PAWL KHI MUKUANG PREN MIH
¹ Tawngpaw maratra uowi dowi , nachepaw ang nachang bawri kown ang khi CHAKRAMANG mih. ² Lai tali ning kung kowi Thurai dow uang chin ang maru lowkia chekhei, ang tuk matah mih maru kowi, aia kowi dow mukuang kowi pat pawla ang khai, Thurai aia chatai tuk mukuang kowi aia dow pawla ang khai nami dow ang buk kowh chataih. ³ Nami dow ang kowh buk kowh Lümla kowi chataih, nami dow Thurai aia mat lowkia chataih tuk. ⁴ Mukuang kowi kowh prengia pek mih pami ara kowi pawla ang khai. Nakowi dow angta aklow lowk nami dow maru iawng nadowi. ⁵ Nami lawnguan hown ang nowng chang bawri chowdiah, naün mih tarapche dow Thurai changah mih chatai, ang na dowi. Ang matia iawnguan kowi ang nowng chang bawri khai, tawngiawng chow Thurai chang ang mih lawnguan kowi, ang tarap chedow kürah uowi dowi mih maru. ⁶ Ang matia lawnguan kowi ang chang bawri kown nau khai e dow, abuala mami iawng ang naown kown mih na dowi, lainowmma ang natek kown. Kawmat dow ang chang bawri kown nadowi bowt, en chatai nachet ang tara kown, Ang kowh alup hai laiklow takhowk miuua ahuma hang pacham tuak lah. ⁷ Uan ap patuk pata ang mih dow kaneuma kraing rakowi ang na chang lowchow lai dowi kown kow ang nga kowi mih pe ang sat khai, nami dow setan chintak mih ang nachangla lowchow kown naapla ang reng kownkow pe ang mih chekhai. ⁸ Mami lawnguan kowi CHAKRAMANG tut-e sum kat khowk ang lu prasi, na mih dow ang hownia napowt ta ang kownkow. ⁹ Nachenganchepaw aia tek ang mih, ang saksing sanara enni vüi kowi-e en tataing krowng uowi chow. En kürah uowi dowi mih khin khowk khe paw küra dow uang pe chang en lup kown chatai, ang kowh kür uowi dowi rakowi ang mih nowngia chang bawri kown, tawngplawng kachow panow Krista luk kowi tungma ang owmsak reng rakowi. ¹⁰ Krista rakowi dow kür uowi dowi mihra kowi ün, ta-e mira kowi ün, atawk kekmami ra-e ün, tachang anowng apowng mih rakowi ün, akratpusara kowi ün, ang awmrawm reng chekhai; ang kür uowi dowi mih hai akrowksang ang kür plan uowi reng iawng chekhai.
KAWRINTHIA UÜI KOWI-E PAWL TUAK MIH
¹¹ Maiawng ang uang rui mih khin khowk khe, ang matia kowi ang takiow reng. Maiawng ang chang mih tarapchedow en luk kowi ang owm en reng rakowi chekhai. Maiawng mih anowm mami chintakmi hai aiung mami chekhai, ang matia dow na dowi chekhai. ¹² Anowm mami chintakmi kowi natukla kown mih auan ang natüng enni kown tai, sak klam mahai townsak büah diah, enni tut-e awdara lup ang natüng enni kown tai. Mami awdalup hownia ang natüng enni kown tai ang mih dow Thurai nar pami. ¹³ Lainowm ma ang natek enni akeng mih Thurai hawmchak uüa enni tut-e dow akraing ma chekhai; maün lawnguan kowi ang langtakra hanow enni tut-e tangka pawisa paw matawng paw ang paw enni dowi amatni tut-e ang paw mih dow. ang matia lup rak kowi ang lülawt.
KAWWRINT KUA KOWI KOW ACHUR CHASAK
¹⁴ Nahanow sünta diah; mami hown sum kat khowk nauang kown mih enni tut-e nauang kown mih ang kamrüt, now mami cham kowi rakowi paw akeng mih iawng chatai, enni tut-e matawng tangka paw ang nalü enni kown na dowi. Matawng paw ang nau dowi enni kowi chatai ang nau. Matawng chow ang lü enni mih uowi; anging kim kow atuak enni tuk bowk mih khai now anging kim ku paw enni tawi mü mih hai enni uowi reng. Upa uüa kowi chauüa chatai nadowi peah cherek reng, upa chatai peah reng. ¹⁵ Sak-i ma hown enni vüi kowi-e bowk bowk mih ang chang enni reng, ang matia sak pek takla chepaw ang nape kown. Mami auan dow lainowm ma ang sakrau enni achowngma mowr pat lak-e, nami powm iawng dow enni paw achowngma pat lak-e lang howr ang rowt chekhai. ¹⁶ Now, akeng miuüapaw natek kown tai tangka lawnguan kowi matawngpaw ang tek enni dowi pami, ang mih prengia hown ang hang enni now ang matia kowh cherek ang matia chatai cham kram reng. ¹⁷ Enni tut-e napuanla kownkow katpaw ang uang chin enni maru dowi, matawng chow ang chang? ¹⁸ Laiuat, Tita hai akeng mih tainau uüa kowi enni tut-e ang uang chin enni, nachepaw amatni kowi nakhowngah kown mih lawnguan katpaw ang tek enni dowi, amatni dow matawng chow chang? Tita paw akatchapaw aia cherek lü enni dowi nadowi bow? Tita hai akeng mih tainau uüa kowi ang kowi enni chang ang iawng chatai enni changah reng, akatsang na dowi bow? Anging uowi rakowi chatai anging uowi; akatcha khowm padow anging vüi kowi-e cherek pek takla dowi. ¹⁹ Enni tuak mih atawima chatai mami chasak kowi ang matia angak hownia naplai kown mih ang tuak dowi, en owm bow? Thurai tuk Krista hown ang tatawm khowk pami now ang rui mih matiiow paw aia kürra hown kow, enni paw aia kowi owm diah. laiklow ang natek enni, ang sakrauah miuüalow, naiuk nasown enni kownkow ang tek enni mih chekhai. ²⁰ Enni tut-e ang nauang kown mih khin khowk khe, ang tuak ta iawng ang nowngia khi enni dowi tham. Enni tut-e ang nauang kown mih khin khowk khe matawng paw atek kla dowi tham. Ang kram mih tarapche dow, enni matia lala nataran kown mih chatai, lowk kow lowk enni ta irsi kown, enni pungma dawng kowi nakun marau kown mih paw nauowi kown. Ang kram mih dow enni pung ma dawng kowi nachang alu cha kown mih uowi, enni paungma dawng kowi matawng mih chabak dow saktuak ngak hai nauowi kown mih uowi. ²¹ Enni tut-e ang naung kown mih khin khowk khe, nakhi enni kown mih ang nakram kown, Thurai mih dow nape kham ang sum kown, matawng mih chabak dow Thurai pra kowi angak, chimsai dowi mih hai iang chang hownia paw naplan sak kown nadowi, naiawng rakowi lainowm ma ang tuak krat khai.