¹ Ngem ammoem daytoy: kadagiti maudi nga aldaw addanto dagiti narigrigat a tiempo. ² Ta dagiti tattao ket managayatdanto iti bagbagida, managayatda iti kuarta, napalangguadda, itan-okda iti bagbagida, managtabbaawda, nasukirda kadagiti nagannakda, saanda a managyaman, ken saanda a nasantoan. ³ Awanandanto iti gagangay a panangipateg, saanda a mannakikappia, mammadpadakesda, darasudosda, naranggasda, ken saanda a managayat iti naimbag. ⁴ Manangliliputda, natangken ti uloda, nangato ti panangkitada iti bagbagida, pagaayatda iti nainlubongan a ragragsak a saan ket a managayat iti Dios. ⁵ Maaddaandanto iti pakakitaan iti nadiosan a panagbiag, ngem ilibakdanto ti bilegna. Adaywam dagitoy a tattao. ⁶ Ta dadduma kadakuada ket lallaki a sumsumrek kadagiti pagtaengan ket al-allilawenda dagiti maag a babbai. Dagitoy a babai nga napnoan iti basbasol ken inyadayo dagiti nadumaduma a tarigagay. ⁷ Dagitoy dagiti babbai a kanayon nga agad-adal, ngem saanda a pulos a kabaelan a maaddaan iti pannakaammo ti kinapudno. ⁸ No kasano a da Hanes ken Hambres ket bimmusorda kenni Moises, kasta met a dagitoy a palso a manursuro ket salsalungasingenda ti kinapudno. Isuda ket lallaki a nadadael iti panunotna, ken isuda ket palso no maipanggep iti pammati. ⁹ Ngem saandanto a makaadayo. Ta nalawagto a makita iti amin ti kinamaagda, kas iti kinamaag dagidiay a lallaki. ¹⁰ Ngem sika, sinurotmo ti sursurok, ugali, panggep, pammati, panaganus, ayat, kinaanus, dagiti pannakaidadanes, ¹¹ dagiti panagsagsagaba, ken iti napasamak kaniak idiay Antiokia, idiay Iconio ken idiay Listra. Inanusak dagiti pannakaparigat. Ket kadagita amin, inispalnak ti Dios. ¹² Amin dagidiay kayatna nga agbiag iti nadiosan a wagas kenni Kristo Jesus ket maparigat. ¹³ Ket dagiti dakes a tattao ken managpammarang, ad-addanto to pay a dumakesda. Iyaw-awandanto dagiti sabali. Ket isuda a mismo ti maiyaw-awan. ¹⁴ Ngem sika, agtalinaedka kadagiti banbanag a nasursurom ken sititibker iti pinatim. Ammom no siasino ti nakasursuruam. ¹⁵ Ammom a manipud iti kinaubingmo ket naammoam dagiti nasagradoan a sursurat. Pagbalinendaka dagitoy a nasirib maipanggep iti pannakaisalakan babaen iti pammati nga adda kenni Kristo Jesus. ¹⁶ Ti entero a nasantoan a surat ket indalan ti Dios. Daytoy ket mausar para iti doktrina, iti panakakumbinsi, iti panangbabalaw, ken panagsanay iti kinalinteg. ¹⁷ Daytoy ket tapno mabalin a naan-anay ti tao ti Dios, ken maisagana para iti tunggal nasayaat nga aramid.