¹ Ta ti tunggal kangatoan a padi, a napili manipud kadagiti tattao, ket nadutokan nga agtignay a mangitaktakder kadakuada kadagiti banbanag a mainaig iti Dios, tapno mangidaton iti sagut ken saksakripisyo para kadagiti basbasol. ² Kabaelanna ti makilangenlangen a siaalumamay kadagiti nakuneng ken ti naallilaw, gapu ta isuna mismo ket nagdalan iti kinakapuy. ³ Gapu iti daytoy, adda met rebbengna a mangidatag kadagiti daton para kadagiti basolna kas iti aramidenna para kadagiti basol dagiti tattao. ⁴ Ken awan ti tao a mangala iti daytoy a dayaw para iti bagbagina. Ngem ketdi, inayaban isuna ti Dios, kas iti pannakaayab ni Aaron. ⁵ Iti isu met laeng nga wagas, saan met nga intan-ok ni Kristo ti bagbagina iti panagbalinna a padi. Ngem ketdi, kinuna ti Dios kenkuana, "Sika ti Anakko; ita nga aldaw nagbalinak nga Amam." ⁶ Daytoy ket kas met laeng iti ibagbagana iti sabali a paset, "Padika nga agnanayon a kas iti kinapadi ni Melkisedek." ⁷ Bayat iti nainlasagan a tiempona, nangidaton isuna kadagiti kararag ken kiddaw nga adaan napigsa nga asug ken lulua, ti makaisalakan kenkuana manipud ken patay ket nangngengan ti Dios isuna gapu iti nadiosan a biagna. ⁸ Uray no Anak isuna, naadalna ti panagtulnog kadagiti banbanag a sinagabana. ⁹ Naaramid isuna a perpekto ken nagbalin, kadagiti amin nga agtulnog kenkuana, nagbalin nga pakaisalakanan iti agnanayon. ¹⁰ Nadutokan isuna ti Dios nga agbalin a kangatoan a padi a kas iti kinapadi ni Melkisedek. ¹¹ Adu pay ti kayatmi nga ibaga maipanggep kenni Jesus, ngem narigat nga ipalawag agsipud ta namudel ti panagdengngegyo. ¹² No pay mangisursurokayo koman kadagitoy a tiempo, kasapulanyo pay laeng nga adda mangisuro kadakayo kadagiti nasken a sursuroenyo maipanggep iti sasao ti Dios. Masapulyo ti gatas, saan a natangken a taraon! ¹³ Ta ti siasinoman a makainom laeng iti gatas ket awan kapadasanna iti mensahe iti kinalinteg, ta maladaga pay laeng isuna. ¹⁴ Maysa pay, ti natangken a taraon ket para kadagiti nataengan, dagiti nasuroan a mangilasin iti nasayaat ken dakes gapu iti kapadasanda a mangammo iti naimbag ken dakes.