CHINTAK MIH PAW CHASAK PRE KAT
¹ Ang Pawl mih Thurai nauah mih iawng Isu Krista chintakmi ang nakhai, aw tainau Timawthe dow Kawrint marow kowi kauowi mih Thurai hawmchak hai Akia pren paprenma kowikow maru achim asaima uowi mih maten kowi kabüah tut-e nami chasak ang rui mih chekhai. ² Thurai a-i kowh pa hai CHAKRAMANG Isu Krista hown kowh sanara hai taking tasangra enni tut-e pacham uowi reng lah. ³ A-i kowh CHAKRAMANG Isu Krista mih pa hai Thurai rakowi thaulangra uowi khai, aia dow saksing sanara pa hai sak khawtra ia pe mih Thurai. ⁴ Aia mat dow a-i kham ngare mih hai pusa krat mih khin khe uang pe a-i sak khawtra reng, Thurai uang pe a-i mih sak khawtra hownia a-i paw akeng mih kham ngare miuüa maten kowi tawi nowngia pela sak khawtra kown kowh chekhai. ⁵ Krista kham ngare mih powm iawng a-i paw ngare ahuma nakham kown mih kla khai. Nami iawng rakowi krista hownia sak khawtra paw ahuma a-i planka reng mih na khai. ⁶ Nachenganchepaw anging kham ngare mih dow enni sak khawtra hai lawngra nakala kown kowh chekhai. Nahanow anging kow sak khawtra mih hownia, enni paw tawiia sak khawt kownkow; now, angiang iawng enni paw tawi kham ngare kown khe mami sak khawtra dow kunkaw klamma hai ia khamla kown mih tawi khowng enni kown chekhai. ⁷ Ngare enni tawita hum khamla angiang mih powmiawng, sak khawtra paw enni tawi tahum mih nachekhai. Nami iawng rakowi enni lup kowi sakowmra akhi khawtma anging ka khowk chekhai. ⁸ Tainau-uüalow, Asia pren kowikow anging kham ngremi krang enni tuk dowi kown mih anging nau enni dowi chekhai, nakowi nowngia khamah dowi pusakrat kurdik mih uang mum anging khai, nasingla kown mih sak owmra khowm dow anging taming dowi bowt. ⁹ Nakowng ngengche kown khaleng dow pahai anging tatuk khai, nachenganchepaw nami uang phawmi dow, kowmtia luk kowi neplawng nesak dowi hai kowng khowk miuüa kowi krüngami-ia Thurai luk kowi neplang nesak rowt kown chekhai. ¹⁰ Aia dow kowngra hownia anging uowi mih kowi dow uanglawng anging khai. Naplan lawng anging iawk kown chekhai. Aia luk kowi anging sakowmra khawtma rakowi naplan lawng anging iawk kown. ¹¹ Thurai kowi chup hai enni tawi khowng aging reng chekhai, tawngbak miuüa chup Thurai rakowi saksing sanara akumüma anging ka khai. Naiawng rakowi Thurai tut-e maru kawm ma natek awmrawm laiklow kown. ¹² Anging tanü mow powmiawng hai lusa maru sangching hai alawnguan mih anging uang phuang, nachepaw Thurai hownia kowh pe anging mih saktuak iung achianawm ma, saksing sanara hownia mami lusa kowi enni matia pungma dawng kowi anging chownglawng uang sun reng chekhai. Nachenganchepaw maiawngün dow lusa prengia hown krui town anging kowh nadowi chekhai. ¹³ Anging kow chasak kowi matawng lawnguan kowi paw rui dowi lowkcha mih lawnguan rui enni mih chekhai. ¹⁴ Akawmat mih achima tukta bowk dowi tak chepaw CHAKRAMANG Isu uang kown mih ni kowi dow anging tawisakowm mih enni tawisak owm mih lawnguan natuk bowk kown. ¹⁵ Now, maiawngün lawnguan kowi sakowmra akhawtma ang kowh uowila khai rakowi enni tut-e nauang kown mih ang kamrüt tarüm khowk chadiah. Tawng palawng kachow panow prekat mih kowi enni paw tawiia ka prasi kownkow chekhai. ¹⁶ Nahanow, angsangkrangta khowk mih Makedawnia pren ang nakrawi len hanow, enni kowh marow kowi ang uang kown, nami kung kowi Makedawnia pren kowi ang kowkowi now, enni kowh marow kowi uang plan uang iawk kown mih ang tuak khai. Nami klen kowi Judai pren pra kowi ang mangla kown mih enni natwai khowng ang pami sakowmra tatma ang kowh uowi chekahi. ¹⁷ Naiawngün ang sangkrang takhowk mih ia paw kown hai ia nik dowi kown mih ang tuak chekhai habow? Iawng pami lusa maru sangkrang mih nachow, pakhai. Nadowi nadowi pow tek naklak mih ang nakhai mih chekhai bow? ¹⁸ Nachenganchepaw Thurai tut-e sakowmma rakowi mami ang tek mih nachow pami dow nadowi nadowi pow paw dowi, phaw dowi tham. ¹⁹ Tawng palawng kachow panow, ang hai Siluan hai Timawthe mih enni tut-e satangiung anging tek khai. Isu krista Thurai chapa nachow pami dow nadowi pahai haw dowi, lowra mih akhin khe nachow pahai phawreng chekhai. ²⁰ Nahanow, Thurai laikham maiow midow aia mat hownia nachow pami dow nachow pareng chekhai. Naiawng rakowi a-i hownia Thurai kiowri tawngta nakala kownkow Isu Krista rakowi amen pa a-i iatek mih chekhai. ²¹ Anging hai enni matia kowi aia dow Isu krista hai uangsawmta a-i khhowk, now nümnap anging khai nami dow Thurai chekhai. ²² Aia mat kowh a-i nakhai rakowi tukpe mur iawng uang mat a-i khai, achuk khe aia pe a-i mih dow a-i saklak kowi lümlasai uang pe a-i khai. ²³ Nachenganchepaw, angmatia asak lüklau hai Thurai kowi towla saksi khükhü ang tek khowk, taking tasangra enni tut-e pacham uowi reng kownkow kawrint kua kowi ang uangla dowi mih chekhai. ²⁴ Enni owm mih luk kowi nachang alow kown anging tuak dowi chekhai. Enni awmrawm müa enni hai anging ahawm sang taiua changlup mih na khai. Tawngpalawng kachow panow owmra akhawtma hai enni ia iowngla kown kow chekhai.