1
Ngarud, iti panangpanawtayo iti immuna a nasursurotayo maipanggep iti mensahe ni Kristo, masapul nga agtultuloytayo iti panagtaeng. Saantayo manen nga ipasdek ti pundasion iti panagbabawi manipud kadagiti awan serserbina nga ar-aramid ken ti pammati iti Dios,
2
wenno ti pundasion iti sursuro maipapan iti panagbautisar, ti panangipatay kadagiti ima, ti panagungar dagiti natay, ken agnanayon a pannaka-ukom.
3
Aramidentayonto met daytoy no ipalubos ti Dios.
4
Ta saan a mabalin a mapasamak kadagiti naminsanen a nalawlawagan, a nakaraman iti nainlangitan a sagut, dagiti nakibingay iti Espiritu Santo,
5
ken dagiti nakaraman iti nasayaat a sao ti Dios ken dagiti pannakabalin iti mapasungad a panawen,
6
ken kalpasanna, immadayoda—saan a mabalin a maisublida manen iti panagbabawi. Daytoy ket gapu ta inlansada manen ti Anak ti Dios para kadakuada, pinabainanda isuna iti publiko.
7
Ta ti daga nga uminum iti tudo a masansan nga umay iti dayta, ken mangipasngay kadagiti mula a makausar kadagiti natrabahoan a daga—daytoy ti daga nga umawat iti bendision manipud iti Dios.
8
Ngem no mangipaay kadagiti sisiit ken ruot, awan serserbi daytoy ken agpeggad iti pannakailunod. Aggibus a mapupuoran.
9
Ngem kombinsidokami maipapan kadagiti nasaysayaat a banag maipapan kadakayo, ay-ayaten, dagiti banag a maipapan iti pannakaisalakan, uray no kastoy ti panagsaomi.
10
Ta saan a nakillo ti Dios. Saanna a malipatan ti aramidmo ken ti ayat nga impakitam iti naganna, gapu ta nagserbika kadagiti nasantoan a tattaona, ket agserserbika pay laeng kadakuada.
11
Tarigagayanmi unay a tunggal maysa kadakayo ket mangipakita iti isu met laeng a kinagaget agingga iti panungpalan, tapno masigurado ti namnamayo.
12
Saanmi a kayat nga agbalinkayo a nasadut, no di ket tuladenyo dagidiay babaen ti pammati ken anus a mangtawid kadagiti kari.
13
Ta idi inaramid ti Dios ti karina ken Abraham, nagsapata iti bagina, yantangay saanna a mabalin ti agsapata iti siasinoman a dakdakkel.
14
Kinunana, "Sigurado a bendisionanka ken ikkanka iti adu a kaputotan."
15
Iti kasta, nagun-od ni Abraham ti naikari kalpasan a siaanus a naguray.
16
Ta agsapata dagiti tattao iti maysa a dakdakkel ngem iti bagida. Iti udi ti tunggal panagbibinnusorda, agserbi ti sapata kas pammaneknek.
17
Idi inkeddeng ti Dios nga ipakita a nalawag kadagiti agtawid iti kari ti di agbaliwbaliw a kalidad ti panggepna, ingarantiyana dayta babaen ti sapata.
18
Inaramidna daytoy tapno babaen ti dua a di agbaliwbaliw a banag —nga imposible nga agulbod ti Dios —datayo, a nagtalaw tapno agkamang, ket maaddaan iti napigsa a pammaregta a mangpetpet a sititibker iti namnama a naikabil iti sanguanantayo.
19
Adda kadatayo daytoy kas natalged ken mapagtalkan nga angkla para iti kararua, maysa a namnama a sumrek iti makin-uneg a lugar iti likudan ti kurtina,
20
no sadino a ni Jesus, nga immun-una ngem datayo, simrek iti dayta a lugar maipaay kadatayo. Nagbalinen a nangato a padi iti agnanayon a kas iti urnos ni Melkisedek.