, tawngpalawng kachow panow enni bowk bowk luk kowi ang sakowmra akhawtma uowi ang awmrawm mih dow enni paw awmrawm mih chekhai. ⁴ Mik tui ahuma kla hai aprüa aiia hai saktuak kawm kratma hai enni tut nami ang uang rui mih chekhai ang pe enni sakngara kownkow nadowi tawngpalawng kachow panow ang sakrau enni krang enni natukla rowt kownkow chekhai. ⁵ Aprüa anguk peang miuüa tut-e laiklow arangma tek dowi hai maiawng ang natek kown ang kowi pe aprüa anguk mih chataih nadowi, a-e chow chepaw pe enni taprüa tanguk mih chekhai. ⁶ Enni pungma dawng kowi tawng bak mih maru towkah ngare khai, nami dow aia vüa naiung kown taih bowt sow. ⁷ Nahanow aia kowi dow towk ngare mih takcha kowi sana büah hanow peah alawt hai peah sak khawtra büa diah. aia mat dow ahuma saktuak ngak natanua ün tarawng. ⁸ Nami iawng rakowi lainowmma hai ang uang phowng enni mih dow aia mat kowi dow enni sakrauah chekhai pami tüng pe büah diah. ⁹ Lowra mih lawnguan kowi enni chüntak chünchü pami hai achaing takla mih ang nanowngia tutkla kownkow ang uang krawi rui enni mih chekhai. ¹⁰ Lowra maru enni lawtah mih sarui ang mih paw ang natawi lawtah kown, lowra mih ang lawtta khai mih dow enni matia rakowi krista pur kowi ang nalawtah kown. ¹¹ Naiawng nadowi hanow setanmi prengia hown narik owtta iawk tarawng, aia kowi angak sangkrangra maiow dow a-i tukah dowi mih tawngpaw uowi dowi bowt chekhai. ¹² Krista satangiung natekla kownkow Toras marow kowi ang kowting khowk chekhai, nakhe CHAKRAMANG dow ang pur kowi lupchangra tiama uow ang lowk chekhai. ¹³ Nachepaw ang tainau Tita kowi ang krum dowi rakowi kaneuma ang sak tuak krat chekhai. Nahanow amatni kowi ang pe achup aiia now Makedawnia pren pra kowi ang cham kowi takhai bowt. ¹⁴ Thurai tut-e nowm nowm ang awmrawm khai aia mat dow Krista rakowi atutngma nowngia awngla mih tiama kowi uang pawla a-i ngamlam khai. Krista lawnguan tutk müah dow namiung iawng hai lowra mih ra-e a-i hownia namiung cham tauet mih paw nakhai. ¹⁵ Lawngra kowi uowi thüm miuüa hai tama thüm khowk miuüa tut-e a-i dow Thurai tut-e krista namiung mow powmiawng nami chekhai. ¹⁶ Achowngma siangra kadowi miuüa tut-e dow a-i mih kowng khowk mih makowng namiawng nachepaw mia chow lawngra ka khowk mih tut-e dow chownglawng namiung mami nakhai, now, nami aiui dow achowng ma siangra chekhai. ¹⁷ Naün mih lup kowi dow amia iawng mih chow nanowng tachi tanawm kown?