¹ Ngarud, nasantoan a kakabsat, mairaman kayo iti nainlangitan a pannakaayab. Panunutenyo ni Jesus, ti apostol ken kangatoan a padi ti pammatitayo. ² Napudno isuna iti Dios, a nangdutok kenkuana, kas kenni Moises a napudno met iti amin a balay iti Dios. ³ Ta naibilang ni Jesus a maikari iti nangatngato a pammadayaw ngem ni Moises, gapu ta ad-adda a mapadpadayawan ti nangipasdek iti balay ngem iti mismo a balay. ⁴ Ta adda nangipasdek iti tunggal balay, ngem ti Dios ti nangipasdek iti amin a banbanag. ⁵ Ta napudno ni Moises kas maysa nga adipen iti amin a balay iti Dios, a nangnangted iti pammaneknek maipapan kadagiti banbanag a maibaganto iti masakbayan. ⁶ Ngem ni Kristo isu ti Anak a mangaywan iti balay iti Dios. Datayo iti balayna no kumpettayo a sititibker iti turedtayo ken maipagpannakkel a talgedtayo. ⁷ Ngarud, daytoy ket kas ti imbaga iti Espiritu Santo:" Ita, no mangngegyo ti timekna, ⁸ saanyo a patangkenen dagiti puspusoyo a kas inaramid dagiti Israelita iti panagrebeldeda, idi panawen iti pannakasuot idiay let-ang. ⁹ Daytoy ket idi nagrebelde dagiti kapuonanyo babaen iti panangsusuotda kaniak, kalpasan a nakitada dagiti ar-aramidko iti uppat a pulo a tawen. ¹⁰ Saanak ngarud a naay-ayo iti dayta a henerasyon. Kinunak, 'Kankanayon a maiyaw-awan dagiti puspusoda. Saanda nga ammo dagiti wagasko.' ¹¹ Daytoy ket kas iti panangsapatak iti ungetko: didanto makastrek iti paginanaak." ¹² Agannadkayo, kakabsat, tapno awanto koma ti addaan iti dakes a puso a saan a mamati, maysa a puso a mangtalikod iti sibibiag a Dios. ¹³ Ngem ketdi agpipinnabilegkayo iti inaldaw, ita ta maawagan pay laeng a "tatta", tapno awan kadakayo ti mapatangken babaen iti panangallilaw iti basol. ¹⁴ Gapu ta nagbalintayo a kadua ni Kristo no sititibkertayo a kumpet iti talgedtayo kenkuana manipud idi un-unana agingga iti panungpalan. ¹⁵ Naisao maipapan iti daytoy, "Ita nga aldaw, no denggenyo ti timekna, saanyo a patangkenen dagiti puspusoyo, kas iti inaramid dagiti Israelita iti panagrebeldeda. ¹⁶ Siasino iti nakangngeg iti Dios ket nagrebelde? Saan kadi nga amin dagiti indalan ni Moises a rimmuar iti Ehipto? ¹⁷ Ket siasino ti nagpungtotan iti Dios iti uppat a pulo a tawen? Saan kadi a dagiti nagbasol, a natinnag idiay let-ang dagiti natay a bagbagida? ¹⁸ Siasino ti nagsapataan iti Dios a saanda a makastrek iti paginanaanna, no di dagiti saan nga agtultulnog kenkuana? ¹⁹ Makitatayo a di da makastrek iti paginanaanna gapu iti saanda a pannamati.