Han Menghakimi ¹ "Han we hakimi bwaromi ting timbe hakimi mintoru bwa. ² Impa ro penghakiman myarona myareng bwe hakimi imbe tirona tireng bwe hakimi mintoru pa, tya aitato bwe wona wentato imbe tironi tirentato au ³ Topeno bwo renso aiker katu bwabwei ro nemeta bwabwi remo bwau, me hubwiai ai rabuyan bwero remo mantaun nemu bwabwei bwa ne? ⁴ Bwa mora topeno bwo tuto bwe nemeta bwa bwei, iko aiker katun bwabwei bwaruhu remumo bwabwei mari, me airabuyan pei ryo remumo mantaun nemu bwa bwei. ⁵ Hinontarai bwe hwatandeng aha, won ai rabuyan bwa bwei bwa rihu rmumo bwa bwei mari mora, interi imbe myande kabyeiha bwu myarong aiker ro nemeta remo wane mari. ⁶ Han myaron pi bwe mahi mantaun bwe wona tyoru bwa, kwi nemu mutia bwabei bwe wowa wane tyoru bwaro tisa kakepanei ro tirai mi bwau bwa kont tirawai bwe tyoru riya hahabu mintoru.'' Myarebwara, Myankarawe, Tya Myandoat. ⁷ ''Webwara, imbe pira bwabei tironi ma bwe au. Kurawer, inte myara ryuta. Rwowat, pi ra bwabwei tisebwi bwe au. ⁸ Tutir, hinontarai bwe ebwara, dyaryuta, hinontarai bwe karawe imbe dyaryuta, tyar bwebwe rowat imbe tinsebwi bwei. ⁹ Piebwa mora, tei dipe antun pei dyebwa roti me dyong kami bwe antun bwa bwei ne? ¹⁰ Piebwa mora, antun pai dyebwa dian me han dyon tawai bwe antun bwa bwei, ye? ¹¹ Impa, bwe on sasar bwau mintoru topano myaron pi bwe hanai bwe romawa bwau tyoru, riwain bwe Tamamu bwero rora bwe mamara, Andipe dyon bwe hanai bwe ebwara bwei bwau tyoru.''Hukum bwe retenang peina ¹² "Impa, pitau myan saneaho hinontarai tirona bwe au, inte au tato wona bwe tyoru bwo rani mora bwe ro Hukum Taurat kont Kitab Nabi tinembau.'' Rayan Bwerato Bwebwihyen ¹³ ''Myasua ro wande bwe hiyar tutir wande bwa bwei bwibwa tyar rayan bwabwei bwibwa bwe rabwu karirya timpau tisua roi. ¹⁴ Tutir woden bwabwei hiyar tya rayan bwa bwei hiho bwe ra bwu bwihyen bwabwei impa bwe aryutei timpau bwa.'' Aninde matitui bwe Nabi-Nabi Palsu ¹⁵ "Torabwau, myansane kakepan bwatan bwa bwau tyoru tindama tinparari domba, mena mantaun mora wona nu raro bwe barui tirena. ¹⁶ Ro bon bwau minte myarende bweroan tyoru, Han hinontarai pe tindirui anggur bon pehe ro nanimpu bwe mahar tya bon pehe ro nanimpu bwe makako e? ¹⁷ Impa tato ai bwe hanai pai bwe bo bon bwe hanai, mena ai bwe hanai bwa bwe bo bon bwe hanai bwa. ¹⁸ Impa Ai bwe hanai mo bwe bo bon bwe hanai bwa bwa e, impa ai bwe hanai bwa mora han bwe bo bon bwe hanai. ¹⁹ Ai pai niei bwe bo bon bwe hai bwa pa imbe tindo bwani tya tingkiyei to aruntang rarong puyei a. ²⁰ Impa, ro bo tau ra bwau myaren de bwe roan tyoru. ²¹ Han hinontarai kuira bwa bwe tato bwe Yau, 'Bwarakat, Bwarakat,' tinsua ro swarper bwe mamara, bwa pe andi pe bwe on Yai ne aniyau swarper ro rora bwe mamara. ²² Ro ha ra bwa bwei hinontarai tau tintato bwe Yau, Bwarakat, Bwarakat, nampayai bwe roan nemu tato bwe bwia retenang pe to me, tyar antaren ta dyawa ryuaninui bwe hanai bwa ro hanomu pa tya apipyori tau ro hanomu bwau?' ²³ Impate, de yaniawa bwe mintoru! Myanda bwari hu Yau, bwe bwe on sasar pa mintoru!''' Myantaraho tya Myarona. ²⁴ ''Impa, hinontarai kuira tintaraho ne tato ne kuira tya tirona pararia imbe timparari hinontarai bwebwe hane anianun ma dyon manu ro kami bwa bwo. ²⁵ Impate, metang bwa bwei bwia tya pohar pei rima, tya wanang pei hyo manu bwa bwei, manu bwa bwei hyu bwa tutir timbau ni ro kami bwa bwom pa. ²⁶ Tyar, hinontarai pai neyei dipe taraho ne tato ne me dyona bwa pa pirari hinontarai bwe tatar bwe bwaun manu ro robwuyan bwa bwo. ²⁷ Impateri, metan bwa bwei bwia pohar pei rima, tyar wanang pei hyo manu bwa bwei, inte manu bwa bwei tibata, tyar bwe matitota bwau bwa bwa hera.'' ²⁸ Yesus tito pitau ra bwau kai kawasa tau bwe taraho ne aniau bwau tira pipyori. ²⁹ Tutir dyaniau tyoru parari hinontarai bwe ne mananu, me mihi ahli Taurat bwau tyoru bwa.