PAWL CHINTAKMI HAI KRIKRAINGRA
¹ Ang Pawl Krista aia mat tachi tanawmra hai anowm anamami ang krawi ma enni mih enni pur kowi ang mih tachi tanawm hai anowm anama ang uowi pamih enni tek mih ang ta, Nachenganchepaw enni uowi dowi mih khin khowk khe enni vüi kowi-e lainowm ma krat khai pami ang tuk. ² Ang uang planma enni mih dow, enni pungma dawng kowi ang uowi mih khin khowk khe, namih khin khowk khe owmra khawtma hai aratma ang uowi kown mih matawng paw hau dowi, ang tuak mih dow ang kowi akratma ang na towah kown, nami khin khowk khe ang dow amatni kowi-e hangah reng, buk kowh hai a-i uowi pa tuak miuüa kowi ³ Buk kow alow iawng uowi nachepaw, buk kow hown a-i tasen mih paw na dowi. ⁴ Tasen müa hown a-i tasen mih nami dow buk kowh vüi a-i tasen mih na dowi. Nami klen kowi amatni kowh dow lusa kürra uowi, namih kowi nanowngia kala kown mih dow Thurai tut-e kürra uowi. ⁵ Thurai chanlaira kowi aia naukhiah dowi mih uan hownia a-i kiowah now lukowi tangah hanow amatni kowi a-i piaktaah khai, a-i mih dow saktuak kowi kowh tuakahmi klungta lep, now Thurai lai paw chüah khai. ⁶ Now bowk bowk enni chünta kung kowi chün dowi mih matiiow kowi nape ngare kown mih karütma hai uowi. ⁷ Pur pra kowi uowi mih krowng chatai a-i khi. Amia iawngmi chow owmra luk kowi owmra towah reng mih dow Krista maru; nami dow pamatia lala tachetah now pamatia pacham tatukla, nami powmiawng, anging paw Krista maru, ⁸ Ang che kürra luk kowi ang chang bawri ahuma chalow hanow nami dow ang rukraira naown kown na dowi, CHAKRAMANG mih dow napiak ta enni kownkow na dowi enni kowi nakrüngla enni kownkow pe ang kraingra mih chatai. ⁹ Mami chatai nadowi ang nape tukta enni kown mih mami chasak hown enni nakram kown mih. ¹⁰ Tawngbak mih tek mih dow Paul kow chasak dow lakkhiara uowi mih hai akürmami, buk kow pra kowi aia dow kür khawma now aia lai klow sünta kown mih paw taka dowi. ¹¹ Maünmi maru dow pacham tukla, a-i uowi dowi tak khe kowh chasak kowi tek mih, nakowi kakowi khepaw nami lai klow chatai tek. ¹² Maünmi maru hown natunah kown mih hai uam tek kown mih uowi dowi, kiowah mih maruüa tarapchedow amatni chatai takiow, nachenganchepaw amatni mih amatni hown takhai mih khin khowk khe bowk bowk maru kowi natungah kown. ¹³ Anging mih ari klen kowi ahuma anging takiow dowi, Thurai pe anging mih lup krowng chatai klen kowi anging mih lup chatai nachang kown aia tüngah iawng; now namih rowhi mowr enni paw uowi chekhai. ¹⁴ Nami dow enni mowr ting dowi tak, nachepaw rahi dow ia klen takhowk mih chekhai bowt, nami klen kowi Isu Krista satangiung uangpawla hanow auown hownia uangting mih paw na chekhai. ¹⁵ Akengmi kowi Thurai peah mih lup hown anging chang bawri dowi, nami lup che anging chang now, nami klen kowi paw anging owmmi tarapchedow Thurai kowi ahuma enni naowm kown mih klen kowi maiawng hai Thuria mih ahuma nape a-i kown. ¹⁶ Anging sakowm mih dow, enni chowmra uowira hownia alak mami maruuüa tut-e paw satangiung naphowng kownmi, a-i mih a-i matia lup kowi natakiow kown nadowi Thurai aia naruüa kowi chang powmiawng dow, amatni tarapche dow amatni re-e cham phuang reng. ¹⁷ Nachenganchepaw Thurai lai kowi dow, “amia iawng mih chow takiow mih dow, CHAKRAMANG kowi pacham kiow lah.” ¹⁸ Maru mih kowmatia lup kowi takiow khe, Thurai mih dow peah awmrawm sung dowi, nami chatai nowngia ka awmrawm sung kown mih dow,Thurai kiowah mih maru dow maru iung mami chekhai.