¹ Ngarud, masapul nga ad-adda nga ipangagtayo ti nangngegantayo tapno saantayo nga umadayo iti daytoy. ² Ta no pudno ti mensahe a naisao babaen kadagiti anghel, ken umawat iti maiparbeng a pannusa ti tunggal panaglabsing ken panagsukir, ³ kasanotayo ngarud a makalibas no saantayo nga ikaskaso ti naindaklan a pannakaisalakan? Daytoy a pannakaisalakan nga immuna nga impakaammo ti Apo kadatayo ken napaneknekan kadatayo dagiti nakangngeg iti daytoy. ⁴ Pinaneknekan met ti Dios daytoy babaen kadagiti pagilasinan, nakaskasdaaw, ken babaen iti nadumaduma a nabibileg nga ar-aramid, ken babaen kadagiti sagut ti Espiritu Santo nga inwarasna segun iti pagayatanna. ⁵ Saan a dagiti anghel ti pagturayen iti Dios iti lubong nga umay, nga isu iti sarsaritaenmi. ⁶ Ngem ketdi, adda idi iti nangpaneknek iti maysa a lugar a kunana, "Siasino aya ti tao ta silalagipka kenkuana? Wenno ti anak ti tao ta ipategmo isuna? ^{8 7} Inaramidmo ti tao a nababbaba bassit ngem kadagiti anghel; kinoronaam isuna iti dayag ken dayaw. (Innayun ti dadduma nga manuskrito iti: ket ingkabil mo ti tao a mangituray kadagiti aramid dagiti imam.) 8 Inkabilmo ti tunggal banag iti sakaananna tapno iturayanna." Ta pinaiturayan ti Dios ti amin a banag iti sangkatao-an. Awan aniaman a banag nga imbatina a saanna a pinaiturayan kenkuana. Ngem ita, saantayo pay laeng a makita nga iturturayanna ti amin a banag. ⁹ Ngem makitkitatayo isuna a napagbalin nga nababbaba kadagiti angheles iti apagbiit, nakoronaan iti dayag ken dayaw maigapo iti panagsagabana ken pannakatayna, tapno babaen iti paraburna ket mapadasan ti amin iti pannakatay. ¹⁰ Rumbeng laeng para iti Dios, gapu ta agbibiag ti tunggal banag kenkuana ken babaen kenkuana, ket ipanna ti adu nga annak iti dayagna. Rumbeng kenkuana nga agbalin a nangbangon ti pannakaisalakanda babaen kadagiti panagsagsagabana. ¹¹ Ta agpada a ti mangsangsangktipikar ken dagiti nasangtipikar ket maymaysa iti nagapuanda. Gapu iti daytoy, saan isuna a mabain nga mangawag kadakuada a kakabsat. ¹² Kunana, "Ipakaammokto ti naganmo kadagiti kakabsatko, ikankantakto ti maipanggep kenka manipud iti taripnong. ¹³ Ket kunana manen, "Agtalekak kenkuana." Ken kunana manen, "Kitaem, adtoyak ken dagiti annak nga inted ti Dios kaniak. ¹⁴ Ngarud, yantangay ta addaan iti lasag ken dara dagiti amin nga annak ti Dios, addaan met ni Hesus kadagiti isu met laeng a banbanag, tapno babaen iti ipapatay, mabalin a dadaelenna ti bileg ti patay, dayta ket ti diablo. ¹⁵ Daytoy ket tapno wayawayaanna dagiti nagbiag iti pannakatagabu iti unos ti panagbiagda gapu iti panagbuteng iti pannakatay. ¹⁶ Ta awan duadua a saan a dagiti anghel ti tultulonganna. Ngem ketdi, dagiti henerasyon ni Abraham. ¹⁷ Kasapulan ngarud nga agbalin isuna a kas kadagiti kakabsatna iti amin a wagas, tapno agbalin isuna a naasi ken napudno a kangatoan nga padi kadagiti banbanag ti Dios, ken tapno magun-odna ti pannakapakawan ti basbasol dagiti tattao. ¹⁸ Gapu ta nagsagaba mismo ni Jesus, napadas met isuna, kabaelanna a tulongan dagiti mapadpadas.