¹ Ngarud, gapu ta ti kari iti pannakastrek iti panaginana na ket mabalin pay laeng a sitatakder, saantayo nga agbuteng, tapno awan kadakayo iti matinnag nga agkurang. ² Ta adda kadatayo ti naimbag a damag a kas kadakuada. Ngem dayta a mensahe ket saan a nangted iti pagimbagan kadagiti nakangngeg no saanda a makitipon iti pammati iti daytoy. ³ Ta datayo a namati—datayonto dagiti makastrek iti dayta a panaginana, a kas naibaga, "Kas insapatak iti pungtotko, saandanto a makastrek iti panaginanak." Kinunana daytoy, uray no nalpasen dagiti trabahona a panangparsua manipud idi panangrugi ti lubong. ⁴ Ta kinunana iti sadinoman maipanggep iti maikapito nga aldaw: "Naginana ti Dios iti maikapito nga aldaw manipud kadagiti amin nga inaramidna." ⁵ Kinunana manen iti daytoy a paset, "Saandanto a makastrek iti panaginanak." ⁶ Ngarud, agtalinaed pay laeng kadagiti sumagmamano ti sumrek iti panaginana, ken kadagiti napalabas nga addaan iti naimbag a damag nga naipakaammo kadakuada nga saan a nakastrek gapu iti panagsukirda. ⁷ Nangikeddeng ngarud manen ti Dios iti maysa a manamnama nga aldaw, a naawagan nga "Ita nga Aldaw." idi nakisarita isuna babaen kenni David a nangibaga idi nabayagen a panawen, "Ita nga aldaw no dumngegkayonto iti timekna, saanyo a patangkenen dagiti pusoyo." ⁸ Ta no inikkan ida ni Josue ti inana, saanen a nagsao ti Dios maipanggep iti sabali nga aldaw. ⁹ Ngarud, adda latta ti Aldaw a Panaginana a nakasagana para kadagiti tattao ti Dios. ¹⁰ Ta ti siasinoman a makastrek iti panaginana ti Dios ket naginana met manipud kadagiti ar-aramidna, a kas inaramid ti Dios Kenkuana. ¹¹ Ngarud, sigagagartayo koma a sumrek iti dayta a panaginana, tapno awan ti matinnagto iti dayta a kita ti saan a panagtulnog a naaramidda. ¹² Ta sibibiag ken naalibtak ti sao ti Dios ken natadtadem ngem uray aniaman a kampilan nga agsumbangir ti tademna. Tubngarenna uray ti pagsabatan ti kararua manipud iti espiritu, ken kadagiti nagsusuopan manipud iti pata. Kabaelanna a maammoan dagiti kapanunotan ken dagiti panggep ti puso. ¹³ Awan ti naparsua a banag a nailemmeng manipud iti imatang ti Dios. Ngem ketdi, lamo-lamo amin a banag ken silulukat kadagiti mata ti maysa a masapul a pangitedantayo iti palawag. ¹⁴ Ngarud, gapu ta addaantayon iti naindaklan a kangatoan a padi a limmasat kadagiti langlangit, ni Jesus nga Anak ti Dios, tengngelentayo a siiirut dagiti pammatitayo. ¹⁵ Ta saantayo nga addaan iti kangatoan a padi a saan a makipagrikna kadagiti kinakapuytayo. Ngem, addaan tayo iti maysa a nasulisog iti amin a wagas a kas kadatayo, malaksid iti dayta, saan isuna a nagbasol. ¹⁶ Isunga umasidegtayo ngarud nga addaan iti talged iti trono ti parabur, tapno maawattayo ti asi ken masarakantayo ti parabur a makatulong iti tiempo ti pagkasapulan.