¹ Ita ti punto ti ibagbagatayo ket daytoy: Addaantayo iti nangato a padi a nagtugaw iti makannawan ti trono ti Natan-ok idiay langit. ² Isu ket adipen iti nasantoan a disso, ti pudno a tabernakulo nga impasdek ti Apo, saan a tao. ³ Ta tunggal nangato a padi ket nadutokan a mangidaton ti agpadpada kadagiti sagut ken daton. Ngarud nasken nga adda maidaton. ⁴ Ita no adda koma ni Kristo ditoy daga, saan koma a pulos a padi, yantangay adda dagiti mangidaton kadagiti sagut a maitunos iti Linteg. ⁵ Agserbida iti kopia ken anniniwan dagiti nainlangitan a banbanag. Kasta met laeng kenni Moises idi binallaagan isuna ti Dios idi dandanin mangbangon iti tabernakulo: Kinuna ti Dios, "Kitaem nga aramidem ti amin a maitunos iti padron a naipakita kenka idiay bantay." ⁶ Ngem ita naawat ni Kristo ti nasaysayaat a ministerio, no kasano nga isu met ti mangibabaet iti nasaysayaat a tulag, a naibatay kadagiti nasaysayaat a kari. ⁷ Ta no awan pakapilawanna dayta umuna a tulag, awan koman ti pakasapulan nga okasion iti maikadua. ⁸ Ta idi nakasarak ti Dios iti biddut kadagiti tattao, kinunana, "Kitaem, umay dagiti aldaw—kuna ti Apo— inton makitulagak iti baro a tulag iti balay ti Israel ken iti balay ti Juda." ⁹ Saanto a kas iti tulag nga inaramidko kadagiti kapuonanda iti aldaw nga iniggamak isuda tapno idauluak ida manipud iti daga ti Ehipto. Ta saanda a naannad a nagtulnog iti tulagko, ket diak inkankano ida— kuna ti Apo. ¹⁰ Daytoy ti katulagan nga aramidekto iti balay ti Israel kalpasan dagita nga aldaw —kuna ti Apo. Ikabilkonto dagiti lintegko iti panunotda, ket isuratkonto met iti pusoda. Siakto ti Diosda, ket agbalindanto a tattaok. ¹¹ Saanda nga isuro ti tunggal maysa iti kailianna ken tunggal maysa iti kabsatna, a kunkunada, ‘Am-ammoyo ti Apo.’ Ta am-ammodakto amin, manipud iti kabassitan agingga iti kadakkelan. ¹² Ta kaasiakto dagiti kinadakesda, ket diakton malagip dagiti basolda." ¹³ Babaen ti panangawagna iti daytoy a tulag a "baro," indeklarana a saanen a maus-usar ti immuna a tulag, ket ti nagbalinen a saan a maus-usar ken daan ket asidegen a mapukaw.