¹ Ita uray ti immuna a tulag addaan kadagiti pagannurotan iti panagdayaw ken naindagaan a santuario. ² Ta naisagana ti tabernakulo. Ti umuna a siled, a nakaikabilan ti pagsaadan ti silaw, lamisaan, ken tinapay ti presensia, ket naawagan iti nasantoan a disso. ³ Iti likudan ti maikadua a kurtina adda sabali a siled iti tabernakulo, a naawagan iti kasasantuan a disso. ⁴ Adda balitok nga altarna a pangikabilan iti insenso. Adda met dayta ti lakasa ti tulag, a naan-anay a naabbungotan iti balitok. Iti uneg daytoy adda balitok a garapon a nakaikabilan ti manna, ti sarukod ni Aaron a nagsabong, ken dagiti tableta ti tulag. ⁵ Iti ngatuen ti lakasa ti tulag, dagiti nadayag a kerubin ti nanglinong iti kalub ti panangabbong, a saantayo itan a pagsasaritaan a detalyado. ⁶ Kalpasan a naisagana dagitoy a banag, kanayon a sumrek dagiti papadi iti makinruar a siled ti tabernakulo tapno aramidenda dagiti serbisioda. ⁷ Ngem ti laeng nangato a padi ti simrek iti maikadua a siled, maminsan iti kada tawen, ken saan nga maawanan iti dara nga idatonna para iti bagina ken para kadagiti di inggagara a basol dagiti tattao. ⁸ Impakita ti Espiritu Santo a bayat a nakatakder pay laeng ti umuna a tabernakulo saan pay a nagparang ti dalan a sumrek iti kasasantuan a disso. ⁹ Maysa daytoy nga ilustrasion para iti agdama a panawen. Agpada a saan a kabaelan dagiti sagut ken sakripisio a maidaton ita nga naan-anayen ti konsiensia ti agdaydayaw. ¹⁰ Maseknanda laeng iti taraon ken inumen ken nadumaduma a seremonial a panagbuggo, pagannurotan para iti bagi agingga iti panawen ti baro nga urnos. ¹¹ Immay ni Kristo a kas nangato a padi kadagiti naimbag a banag a dimteng. Limmasat iti dakdakkel ken naan-anay a tabernakulo a saan nga inaramid dagiti ima ti tao, maysa a saan a kukua daytoy naparsua a lubong. ¹² Saan a babaen ti dara dagiti kalding ken urbon a baka, no di ket babaen ti bukodna a dara a simrek iti kasasantoan a disso a namimpinsan ken napatalgedna ti agnanayon a pannakasubbottayo. ¹³ Ta no ti dara dagiti kalding ken baka ken ti panangiwarsi iti dapo ti baka kadagiti narugitan ti mangsantipikar kadakuada maipaay iti pannakadalus ti lasagda, ¹⁴ kasano pay a ti dara ni Kristo, a babaen iti agnanayon nga Espiritu, nangidaton iti bagina nga awan pakapilawanna iti Dios, dalusanna ti konsiensiatayo manipud kadagiti natay nga aramid tapno agserbi iti sibibiag a Dios? ¹⁵ Gapu iti daytoy a rason, isu ti mangibabaet iti baro a tulag. Daytoy ket tapno, gapu ta napasamak ti ipapatay a mangsubbot kadagidiay adda iti sidong ti umuna a tulag manipud kadagiti salungasingda, dagidiay naayaban ket umawatda iti kari nga agnanayon a tawid. ¹⁶ Ta no sadino nga adda testamento, masapul a mapaneknekan ti ipapatay ti tao a nangaramid iti dayta. ¹⁷ Ta nabileg laeng ti testamento no addan ipapatay, ta awan ti puersana bayat a sibibiag pay ti nangaramid iti dayta. ¹⁸ Isu nga uray ti immuna a tulag ket saan a naipasdek nga awan ti dara. ¹⁹ Ta idi inted ni Moises ti tunggal bilin iti Linteg kadagiti amin nga umili, innalana ti dara dagiti urbon a baka ken kalding, agraman ti danum, nalabaga a delana, ken hisopo, ket inwarisna agpadpada ti lukot a mismo ken kadagiti amin a tattao. ²⁰ Kalpasanna, kinunana, "Daytoy ti dara ti tulag nga imbilin ti Dios para kadakayo." ²¹ Iti isu met laeng a pamay-an, inwarisna ti dara iti tabernakulo ken amin a pagkargaan a nausar iti ministerio. ²² Segun iti linteg, dandani amin ket nadalusan iti dara. No awan ti pannakaibukbok ti dara awan ti pammakawan. ²³ Ngarud nasken a madalusan koma dagiti kopia dagiti banag idiay langit babaen kadagitoy a daton nga animal. Nupay kasta, dagiti nainlangitan a banbanag a mismo masapul a madalusan babaen kadagiti nasaysayaat a daton. ²⁴ Ta saan a simrek ni Kristo iti kasasantuan a disso nga inaramid babaen kadagiti ima, a kopia laeng ti pudno. Imbes ketdi, simrek isuna idiay langit a mismo, tapno agparang itan iti sanguanan ti Dios para kadatayo. ²⁵ Saan a napan sadiay tapno maidatonna ti bagina iti adu a daras, kas iti ar-aramiden ti nangato a padi, a sumrek iti kasasantuan a disso iti tinawen babaen ti dara ti sabali. ²⁶ No kasta koma, ngarud masapul nga agsagaba iti adu a daras sipud idi naipasdek ti lubong. Ngem ita nagparang iti udi dagiti panawen tapno ikkatenna ti basol babaen ti panagidaton iti bagina. ²⁷ No kasano a nadutokan ti tao a matay iti maminsan, ket kalpasan dayta umay ti panangukom, ²⁸ kasta met, naidaton ni Kristo iti maminsan tapno ikkatenna dagiti basol ti adu, ket agparangto iti maikadua a gundaway, saan a tapno makilangen iti basol, no di ket para iti pannakaisalakan dagidiay agur-uray kenkuana.