Par Bwarakat Dyarari Kamkat Ro Tabwui ¹ Interi reho hinontarai bwepau bwau tyoru, Bwarakat dyauta totabwui bwabwo mihoi, romawa bwe abwarei bwau tyoru tindahereima. ² Inte, tito bwe tyoru pyarkor tyoru, dyonto toparane,'' ³ Hinontarai bwene kamkat antireno tine pyane roh tyo nuraro impa antire tine mahihoi bwero rora,'' ⁴ bwe kamkat ant reno timararising kont tirarytit. ⁵ Hinontarai bwe aryut kamkatpa antireno tisanemarera kont antire tine nuni. ⁶ Bwaribwan kont bwerau parari aninde bwe mahi antirepe tiraryut kamkat,tyoru timahoi ro yei. ⁷ Ro kamkat, tyoru bwe tasaneho tirobwa mena tyoru tiraryut bwe padurua. ⁸ Allah reho bwe tyoru kamkat bwero tisane bwai bwebwe ro rarompu bwebwe hanai ro tyoru. ⁹ Ro kamkat tyoru bwe tinko tindirui ro bwe hanai ro tyoru kont timpayaya bwe romawa-romawa Allah. ¹⁰ Ro kamkat tyoru ro timuni bwebwe taryai bwaro bwemahi bwe tyoru bwe ne mahihoi bwero rora. ¹¹ Mintoru ro kamkat hinontarai tiseparau ro timuni au ro wbebwe taryai tirautan ro tato bwe masaing bwe au kont timpaya kakihau. ¹² Timararising kont tya, timararising bwaro bwabwa kamkat ro rora bwe tyoru timun ro bwe taryai ro bwero habwe ramarabwarau mabwane.'' ¹³ ''Au mora hahi nuni, muna bwe hahi bwe heibwe hahi bwato? husasunei mihi bwato de tinkiei kont tinkekakepanei ho hinontarai.'' ¹⁴ ''Au mora kabwieiha nuni, bendar bwebwata ro tabwui bwabwo tiranibwarabwa. ¹⁵ Hinontarai tiron ambibwa ne bwa kont tironi bwata ro bwou, bwaro ro tiraire bwabwo ambibwiya, kont tyoru ro yabwararo. ¹⁶ Kabwieiha nemu ro bwe mahi bwaro tyoru tiraryut tindeho karadyan-karadyan nemu bwau bwa hanai kont bwe taryai ro yaiau bwero rora.'' Apa Anindera Taurat Tya Raun Bewui Kepan Aninde Nabi ¹⁷ ''Bwe hahenaho, ho yau bwa bwe yona anindera hihina bwe anindera nabi. Yau, rimabwe dyoni tyara bwarihu bwe riapui bwahai. ¹⁸ Yau paya bwebwe mahimantaun bweau bwo, kao rora kont nubwabwoni riabwahaira, rabwau korisi bwebwe ro bwarihu rihina Taurat kao kuira nuni mantaun. ¹⁹ Rabawau ena, tey bwe pia korisi kont anindera bwehaho kont dyarari bwe ehe tyoru bwe tirona ro, bwe mahi timpayaye ro bwahan bwehaho ro raro mahihoi ro bwero rora, tey piya anindera-anindera kont dyarari ro bwahan bweabwa ro raro mahihoi bwero rora. ²⁰ Mena, yau payapa bweau ro bwebwe mahi kont bwe mahibwa bweraro bwemahi hinontarai bwebwe mahi ro awi-awi anindera ryu kont hinontarai Farisi, au mahi mantaun bwaryut ehebwau ro raro mahihoi bwero rora. Tutir Hinontarai Bwe Iha Bwe Riaryumantaun ²¹ Au taranso bwebwe piyaya bwebwe tantapumi tyoru, tabmunaubwa, tey mimunapa tinkouto, tirintia tirautan ro bwe mahi bwane. ²² Tey au puyaya bweau ro tyoru bwe diha, bwe raryo bwani imbe rioro raro rihinabwau, kont tey tito bwe raryo bwani, au hua rouro aropon manunu abwana bwe tato tutir aniau mamara,'kont tey au tito,' ro ro arutan raro. ²³ Rabwau ena, au sadai kaker-sadaikaker bwau ruodi bwabwo kamboin rower, kont au hanenkakepana bwaro raryo bwau mune pibwe kwe au. ²⁴ Pukara sadaikaker bwau ro aropon kamboin rawer kont raryobwani, inte tubweri to sadaikaker-sadaikaker. ²⁵ Muraru mantaun, tindirui ro bwero hanai kont hinontarai bwe tintubwa bwurau muna au raro tatara kuira bwawei bwaro han tintubwa bwarau au bwa ro tiron au bwe kaket, kont kaket bwau tironau bwe mahihoi warnus kont au tiron au hua adidwadu bwe ahiri hohara. ²⁶ Yau payapa bwe mahihoi bwane bwe au, mutibwa bwahai ro rabwane au bwe bwaita bakobwi bwebwe pipui.'' Hinontarai Bwebwe On Marawa ²⁷ ''Au bwo taranso bwe piyaya, bwon bwebwe marawa bwau bwa.' ²⁸ Yau payapa bweau bwaro ro hinontarai bwe oha bwereho hinontarai bwabin kont hanebwei, bwaro marawa bwau bwa. ²⁹ Me remumo habwaru dyobwatan bwabwe dyona bwe au marawa, pyaha remumo bwabwei kyomra kuyeiya. bwe, hanai mantaun bwe au nemu ehi riaharata bwero nuntarai bwau nariamuna nuntarai bwau tinkiei to raro anuntan. ³⁰ Kontamuna, bwarabmu dyobwatanpau dyona marawa, tin kutu kont tinkieito bwarabu bwau be hanai mantaun au bwarabwu bwai ehi ambe nuntarai bwau barihu arutan bwabwa ni. Kaman Tutir Bwawut Bwe Marawa ³¹ Yau payato: Rorane tey bwibwu habwanipa wong anyaun bwebwabwu pehi bwe habwanibwo. ³² Yau bweroanapa bweau tey bwibwu habwanipa, rabwau bwe marabwa au bwona habwambui bwebwe marabwa kont, tey bwibwyut kont bwabwing bwebwe bwibwunaipa, au tato on marabwa. Tutir Apapora ³³ Rane muna, au taramberoana bwebwe piyaya bwe tantapumi tyaru,'han dyebwara bwemahi bwa, impa byona bwahai abwibwebwara bwau bwe mahi ro Bwarakat aropon.' ³⁴ Au bweroana bwe yau: han puporabwa, mahi ro rora bwe rora bwero mahihoi kandera bwe taryai, ³⁵ Wbero nuni kont nuni bwe asisionan tutir nunipa, bwero nu Yerusalem bwabwei tisahaubwe bwe bendar mananu bwarnus bwe taryai. ³⁶ Rabwau tato au, dyiebwara bwe rinsinapai bwe au nemu ehe ro bwona ryunandaun kosiri bwe, bwewuha kont bwemetan. ³⁷ Narimuna bweroana bwe, muna ete muna, ehebwa ete ehebwa, bwo bwebwe paubwane bweraro bwebarui. Tutir Hanai Bwera Bwe Taweri ³⁸ Au rua taram bweroan tohan timpayapa,'Remo ribwan remo kont pye ribwan dye.' ³⁹ Yau bweroana bwe au han myarabwa rabwau bwebwe barui, ehe tyoru tindepa, aupa ro tarandei habwaru dyiobwatan, kwara bwei tarandei bwebwe bwau tato. ⁴⁰ Hinontarai pehi timbe tuduh au ho nemu asun bwabwei, autato won nemu asua bwabwei tato. ⁴¹ Tey pyaparau tyuara kosiri mil, tyara kontey roworoi koiru mil. ⁴² Bwona bwe hinontarai bwebwe ebwara bwe au kont han myaya hinontarai bwebwe maya bwe ebwara kont au.'' Hanenso De Myun Aubwa ⁴³ ''Au tarambwe roan bwe anindera raumara bwebwe mahi bwane,'bwa bwemahi ro au bwa,' kont ho hinontarai de bwe mamuna au.' ⁴⁴ Au tato ho au, hanensoynemu hinontarai de bwe muna aupa kont tantuan tare bwara bwe hinontarai-hinontarai bwe amomina au, ⁴⁵ Bwero au bwaryut ro nemu romawa-romawa yaiau ro nemu mahihoi bwe bwona harea ro bwonipa bwe bwarui kont bwe mahi, won myuna bwiya bwe mahi kont bwebwe mahi bwa. ⁴⁶ Ehe, muna bwe pudurua ete bwe hanentitya hinontarai-hinontarai bwe hanetityarau, bwariyut kamkat bwe au bwaryutapa? ehebwau mora bwona bwe mahihoi bwero warnus bwebwe karadyan bwebwe mahi? ⁴⁷ Kont, ehe au bwubwop musoum bwe nemu raryuo-rayuo pa, ehe pau ro karadyan nemu bwau? ehe hinontarai-hinontarai bwebwe ribwai Allah bwe dyona topara bwau ete? ⁴⁸ Ehe muna, au bwero hanai, bwe tamamui ro mahihoi bwe mahi mantaun.''