¹ Iti nabayagen a panawen, nagsao ti Dios iti adu a daras ken adu a wagas kadagiti kapuonantayo babaen kadagiti profeta. ² Ngem kadagitoy a maud-udi nga al-aldaw, nagsao ti Dios kadatayo babaen ti Anak, a dinutokanna a tagatawid kadagiti amin a banbanag, ken naaramid iti sangalubongan babaen kenkuana. ³ Ti Anakna ti raniag iti dayagna, ti kababalin iti kinasiasinona, ken iggamanna amin a banbanag babaen iti sao ti pannakabalinna. Kalpasan iti pannakagun-odna iti pannakadalus kadagiti basbasol, nagtugaw isuna iti makannawan nga ima iti Kangatoan a Pannakabalinna. ⁴ Nagbalin isuna a naturturay ngem kadagiti anghel, a kas ti nagan a natawidna ket natantan-ok ngem iti naganda. ⁵ Ta siasino kadi kadagiti anghel iti nangibagaanna, "Sika ti anakko, ita nga aldaw nagbalinak nga amam"? ken ibagbagana manen, "agbalinakto nga ama kenkuana, ken agbalinto isuna nga anak kaniak"? ⁶ Ngem, idi inyeg ti Dios iti inauna nga naipasngay ditoy lubong, imbagana, "Masapul nga agrukbab kenkuana dagiti amin nga anghel ti Dios." ⁷ Ibagbagana maipanggep kadagiti anghel, "Isuna a nangaramid kadagiti anghelna nga espiritu, ken kadagiti adipenna a gil-ayab ti apoy." ⁸ Ngem iti Anak, ibagana, "Ti tronom, O Dios, ket agnanayon nga awan patinggana. Ti setro iti pagariam ket setro iti hustisia. ⁹ Inayatmo iti kinalinteg ken ginuram iti kinaawan iti linteg. Ngarud ti Dios, ti Diosmo, pinulutonnaka iti lana ti rag-o nga ad-adda ngem kadagiti kakadduam." ¹⁰ "Idi un-unana, O Apo, inaramidmo ti pondasion ti daga. Dagiti langlangit ket isu ti ar-aramid dagiti imam. ¹¹ Mapukawdanto, ngem agtultuloyka. Marunotdanto amin a kasla ti pagan-anay. ¹² Lukutemto ida a kasla iti kagay, ken masukatandanto a kasla iti pagan-anay. Ngem saanka nga agbalbaliw, ken saan nga agpatingga dagiti tawtawenmo." ¹³ Ngem siasino kadagiti anghel ti nangibagaan ti Dios iti aniaman a tiempo, "Agtugawka iti makannawan nga imak agingga a pagbalinek dagiti kabusormo a pagbatayan dagiti sakam"? ¹⁴ Saan kadi nga amin dagiti anghel ket espiritu da a naibaon tapno agserbi, ken mangaywan kadagiti agtawid iti pannakaisalakan?