¹ Ta ti linteg ket anniniwan laeng dagiti nasayaat a banag nga umay, saan a dagiti pudno a porma dagita a banag a mismo. Dagidiay umasideg iti Dios saan a pulos a mapagbalin a perpekto babaen kadagiti isu met laeng a daton nga agtultuloy nga iyeg dagiti papadi iti tinawen. ² Ta no saan, saan ngata a nagsardeng ti pannakaidaton dagiti daton? Ta dagiti agdaydayaw ket nadalusan koma iti naminsan ket awanton ti aniaman a pannakaammo iti basol. ³ Ngem kadagita a daton adda tinawen a palagip kadagiti basol. ⁴ Ta imposible a ti dara dagiti baka ken kalding ti mangikkat kadagiti basol. ⁵ Idi immay ni Kristo ditoy lubong, kinunana, "Saanmo a tinarigagayan dagiti sakripisio ken daton, no di ket bagi nga insaganam para kaniak; ⁶ kadagiti daton a mapuoran ken daton gapu iti basol saankayo ​​a naragsakan. ⁷ Kalpasanna, kinunak, ‘Kitaem, adtoyak— kas naisurat maipapan kaniak iti lukot— tapno aramidek ti pagayatam, Dios.’ ⁸ Umuna kinunana, "Saan a dagiti sakripisio, wenno daton, wenno sibubukel a daton a mapuoran, wenno daton gapu iti basol ti tinarigagayanyo. Saankayo ​​met a naragsakan kadagitoy." Dagitoy ket sakripisio a maidaton a maitunos iti linteg. ⁹ Kalpasanna kinunana, "Kitaem, adtoyak tapno aramidek ti pagayatam." Alaenna ti umuna nga aramid tapno maipasdek ti maikadua nga aramid. ¹⁰ Babaen iti dayta a pagayatan, nasantipikartayo babaen iti daton ti bagi ni Jesu-Kristo a mamimpinsan. ¹¹ Inaldaw nga agtakder ken agserbi ti tunggal padi, a maulit-ulit nga idatonna dagiti isu met laeng a daton —daton a di pulos maikkat dagiti basol. ¹² Ngem idi indaton ni Kristo iti amin a tiempo ti maysa a daton para kadagiti basol, nagtugaw iti makannawan ti Dios. ¹³ Agur-uray agingga a mapagbalin dagiti kabusorna a pagbatayan dagiti sakana. ¹⁴ Ta babaen ti maymaysa a daton, pinaperpektona iti agnanayon dagiti masantipikar. ¹⁵ Paneknekan met kadatayo ti Espiritu Santo. Umuna kunana, ¹⁶ "Daytoy ti tulag nga aramidekto kadakuada kalpasan dagita nga aldaw, kuna ti Apo. Ikabilkonto dagiti lintegko kadagiti pusoda, ket isuratko ida iti panunotda." ¹⁷ Kalpasanna innayonna, "Dagiti basol ken kinakilloda diakton malagip." ¹⁸ Ita no sadino ti ayan ti pammakawan kadagitoy, awanen ti daton para iti basol. ¹⁹ Ngarud, kakabsat, adda panagtalektayo a sumrek iti kasasantoan a disso babaen ti dara ni Jesus. ²⁰ Dayta ti baro ken sibibiag a dalan nga impasdekna kadatayo babaen iti kurtina, kayatna a sawen, babaen ti lasagna. ²¹ Gapu ta addaantayo iti naindaklan a padi iti balay ti Dios, ²² yasidegtayo nga addaan iti pudno a puso iti naan-anay a pammatalged iti pammati, a nawarsian dagiti pusotayo a nadalus manipud iti dakes a konsiensia ken mabugguan ti bagitayo iti nadalus a danum. ²³ Petpetantayo met a sititibker ti namnama nga ipudnotayo, ta napudno ti nangikari. ²⁴ Pampanunotentayo a naimbag no kasano ti agpipinnateg iti ayat ken naimbag nga aramid. ²⁵ Saantayo koma a baybay-an ti panagu-ummong, kas iti inaramid ti dadduma. Imbes ketdi, agpipinnaregtakayo, ken ad-adda pay bayat a makitayo nga umas-asideg ti aldaw. ²⁶ Ta no inggagaratayo ti agbasol kalpasan a naawattayo ti pannakaammo iti kinapudno, saanen nga agtalinaed ti daton para kadagiti basol. ²⁷ Imbes ketdi, adda laeng maysa a nakabutbuteng a namnama iti pannakaukom, ken ti pungtot ti apuy a mangbusbos kadagiti kabusor ti Dios. ²⁸ Siasinoman a nangilaksid iti linteg ni Moises ket matay nga awan asi iti pammaneknek ti dua wenno tallo a saksi. ²⁹ Kasano a nakarkaro a dusa ti pagarupyo a maikari ti maysa a nangraut iti Anak ti Dios, a nangibilang iti dara ti tulag a kas saan a nasantoan—ti dara a nakasantipikaranna—ken nanginsulto iti Espiritu ti parabur? ³⁰ Ta ammotayo daydiay nagkuna, "Kukuak ti panagibales; bayadakto." Ket manen, "Ukomento ti Apo dagiti tattaona." ³¹ Nakabutbuteng a banag ti matnag kadagiti ima ti sibibiag a Dios! ³² Ngem laglagipem dagiti immun-una nga aldaw, kalpasan ti pannakalawlawagmo, no kasano nga inibturam ti dakkel a pannakidangadang iti panagsagaba. ³³ No dadduma, naipasangokayo iti publiko iti pannakainsulto ken pannakaidadanes, ken no dadduma, inramanyo dagiti kasta ti pannakatratoda. ³⁴ Ta naasiankayo ​​kadagiti balud, ket inawatyo a siraragsak ti pannakaagaw dagiti sanikuayo. Ammoyo a dakayo a mismo ket addaan iti nasaysayaat ken agnanayon a sanikua. ³⁵ Isu a dimo ibelleng ti panagtalekmo, nga addaan iti dakkel a gunggona. ³⁶ Ta kasapulanyo ti panagibtur tapno inton maaramidyo ti pagayatan ti Dios, maawatyo ti inkarina. ³⁷ "Ta iti bassit unay a kanito, ti umay ket pudno nga umay ket saan nga agtaktak." ³⁸ Agbiagto ti nalinteg babaen ti pammati. No agsubli, saanto a maay-ayo kenkuana ti kararuak." ³⁹ Ngem saantayo a siasinoman kadagiti agsubli iti pannakadadael, no di ket karamantayo kadagiti addaan pammati ken mangsalsalaknib kadagiti kararuada.