PRING HAWIRA ¹ Mami hown sum kat khowk enni tut-e ang uang, maün lawnguan kowi natalawpla kownkow. Mami talawpra auan dow enni tut-e ang nauang krawisa enni now bowk bowk angak mih achinawmma hai nachetpe now pre sum ia kowi saksi thuak mih natowah kown, lowkia chow lai klow hown chatai nadowi. ² Prekat kowi ang uowi mih khin khowk khe ang tek enni mih rik chang angak miuüa dow, amatni tut-e paw akeng mih lak-e ang riktek mih chekhai, ang che uang plan uang now, ang nasakrauah kown na dowi. ³ Ang natek enni, enni nauah mih auan Krista mih kowi uang tek ang laiklow pami, aia dow enni lawnguan kowi kür uowi dowi mih nadowi chekhai; nache aia dow aia kür hai enni tut-e uang tawi chang enni lup reng chekhai. ⁴ Krista akumük kowi anging tuk mih chatai, aia kürah uowi dowi mih khin khowk khe kraws kowi enni tarah khai, nachenganchepaw Thurai dow aia kowi kutplan singah iawk chekhai. Anging paw aia rakowi kürpa uowi dowi mih chekhai hanow aia akumük dow anging tawi mü khai, nachengan chepaw aia tut-e mami angak lawnguan kowi enni hown talawp mih khin khowk khe Thurai dow aia kraingra natüng kown maru khamta enni mih laiklow iawng dow. ⁵ Enni bowk bowk mih chaing büah diah tawng iawngchow aia sing uowi mih; Thurai sakrau enni mih dow enni tuk khowk manow now aia saksing sana enni mih paw owm büah diah. Enni matni ngengche mih tachaing büah diah; matawng chow enni tawi khi kowh krista mih enni tut-e tawi uowi mi? Aia dow enni bowk bowk tut-e tawi uowi reng, mami chaingra kowi enni nasum ngengche kown chekhai. ⁶ Enni nakhi kown mih ang tuk Krista enni tut-e tawi uowi reng. ⁷ kawmat Thurai tut-e ang lü prasi mih matawng paw atawi lup enni chang dowi tham. Naiawng rakowi anging lü prasi reng mih dow enni mih achang ma natukla ngamlam kown mih now chaingra kowi paw enni na awngla kown. Tawm tukma dawng kowi, anging natek enni kown nau mih dow anowm mami chang diah. Nami kowi che enni sum khai chalow hanow, anging nau mih dow enni naawngla kown mih chekhai. ⁸ Anowm mami dow anging chang reng; anowm mami klen kowi dow matawng paw aning chang dowi. ⁹ anging kürah uowi dowi mih khin khowk khe paw enni dow akürma nami khin khowk khe piaw büah diah. Anging lü prasi mih dow enni mih tungma atekma hai Thurai kowi owm büah hanow chünah büah diah. ¹⁰ Kawmat dow ang napowt ta enni kown tai bowt, naiawng rakowi bowk bowk angruila enni mih chekhai. Enni tut-e ang nauang kown mih khin khowk khe, akratma hai ang nachang enni kown nadowi. Thurai mih chintak mih kowi ruita ang khai bowt rakowi, aia kowh kraingra ang tawngah hanow enni kowi ang pe enni sak khawtra mih chekhai, kür uowi dowi iawng dow ang nachang enni kown mih ang hing nau dowi.
AWMRAWM LAIKLOW
¹¹ Achur amowi kowi ang natek enni, tainau-uüa low piaw büah diah; aprim mih chowm krang uowi krang hai kawmat kowh chowm krang uowi krang hai taklingtaklai büah diah now Thurai mih dow nape enni sak khawtra kown. Lowk kowh lowk taking tasang büah diah hanow apiawma hai taiua uowi büah diah. Maün lup che enni chang now, Thurai, nasakrau enni hanow nape enni piawra kown, enni tut-e natawi uowi kown. ¹² Lowk kowh lowk tasak rut büah diah now achim asaima hai tanam awm diah. ¹³ Achim saima mi maru-uüa krawi pe enni achup khai. ¹⁴ Thurai sakraura hown CHAKRAMANG Isu krista saksing samara hai lümlasai klowpiuara ün dow enni bowk bowk tut-e pacham uowi reng lah.