¹ Itedko daytoy napasnek a bilin kenka iti sangoanan ti Dios ken ni Kristo Jesus, a mangukomto kadagiti sibibiag ken kadagiti natay, ken gapu iti panagparangna ken iti pagarianna: ² Ikasabam ti Sao; nakasaganaka koma no kasta a nanam-ay ken no saan. Mangbabalawka, mangtubngarka, mammagbagaka, nga addaan iti isu amin a kinaanus ken panangisuro. ³ Ta dumtengto ti tiempo a saanto a maanusan dagiti tattao ti pudno a sursuro. Ngem ketdi, agurnongdanto para kadagiti bagbagida kadagiti manursuro segun iti bukodda a tarigagay, ket ibaganto met dagitoy ti makaay-ayo iti panagdengngegda. ⁴ Saandanto a denggen ti kinapudno, ket patienda dagiti mitolohia. ⁵ Ngem sika, naannad koma ti panagpanpanunotmo iti amin a banbanag. Ibturam ti kinarigat; aramidem ti trabaho ti maysa nga ebanghelista; aramidem ti trabahom. ⁶ Ta siak ket maiparparukpuken. Ti tiempo iti ipapanawko ket dimtengen. ⁷ Nakirangetak iti nasayaat a panakiranget; Naileppasko ti lumba; Inaywanak ti pammati. ⁸ Ti korona ti kinalinteg ket naisagana a maipaay kaniak, a ti Apo, ti nalinteg nga ukom, ket itednanto kaniak iti dayta nga aldaw, ken saan a kaniak laeng, ngem kadagiti met amin a naayat a mangur-uray iti panagparangna. ⁹ Ikagumaam nga umay kaniak a dagus. ¹⁰ Ta pinanawannak ni Demas. Ipatpategna daytoy agdama a lubong ken napan idiay Tesalonica. Napan ni Kresen idiay Galasia, ken napan ni Tito idiay Dalmasia. ¹¹ Ni laeng Lukas ti kaduak. Isurotmo ni Markos gapu ta makatulong isuna kaniak iti trabaho. ¹² Imbaonko ni Tikiko idiay Efeso. ¹³ Itugotmo inton umayka ti kagay nga imbatik kenni Karpo idiay Troas, ken dagiti librok, kangrunaan dagiti pagsuratan. ¹⁴ Ni Alejandro a mammanday, adu ti impakitana a nadakes nga aramid kaniak. Subadanto ti Apo isuna segun kadagiti aramidna. ¹⁵ Masapul a salaknibam met ti bagim kenkuana, gapu ta dakkel ti panangkontrana kadagiti sasaotayo. ¹⁶ Iti imuna a panangikalintegak, awan ti nakipagtakder kaniak. Ngem ketdi, pinanawandak ti tunggal maysa. Sapay koma ta saan daytoy a maibilang a maibusor kadakuada. ¹⁷ Ngem adda iti sibayko ti Apo ken pinapigsanak tapno babaen kaniak, ti pannakaiwaragawag ket mabalin a naan-anay a matungpal, ken tapno amin dagiti Hentil ket mabalin a mangngeganda. Naispalak manipud iti ngiwat ti leon. ¹⁸ Ispalennak ti Apo manipud iti tunggal dakes nga aramid ken isalakannak para iti nainlangitan a pagarianna. Kenkuana ti dayaw iti agnanayon nga awan inggana. Amen. ¹⁹ Kablaawam ni Prisila, ni Akila, ken ti sangkabalayan ni Onesiforo. ²⁰ Nagtalinaed ni Erasto idiay Corinto, ngem ni Trofimo ket imbatik a masakit idiay Mileto. ²¹ Ikagumaam nga umay sakbay iti lam-ek. Kabkablaawannaka ni Eubulo, kasta met ni Puden, ni Lino, ni Klaudia, ken dagiti amin a kakabsat. ²² Ti Apo makikaadda koma iti espiritum. Parabur koma ti adda kenka.