¹ Ita ti pammati ket ti panangsigurado kadagiti banag a namnamaen ken panangsigurado kadagiti banag a saan a makita. ² Ta gapu iti daytoy naanamongan dagiti kapuonan gapu iti pammatida. ³ Babaen iti pammati maawatantayo a ti entero a lubong ket naparsua babaen iti bilin ti Dios, isu a ti makita ket saan a naaramid manipud kadagiti banag a makita. ⁴ Babaen ti pammati a nangidaton ni Abel iti Dios iti nasaysayaat a daton ngem ni Cain, a babaen iti dayta napaneknekan a nalinteg, ket nagsao ti Dios iti nasayaat maipapan kenkuana gapu kadagiti datonna, ket babaen ti pammati agsasao pay laeng ni Abel, uray no natayen. ⁵ Gapu iti pammati a naipangato ni Enoc tapno saanna a nakita ti ipapatay. "Saan a nasarakan, gapu ta innala ti Dios." Ta sakbay a naipangato, napaneknekan a naay-ayona ti Dios. ⁶ Ita no awan ti pammati, saan a mabalin a maay-ayo isuna. Ta nasken a patien ti siasinoman nga umay iti Dios nga adda isuna ken gunggonaanna dagiti agsapsapul kenkuana. ⁷ Babaen ti pammati a ni Noe, gapu ta naikkan iti nadiosan a mensahe maipapan kadagiti banag a saan pay a nakita, buyogen ti nadiosan a panagraem nangaramid iti daong a mangisalakan iti sangakabalayanna. Babaen ti panangaramidna iti daytoy, kinondenarna ti lubong ket nagbalin nga agtawid iti kinalinteg a maitunos iti pammati. ⁸ Babaen ti pammati a ni Abraham, idi naayaban, nagtulnog ket rimmuar iti lugar nga awatenna kas tawid. Rimmuar, dina ammo ti papananna. ⁹ Babaen iti pammati a nagbiag isuna iti daga a naikari a kas ganggannaet. Nagnaed kadagiti tolda a kaduana da Isaac ken Jacob, padana nga agtawid iti isu met laeng a kari. ¹⁰ Ta paspasungadanna idi ti siudad nga addaan kadagiti pundasion, a ti arkitekto ken nangbangon kenkuana isu ti Dios. ¹¹ Gapu iti pammati, nupay lupes a mismo ni Sara, a nakagun-od iti abilidad nga agsikog. Napasamak daytoy uray no baketen isuna, yantangay imbilangna a matalek daydiay nangted iti kari. ¹² Gapuna, manipud iti daytoy maysa a tao—ket dandani natayen—nayanak dagiti kaputotan a kas kaadu dagiti bituen iti tangatang ken di mabilang a kas iti darat iti igid ti baybay. ¹³ Iti pammati a natay amin dagitoy a dida inawat dagiti kari. Imbes ketdi, nakita ken kinablaawanda ida manipud iti adayo, ket binigbigda a ganggannaet ken naipanawda ditoy daga. ¹⁴ Ta dagiti agsasao iti kastoy a banbanag ilawlawagda a sapsapulenda ti pagtaenganda. ¹⁵ No pampanunotenda koma ti pagilian a naggapuanda, adda koma gundawayda nga agsubli. ¹⁶ Ngem kas iti adda, tarigagayanda ti nasaysayaat a pagilian, kayatna a sawen, nainlangitan. Ngarud saan a mabain ti Dios a maawagan iti Diosda, yantangay nangisagana iti siudad para kadakuada. ¹⁷ Babaen ti pammati a ni Abraham, idi nasubok, indatonna ni Isaac. Isu ti kakaisuna nga anakna nga indatonna, isu ti nakaawat kadagiti kari. ¹⁸ Ni Abraham, naibaga kenkuana, "Babaen ken Isaac a mainagananto dagiti kaputotam." ¹⁹ Inrason ni Abraham a kabaelan ti Dios a pagungaren ni Isaac manipud kadagiti natay, ket iti sabali a pannao, manipud kadakuada ti inawatna manen. ²⁰ Babaen met iti pammati maipapan kadagiti bambanag nga umay a binendisionan ni Isaac da Jacob ken Esau. ²¹ Babaen iti pammati a ni Jacob, idi matmatayen, binendisionanna ti tunggal maysa kadagiti annak ni Jose. Nagdaydayaw ni Jacob, a nagsanggir iti tuktok ti sarukodna. ²² Babaen iti pammati a ni Jose, idi asidegen ti panungpalanna, nagsao maipapan iti ipapanaw dagiti annak ti Israel manipud Ehipto ket insurona ida maipapan kadagiti tulangna. ²³ Gapu iti pammati a ni Moises, idi naipasngay, ket inlemmeng dagiti dadakkelna iti tallo a bulan gapu ta nakitada nga isu ket napintas nga ubing. Saanda a nagbuteng iti bilin ti ari. ²⁴ Babaen iti pammati, kalpasan ti panagdakkelna, nagkedked ni Moises a maawagan iti anak ni Faraon. ²⁵ Pinilina ti matrato a kadua dagiti tattao ti Dios imbes a tagiragsaken ti ragsak ti basol iti apagbiit. ²⁶ Imbilangna ti pannakaibabain gapu ken Kristo a dakdakkel ngem dagiti gameng ti Ehipto, ta kitkitaenna ti gunggona. ²⁷ Gapu iti pammati a pimmanaw ni Moises iti Ehipto. Saan isuna a nagbuteng iti pungtot ti ari, ta inibturanna a kasla makitkitana daydiay di makita. ²⁸ Babaen iti pammati a rinambakanna ti Paskua ken ti panangiwarsi iti dara, tapno saan a sagiden ti mangdadael kadagiti inauna nga annak dagiti inauna nga annak dagiti Israelita. ²⁹ Babaen ti pammati a limmasatda iti Baybay ti Runo a kasla iti rabaw ti namaga a daga. Idi pinadas dagiti Egipcio nga aramiden daytoy, natilmonda. ³⁰ Babaen iti pammati a narebba dagiti pader ti Jerico, kalpasan ti pito nga aldaw a nalikmutda. ³¹ Babaen iti pammati ket saan a natay ni Rahab a balangkantis a kadagiti nasukir, gapu ta sitatalna nga inawatna dagiti espia. ³² Ania pay ti maibagak? Ta agkurangto ti panawen no ibagak ti naan-anay a salaysay maipapan kada Gideon, Barak, Samson, Jefte, David, Samuel, ken maipapan kadagiti profeta. ³³ Babaen iti pammati a pinarmekda dagiti pagarian, inaramidda ti kinalinteg, ken nakaawatda kadagiti kari. Pinasardengda ti ngiwat dagiti leon, ³⁴ ineddepda ti bileg ti apuy, nakalibasda iti tadem ti kampilan, napapigsada idi nakapuyda, nagbalinda a nabileg iti gubat, ken pinarmekda dagiti ganggannaet a buyot. ³⁵ Inawat manen dagiti babbai dagiti natayda babaen ti panagungar. Naparigat ti dadduma, a dida inawat ti pannakawayawaya, tapno makapadasda iti nasaysayaat a panagungar. ³⁶ Napadasan ti dadduma ti pannakauyaw ken pannakasapsaplit, ken uray pay pannakakawar ken pannakaibalud. ³⁷ Nabatoda. Napagsina dagitoy iti dua. Napapatayda babaen ti kampilan. Nagdaliasatda a nakakutkot iti lalat ti karnero ken kalding. Napanglawda, nairurumen, namaltratoda. ³⁸ Saan a maikari ti lubong kadakuada. Kanayon nga aggargarawda kadagiti let-ang ken kabambantayan, ken kadagiti kueba ken abut iti daga. ³⁹ Nupay amin dagitoy a tattao ket inanamongan ti Dios gapu iti pammatida, saanda nga inawat ti kari. ⁴⁰ Nagplano ti Dios iti nasaysayaat a banag para kadatayo, tapno no awantayo, saanda a naan-anay.