¹ Daytoy ni Melkisedek, nga ari ti Salem, padi ti Dios a Kangatuan, ti nangsabat ken Abraham nga agsubsubli manipud iti panangpapatay kadagiti ari ket binendisionanna. ² Kenkuana a nangted ni Abraham iti apagkapullo ti amin. Umuna, ti pannakaipatarus ti naganna ket kayatna a sawen, "ari ti kinalinteg"; kalpasanna isu ket "ari met ti Salem," kayatna a sawen, "ari ti talna." ³ Isu ket awanan iti ama, awanan ina, awanan kapuonan, awan ti pangrugian dagiti aldaw wenno panungpalan ti biag. Ket umasping iti Anak ti Dios, agtalinaed a padi iti agnanayon. ⁴ Kitaenyo no kasano ti kinadakkel daytoy a tao nga inted ni patriarka Abraham ti apagkapullo kadagiti banag nga innalana iti gubat. ⁵ Dagiti henerasyon ni Levi nga umawat iti saad ti kinapadi ket addaan iti bilin segun iti linteg nga agkolekta iti apagkapullo manipud kadagiti tattao, kayatna a sawen, manipud kadagiti kakabsatda, uray no isuda, met, ket nagtaud ken Abraham. ⁶ Ngem ni Melkisedek, a saan a natunton ti kaputotanna, inawatna ti apagkapullo manipud ken Abraham, ket binendisionanna, daydiay addaan kadagiti karkari. ⁷ Di mailibak a ti nababbaba a tao ket bendisionan ti dakdakkel a tao. ⁸ Iti daytoy a kaso, umawat dagiti mortal a tattao iti apagkapullo, ngem iti dayta a kaso mapaneknekan nga isu ket agbibiag pay. ⁹ Ket, iti wagas ti panagsao, ni Levi, nga immawat iti apagkapullo, nagbayad met iti apagkapullo babaen ken Abraham, ¹⁰ gapu ta adda ni Levi iti bagi ti henerasyonna idi sinabat ni Melkisedek ni Abraham. ¹¹ Ita no mabalin koma ti kinaperpekto babaen ti Levitiko a kinapadi (ta iti sidongna inawat dagiti tattao ti linteg), ania pay koma ti kasapulan a tumaud ti sabali a padi a kas iti wagas ni Melkisedek, ket saan a maibilang a kas iti wagas ni Aaron? ¹² Ta no mabaliwan ti kinapadi, masapul met a mabaliwan ti linteg. ¹³ Ta daydiay naibaga dagitoy a banbanag ket kukua ti sabali a tribu, nga awan ti nagserbi iti altar. ¹⁴ Ita nalawag a naggapu idiay Juda a naipasngay ti Apotayo, maysa a tribu a saan a pulos a dinakamat ni Moises maipapan kadagiti papadi. ¹⁵ Nalawlawag pay ti ibagbagatayo no tumakder ti sabali a padi a kaasping ni Melkisedek. ¹⁶ Nagbalin daytoy a padi, saan a naibatay iti linteg ti pisikal nga kasapulan, no di ket babaen ti bileg ti biag nga agnanayon. ¹⁷ Ta dagiti saksi ti nasantuan a kasuratan maipapan kenkuana: "Maysaka a padi iti agnanayon segun iti urnos ni Melkisedek." ¹⁸ Ta saan laeng a nailasin ti dati a bilin gapu ta nakapsut ken awan serserbina— ¹⁹ ta awan ti inaramid ti linteg a naan-anay—ngem naiyam-ammo met ti nasaysayaat a namnama, a babaen iti dayta umasidegtayo iti Dios. ²⁰ Ket saan nga awanan iti sapata! Dagiti dadduma nagbalinda a papadi nga awan ti aniaman a sapata, ²¹ ngem nagbalin a padi nga addaan iti sapata babaen ti nangibaga kenkuana, "Nagsapata ti Apo ket dina baliwan ti panunotna: 'Padika iti agnanayon.'' ²² Babaen met iti daytoy inted ni Jesus ti garantiya ti nasaysayaat a tulag. ²³ Adu ti bilang dagiti dati a papadi, yantangay ti ipapatay ti nanglapped kadakuada nga agtultuloy iti saadna. ²⁴ Ngem gapu ta agtultuloy nga agbiag ni Jesus nga agnanayon, addaan iti permanente a kinapadi. ²⁵ Ngarud kabaelanna met nga isalakan a naan-anay dagidiay umasideg iti Dios babaen kenkuana, gapu ta kanayon nga agbibiag a mangibabaet kadakuada. ²⁶ Ta pudno a maiparbeng a maaddaantayo iti kasta a nangato a padi, a nasantoan, awan basolna, nadalus, naisina kadagiti managbasol, ken naitan-ok iti ngatuen dagiti langlangit. ²⁷ Saanna a kasapulan, saan a kas kadagiti nangato a papadi, ti mangidaton kadagiti inaldaw a datdaton, umuna para kadagiti bukodna a basbasol, ken kalpasanna para kadagiti basol dagiti tattao. Namimpinsan nga inaramidna daytoy idi indatonna ti bagina. ²⁸ Ta ti Linteg mangdutok a kas kangatoan a papadi dagiti lallaki nga addaan iti pagkapuyan. Ngem ti sao ti sapata, a dimteng kalpasan ti Linteg, nangdutok iti maysa nga Anak, a napagbalin a naan-anay iti agnanayon.