PAWL CHINTAKMI
¹ Ang nau mih dow, paplama iawng enni ia kham kown mih chekhai. Nachenganchepaw ang vüi kowi-e paplama hai enni kham khowk. ² Thurai saktuak kratra hai enni vui ang paw saktuak krat khai, tawngpalawng kowchow panow ang mih enni kowi chinawmmi masi hai ahua naphaw kown mih Isu Krista rut kowi naap enni kown kow khamta enni khowk mih chekhai. ³ Nachenganchepaw enni lawnguan kowi ang pawtuak khai, ang kram mih dow leng kowi ang khuowk enni mih süngnam mih dow Evi kowi aia mat leng kowi khuowkah iawng dow. Ang kram mih dow, enni kowi nasai enni now Krista sakraura hownia nahangta enni tarawng pami. ⁴ Enni tut-e maru uangah hanow anging Isu kowi chamkrawi phuang mih nami klen kowi akeng mih satangiung nauang phung enni kown mih, nami klen kowi amatni nau now Thurai lümla hownia akeng mih angak lümla nape owm enni kown mih, nadowi now akeng mih satangiung ka, nami kowi aiung mahai enni nakham kown mih. ⁵ Ang tuk mih dow, naün lup maiow, anowm mami chintakmiuüa, ang lak-e lang kraing mih paw na dowi. ⁶ Nachenganchepaw ang tuk tek laiklow kaneu dowi, prengia a e chowh mih iawng paw nadowi, maün mih lawng uang maten maru tut-e uang phuang enni mih chekhai. ⁷ Nahanow ang changta enni angak khai bow? Enni iuk sownla kown kow ang uang nau enni mih chekhai. Asung paw dowi hai enni tute satangiung uangphuang enni mih na dowi pabow? ⁸ Nape enni aiungra kown kowh akeng mih Thurai hawm chakuüa kowi ang kakrawi pawla uanh khai nakhowngla enni kown kow ang krawi rup takhai. ⁹ Nami dow enni tut-e ang tawi uowi mih khin khowk khe ahuma lake uan khai rakowi, enni tut-e matawng tangka lawnguan kowi paw ang tek enni dowi, Makedawnia howia kow uang mih ang tainau-uüa mih ang hauah mih uan maten uang pe ang khai, ang mih lowra lawnguan kowi paw enni hown kurdik uang phaw dowi, phaw paw phaw dowi tham. ¹⁰ Krista kowikow lainowm maten ang tek enni khowk, now aia matvüi matawngiawng chow ang changlup mih rakowi Akhaiia bowk bowk vüi kowi-e ang nachang lup reng kown, mami lawnguan kowi bowk bowk mih pacham tuk lah. ¹¹ Matawng palawng kachow? Ang sakrau enni dowi chekhai bow? Thurai tuk ang sakrau enni mih. ¹² Amia chow kowmaia kiowrira khi kown nau mi khila dowi kown kowh matni akhin hangpa chamkala, nachepaw ang aiawng chang mih dow nachang reng kown. ¹³ Maiawng mih maru-uüa dow dailai mami chintakmi chatai, kowmatia kowi Thurai uang chinmi pahai taphuang reng. Maiawngün lup chang miuüa dow dailai tek mih chekhai, amatni dow Krista kow chintakmi pahai takham khai. ¹⁴ Nami kowi na awda kown mih matawng paw uowi dowi, süngnam dow anowi kramamu-uüa iawng dow tawitahum reng. ¹⁵ Now amatni dow Thurai lupchang hai tachitanawm mih pung na thu kown, nami kowi krikringra auan tawngpaw uowi dowi, nami aprek dow amatni lupchang mih iawng naka kown.
KRISTARA KOWI PAWL KHAM NGARE MIH
¹⁶ Amia iawng mih paw athukma pah hangpa changtuak angla, nachenagchepaw athukma pa tuak ang khai hanow, ang mih nowng changla bari kown chekhai. ¹⁷ Kawmat tawngiawng chow ang tek laiklow, nami dow CHAKRAMANG kraingra hownkow ang tekmi chekhai; nachepaw ang mih dow thuklama mami iawng tek laiklow mih chekhai. ¹⁸ Tawngbak mih tarap chedow kowh buk prakowi chang bawri khai, nami khin khowk khe ang paw changla bawri mih chekhai. ¹⁹ Enni mih prengia uowi dowi mih kowi piawla khai kowmatia tuk mih kowi prengia chakma pahai tatuak khai; ²⁰ Naiawng chepaw maru changla enni nar khai-e dow, napiakta enni, naklung enni hai changla enni bawri hanow, naphek enni kown; nami khin khowk khe paw enni nakham reng kown chekhai. ²¹ Lainowmma ang rukrai chadiah, enni pungma dawng kowi ang tawi uowi mih khin khowk khe; enni mih tarapche dow apawpma hai uowi khai. ²² Amatni dow Hebrai bow? Now ang paw na khai; amatni dow Israel bow? Now ang paw na khai; amatni dow Abraham chuprek chaprek bow? Now ang paw nakhai. ²³ Amatni dow Krista nar bow? Athuk mami powmiawng ang tek laiklow khai; amatni lak-e ang lang chang lup mih ang na khai; amatni lak-e ang lang dang müa khai nami klen kowi amatni lak-e makowng lamowr ang lang krum khai. ²⁴ Judauüa ang kowi tanga khat khowk süngkawm laitaku katchi tep ang. ²⁵ Sum kat khowk kuasek hown tep ang. Hua klu hown paw kuak ang akat khowk. Lawng hown paw sum kat khowk tui kowi mir ang, now uar prowt tui kowi paw ang uowi. ²⁶ Khiri kowira kowi paw ahuma khowk, kramra uowi mami aw kowi, damrauüa hown ang tatawng, ang matia maru hownia chatai phi paw uang towm, Judaiuüa hai Jentaiuüa hownia chatai phi paw uang towm, kua ria hownia chatai phi paw uang towm mih, kaurawng riaret hownia chatai phi uang towm, sata hownia paw phi dow uang towm, angak mami tainau-uüa hownia chatai phi uang towm, phi dow limma miuüa hownia chataih uang towm. ²⁷ Kawmkrat hownia paw ang tarap chedow changlup reng mih chekhai, tawng bak khe tarap chedow müi se ang uowi; tawngpaw cha dowi hai paw ang uowi, tawng bak khe tarap chedow tui sakkrai hai lainowmma ang bowm khai, chungrau khe paw nau mowrchow uanh uowi dowi rakowi arua dawng kowi akawmma hai ang uowi. ²⁸ Naün lawnguan klen kowi Thurai hawmchak vüi kowi-e lainowmma ang kramla khai, amatni dow matawng chow chang mih. ²⁹ Nami khin khowk khe maru kür uowi dowi chepaw ang dow kür uowi reng, akeng miuüa kowi angak kowi nakuakah kown mih ang hing nau dowi, nami khin khowk khe ang kunmarau dowi pabow? ³⁰ Ang nachang bawri kown, maiawngün lawnguan kowi chatai ang nachang bawri kown, naiawng ün chatai tüng ang mih mün khowt chow ang kür uowi dowi pami. ³¹ CHAKRAMANG Isu krista Pa hai Thurai mih chowng chowng sak sakma thaulangra pauowi lah, aia dow tuk ang khai, ang tek dailai dowi mih. ³² Damaska marow kowi mang Aritai dow nakhumla ang kownkow siphai kawm dow hawtchawng kang khai. ³³ Nachenganchepaw ang auiua mih lung kowi klung ang now tawngpawk hownia iukla ang khai, naiawng hai aia hownia ang uang powt khai.